Tsi Obɛŋkɛ Nyɔŋmɔ

Miishɛjemɔ Kɛha Mɛi ni Tsui Ekumɔ Lɛ

KRISTOFONYO yoo ko ní hao waa yɛ eshihilɛ mli fɛɛ lɛ kɛɛ akɛ, ‘Yehowa nyɛŋ asumɔ mi kɔkɔɔkɔ.’ No mli lɛ emu sane naa akɛ Yehowa kɛ lɛ teŋ jekɛ. Ani lɛɛlɛŋ akɛ Yehowa kɛ ejálɔi ni ehao waa lɛ ateŋ jekɛ? Wiemɔi ni akɛ mumɔ tsirɛ lalatsɛ David ní eŋma yɛ Lala 34:19 lɛ haa sanebimɔ nɛɛ hetoo bɔ ni shɛjeɔ mɔ mii.

David le akɛ kɛ́ Yehowa anɔkwa jálɔ ko hao waa lɛ, no baanyɛ aná mɔ lɛ nɔ hewalɛ waa. Beni David ji oblanyo lɛ, ehi shi akɛ kobɔfo, ejaakɛ Maŋtsɛ Saul ní miiye ehe awuŋa, ní etswa efai shi akɛ ebaagbe David lɛ miitiu lɛ. David yaba abo yɛ henyɛlɔi amaŋ ni ji Gat ni yɔɔ Filistibii lɛ akpokpaa lɛ nɔ lɛ, ejaakɛ esusu akɛ Saul ebataoŋ lɛ yɛ jɛmɛ kɔkɔɔkɔ. Shi beni ayoo David lɛ, ekwa efee ehe sɛkɛyelɔ, ni kɛjeee no kulɛ agbe lɛ. David jie Nyɔŋmɔ yi akɛ lɛ ji mɔ ni here lɛ, ni eniiashikpamɔ nɛɛ ha eŋma Lala 34 lɛ.

Ani David hé eye akɛ Nyɔŋmɔ kɛ mɛi ni haoɔ waa yɛ amanehulu ko hewɔ lɛ ateŋ jekɛ, loo enu he akɛ ehe bɛ sɛɛnamɔ ko yɛ Nyɔŋmɔ hiɛ? David ŋma akɛ: “Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” (Kuku 19) Nyɛhaa wɔkwɛa bɔ ni wiemɔi nɛɛ baanyɛ ashɛje mɔ mii ní eha mɔ aná hiɛnɔkamɔ.

“Yehowa bɛŋkɛɔ mɛi.” Wolo ko wie akɛ wiemɔ nɛɛ “miitsɔɔ akɛ Nuŋtsɔ lɛ susuɔ ewebii lɛ ahe, ehiŋmɛi kã amɛhe, ni efee klalo be fɛɛ be akɛ ebaaye ebua amɛ ní ehere amɛ.” Le ni wɔle akɛ Yehowa hiŋmɛi kã ewebii lɛ ahe lɛ haa wɔtsui nyɔɔ wɔmli. Enaa naagbai ni amɛkɛkpeɔ yɛ “jaramɔ bei” nɛɛ amli lɛ, ni ele bɔ ni amɛnuɔ he diɛŋtsɛ amɛhaa lɛ.—2 Timoteo 3:1; Bɔfoi lɛ Asaji 17:27.

“Mɛi ni tsuii ekumɔ lɛ.” Yɛ maji komɛi anɔ lɛ, kɛ́ akɛɛ ‘mɔ ko tsui ekumɔ lɛ,’ etsɔɔ akɛ mɔ lɛ yɛ suɔmɔ kɛha mɔ ko shi mɔ lɛ sumɔɔɔ lɛ. Shi woloŋlelɔ ko tsɔɔ akɛ, lalatsɛ lɛ wiemɔi lɛ tsɔɔ “awerɛho kɛ ŋkɔmɔ ni ayeɔ yɛ nɔ fɛɛ nɔ hewɔ.” Hɛɛ, bei komɛi lɛ Nyɔŋmɔ jálɔi anɔkwafoi lɛ po kɛ shihilɛi ni jaraa waa ni kumɔɔ amɛtsui kpeɔ.

“Mɛi ni mumɔ tswiaa shi kɛ dɔlɛ lɛ.” Mɛi ni nijiaŋ eje wui lɛ baanyɛ ana amɛhe akɛ amɛbɛ nɔ ko mli aahu akɛ amɛhiɛnɔkamɔ fɛɛ tãa yɛ be kukuoo mli. Wolo ko ni aŋma kɛha Biblia shishitsɔɔlɔi lɛ tsɔɔ akɛ abaanyɛ atsɔɔ wiemɔ nɛɛ shishi akɛ “mɛi ni hiɛ kãaa nɔ ko kpakpa ko nɔ dɔŋŋ.”

Te Yehowa kɛ “mɛi ni tsuii ekumɔ” kɛ “mɛi ni mumɔ tswiaa shi kɛ dɔlɛ lɛ” yeɔ ehaa tɛŋŋ? Ani etsiɔ ehe kɛjɛɔ amɛhe, ni ebuɔ amɛ akɛ mɛi ni esaaa akɛ esumɔɔ amɛ ní esusuɔ amɛhe? Dabi kwraa! Taakɛ bɔ ni fɔlɔ ko ni yɔɔ suɔmɔ mɔɔ ebi ko ni ehao waa lɛ mli ní eshɛjeɔ emii lɛ, nakai nɔŋŋ Yehowa hu tsiɔ ebɛŋkɛɔ ejálɔi ni boɔ amɛtsɛɔ lɛ kɛha yelikɛbuamɔ lɛ. Eyɛ he miishɛɛ akɛ ebaato amɛtsui ni ekumɔ lɛ nɔ nine, ní eshɛje amɛmumɔ ni tswiaa shi kɛ dɔlɛ lɛ mii. Ebaanyɛ eha amɛ nilee kɛ hewalɛ ni he hiaa amɛ lɛ koni amɛnyɛ amɛdamɔ kaa fɛɛ kaa ni amɛkɛkpeɔ lɛ naa.—2 Korintobii 4:7; Yakobo 1:5.

Taomɔ gbɛ nɔ ni oootsɔ obɛŋkɛ Yehowa kpaakpa. Nyɔŋmɔ ni musuŋ tsɔɔ lɛ nɛɛ ewo shi akɛ: “Mikɛ mɔ ni tswiaa shi kɛ dɔlɛ ní ebaa ehe shi yɛ emumɔ mli lɛ hiɔ shi, koni maha heshibalɔi amumɔ aná wala hee, ní mɛi ni tswiaa shi kɛ dɔlɛ lɛ atsui aná wala hee!”—Yesaia 57:15.