Kasemɔ Nii Kɛjɛ Nyɔŋmɔ Wiemɔ Lɛŋ

Mɛni Ji Nyɔŋmɔ Yiŋtoo Kɛha Shikpɔŋ Lɛ?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ o-Biblia lɛ mli hei ni obaanyɛ ona hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi nɛɛ ahe.

1. Mɛni ji Nyɔŋmɔ yiŋtoo kɛha shikpɔŋ lɛ?

Abɔ shikpɔŋ lɛ aha adesai. Beni Nyɔŋmɔ bɔ bɔfoi yɛ ŋwɛi sɛɛ lɛ, ebɔ adesai hu koni amɛhi shikpɔŋ lɛ nɔ. (Hiob 38:4, 7) No hewɔ lɛ, Yehowa kɛ klɛŋklɛŋ adesa ni ebɔ lɛ wo paradeiso fɛfɛo ko ni atsɛɔ lɛ Eden lɛ mli, ni ekɛɛ lɛ akɛ ekɛ shwiei ni ebaawo wɔsɛɛ lɛ ahi shikpɔŋ lɛ nɔ kɛya naanɔ.—1 Mose 2:15-17; kanemɔ Lala 115:16.

Afee Eden abɔɔ lɛ yɛ shikpɔŋ lɛ he ko fioo pɛ nɔ. Akɛɛ klɛŋklɛŋ nuu kɛ yoo lɛ, ni ji Adam kɛ Hawa akɛ amɛwo shwiei. Kɛ́ adesai ayi bɔi famɔ lɛ, amɛbaalɛɛ paradeiso lɛ mli kɛkpele shikpɔŋ muu lɛ fɛɛ nɔ. (1 Mose 1:28) Akpataŋ shikpɔŋ lɛ hiɛ kɔkɔɔkɔ.—Kanemɔ Lala 104:5.

2. Mɛni hewɔ shikpɔŋ lɛ jeee paradeiso amrɔ nɛɛ?

Adam kɛ Hawa gbo Nyɔŋmɔ nɔ toi, ni no ha ashwie amɛ kɛje Eden. Paradeiso lɛ fite, ni adesa ko nyɛko aha shikpɔŋ lɛ afee paradeiso. Biblia lɛ kɛɛ akɛ: ‘Aŋɔ shikpɔŋ lɛ awo mɔ fɔŋ lɛ dɛŋ.’—Hiob 9:24; kanemɔ 1 Mose 3:23, 24.

Shi Yehowa hiɛ kpako klɛŋklɛŋ yiŋ ni eto kɛha adesa lɛ nɔ, ni asaŋ enine enyɛŋ shi kɔkɔɔkɔ. (Yesaia 45:18) Ebaaha adesai ahi shi taakɛ eto eha amɛ lɛ.—Kanemɔ Lala 37:11.

3. Mɛɛ gbɛ nɔ Nyɔŋmɔ aaatsɔ ekɛ toiŋjɔlɛ aba shikpɔŋ lɛ nɔ ekoŋŋ?

Bɔni afee ni adesai anyɛ ahi shi yɛ toiŋjɔlɛ mli lɛ, esa akɛ Nyɔŋmɔ akpata mɛi fɔji lɛ ahiɛ dã. Nyɔŋmɔ bɔfoi lɛ baakpata mɛi fɛɛ ni teɔ shi amɛwoɔ Nyɔŋmɔ lɛ ahiɛ yɛ ta ni atsɛɔ lɛ Harmagedon lɛ mli. Abaawo Satan tsuŋ afii 1,000, shi mɛi ni sumɔɔ Nyɔŋmɔ lɛ ayi baaná wala ni amɛbaahi jeŋ hee ko mli yɛ shikpɔŋ lɛ nɔ.—Kanemɔ Kpojiemɔ 16:14, 16; 20:1-3; 21:3, 4.

  4. Mɛɛ be piŋmɔ sɛɛ baafo?

Yɛ afii 1,000 lɛ mli lɛ, Yesu baajɛ ŋwɛi eye shikpɔŋ lɛ nɔ, ni ebaaha etsɔ paradeiso. Kɛfata he lɛ, ebaagbe mɛi ni sumɔɔ Nyɔŋmɔ lɛ ahe eshai lɛ. Ni tsɔɔ akɛ Yesu baaha hela, gbɔlɛ, kɛ gbele sɛɛ afo.—Kanemɔ Yesaia 11:9; 25:8; 33:24; 35:1.

Mɛɛ be Nyɔŋmɔ baaha efɔŋfeemɔ sɛɛ afo yɛ shikpɔŋ lɛ nɔ? Yesu kɛ “okadi” ko ni baatsɔɔ akɛ naagbee lɛ ebɛŋkɛ lɛ ha. Nibii ni yaa nɔ yɛ je lɛŋ amrɔ nɛɛ eha shihilɛ miijara waa kɛmiiha adesai, ni etsɔɔ akɛ wɔyɛ “je nɛŋ naagbee” be lɛ mli.—Kanemɔ Mateo 24:3, 7-14, 21, 22; 2 Timoteo 3:1-5.

5. Namɛi baahi Paradeiso ni baa lɛ mli?

Yesu fã esɛɛnyiɛlɔi lɛ koni amɛfee kaselɔi ni amɛtsɔɔ amɛ Nyɔŋmɔ gbɛi ni tsɔɔ suɔmɔ lɛ. (Mateo 28:19, 20) Yehowa miisaa mɛi akpekpei abɔ eeto yɛ jeŋ fɛɛ, koni amɛhi jeŋ hee ko mli yɛ shikpɔŋ lɛ nɔ. (Zefania 2:3) Mɛi kaseɔ gbɛi anɔ ní amɛaatsɔ amɛtsɔmɔ wumɛi kɛ tsɛmɛi kpakpai, ŋamɛi kɛ nyɛmɛi kpakpai, yɛ Yehowa Odasefoi a-Maŋtsɛyeli Asai lɛ anɔ. Gbekɛbii kɛ amɛfɔlɔi fɛɛ feɔ ekome kɛkaseɔ nibii ni baaha amɛhe amɛye akɛ shihilɛ kpakpa ko baaba wɔsɛɛ.—Kanemɔ Mika 4:1-4.

Kɛ́ otee Maŋtsɛyeli Asa lɛ nɔ lɛ, obaana mɛi ni sumɔɔ Nyɔŋmɔ ni miisumɔ ni amɛkase bɔ ni amɛaafee amɛsa ehiɛ.—Kanemɔ Hebribii 10:24, 25.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? yitso 3 lɛ mli.