Kasemɔ Nii Kɛjɛ Nyɔŋmɔ Wiemɔ Lɛŋ

Te Ooofee Tɛŋŋ Ona Anɔkwa Jamɔ Lɛ?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ o-Biblia lɛ mli hei ni obaanyɛ ona hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi nɛɛ ahe.

1. Ani anɔkwa jamɔ kome pɛ yɔɔ?

Yesu tsɔɔ esɛɛnyiɛlɔi lɛ jamɔ kome pɛ, no ji anɔkwa jamɔ lɛ. Etamɔ gbɛ ni kɛ mɔ yaa wala mli. Yesu wie nakai gbɛ lɛ he akɛ: “Mɛi fioo ji mɛi ni naa no.” (Mateo 7:14) Jamɔ pɛ ni Nyɔŋmɔ kpɛlɛɔ nɔ lɛ ji nɔ ni enɔkwa Wiemɔ lɛ jieɔ yi ehaa. Anɔkwa jalɔi fɛɛ hiɛ hemɔkɛyeli kome.—Kanemɔ Yohane 4:23, 24; 14:6; Efesobii 4:4, 5.

2. Mɛni hewɔ jamɔi srɔtoi pii tsɛɔ amɛhe Kristofoi lɛ?

Amale gbalɔi efite Kristojamɔ yɛ amɛpɛsɛmkunya yiŋtoi ahewɔ. Taakɛ Yesu gba efɔ shi lɛ, amɛfeɔ amɛnii tamɔ ‘etooi,’ shi amɛji klaji fulɔi. (Mateo 7:13-15, 21, 23) Amale Kristojamɔ bahé shi, titri lɛ beni Yesu bɔfoi lɛ gboi lɛ sɛɛ.—Kanemɔ Bɔfoi lɛ Asaji 20:29, 30.

3. Mɛɛ nibii komɛi haa esoroɔ anɔkwa jamɔ?

Anɔkwa jalɔi buɔ Biblia lɛ akɛ eji Nyɔŋmɔ Wiemɔ. Amɛbɔɔ mɔdɛŋ akɛ amɛhi shi yɛ emli shishitoo mlai lɛ anaa. No hewɔ lɛ srɔtofeemɔ yɛ anɔkwa jamɔ kɛ jamɔ ni damɔ adesai asusumɔi anɔ lɛ teŋ. (Mateo 15:7-9) Anɔkwa jalɔi hiɔ shi yɛ nɔ ni amɛtsɔɔ mɛi krokomɛi lɛ naa.—Kanemɔ Yohane 17:17; 2 Timoteo 3:16, 17.

Anɔkwa jamɔ kɛ woo haa Nyɔŋmɔ gbɛ́i ni ji Yehowa lɛ. Yesu ha ale Nyɔŋmɔ gbɛ́i lɛ. Eye ebua mɛi koni amɛle Nyɔŋmɔ, ni etsɔɔ amɛ ní amɛsɔle koni atsé Nyɔŋmɔ gbɛ́i lɛ he. (Mateo 6:9) Mɛɛ jamɔ woɔ mɛi hewalɛ koni amɛkɛ Nyɔŋmɔ gbɛ́i lɛ atsu nii yɛ he ni oyɔɔ lɛ?—Kanemɔ Yohane 17:26; Romabii 10:13, 14.

  4. Te ooofee tɛŋŋ ona anɔkwa jalɔi lɛ?

Anɔkwa Kristofoi shiɛɔ Nyɔŋmɔ Maŋtsɛyeli lɛ. Nyɔŋmɔ tsu Yesu koni ebashiɛ Maŋtsɛyeli lɛ. Nyɔŋmɔ Maŋtsɛyeli lɛ ji hiɛnɔkamɔ pɛ ni yɔɔ kɛha adesai. Yesu tee nɔ ewie he aahu kɛyashi gbi ni egbo. (Luka 4:43; 8:1; 23:42, 43) Ekɛɛ esɛɛnyiɛlɔi lɛ ní amɛshiɛ Nyɔŋmɔ Maŋtsɛyeli lɛ. Kɛ́ mɔ ko ba ni ekɛ bo abawie Nyɔŋmɔ Maŋtsɛyeli lɛ he sane lɛ, mɛɛ jamɔ mli ekã shi faŋŋ akɛ eyɔɔ?—Kanemɔ Mateo 10:7; 24:14.

Yesu sɛɛnyiɛlɔi lɛ jɛɛɛ jeŋ fɔŋ nɛɛ mli. Amɛkɛ amɛhe wooo maŋkwramɔŋ saji loo kwasafoŋ béi amli. (Yohane 17:16) Amɛkaseee nifeemɔi gbohii kɛ jeŋba sha ni eyi je lɛŋ lɛ hu.—Kanemɔ Yakobo 1:27; 4:4.

5. Mɛni ji nɔ̃ titri ni akɛyɔseɔ anɔkwa Kristofoi?

Anɔkwa Kristofoi sumɔɔ amɛhe waa. Nyɔŋmɔ Wiemɔ lɛ tsɔɔ amɛ akɛ amɛkɛ bulɛ aha mɛi ni jɛ maji srɔtoi fɛɛ anɔ lɛ. Bei pii lɛ, apasa jamɔ fiɔ tai asɛɛ, shi anɔkwa jálɔi efeee nakai. (Mika 4:1-4) Yɛ no najiaŋ lɛ, anɔkwa jamɔ mli bii jɛɔ amɛsuɔmɔ mli amɛkɛ amɛbe kɛ amɛnibii tsuɔ nii kɛyeɔ amɛbuaa mɛi krokomɛi.—Kanemɔ Yohane 13:34, 35; 1 Yohane 4:20, 21.

Mɛɛ jamɔ kuu haa amɛtsɔɔmɔi fɛɛ damɔɔ Nyɔŋmɔ Wiemɔ lɛ nɔ, amɛkɛ bulɛ haa Nyɔŋmɔ gbɛ́i lɛ, ni amɛtsɔɔ akɛ Nyɔŋmɔ Maŋtsɛyeli lɛ pɛ ji adesai ahiɛnɔkamɔ? Mɛɛ kuu mli bii sumɔɔ amɛhe ni amɛfiii tawuu sɛɛ? Ekã shi faŋŋ akɛ amɛji Yehowa Odasefoi.—1 Yohane 3:10-12.—w11-E 08/1.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia lɛ Tsɔɔ Diɛŋtsɛ? yitso 15 lɛ mli.

[Mfoniri ni yɔɔ baafa 16]

“Amɛkɛɛ akɛ amɛle Nyɔŋmɔ, shi amɛkɛ amɛnitsumɔi kwaa lɛ.”—Tito 1:16