Ani Ole?

Mɛni ji ‘mama tsuru’ ni afɔɔ he wiemɔ yɛ Mose Wolo ni Ji Enyɔ lɛ?

▪ Biblia mli amaniɛbɔɔ lɛ tsɔɔ ákɛ akɛ “kpãa bluu kɛ afaseo kɛ etsuru kɛ eyɛŋ futaa ni anyɛne” fee mama ni akɛfo kpee buu—ni ji blema Israelbii lɛ ajamɔhe—lɛ he, kɛ nɔ ni akɛfee eshinaa lɛ. (2 Mose 26:1; 38:18) Akɛ ‘mama tsuru’ hu kpɛ osɔfoi “atadei krɔŋkrɔŋi” lɛ.—2 Mose 28:1-6.

Akɛ tsofa ko woɔ mama lɛ, ni no haa esu tsakeɔ kɛtsɔɔ etsuru faa lɛ. Anáa nakai tsofa lɛ kɛjɛɔ kooloi bibii komɛi ahe. Kooloi bibii ni bɛ fiji nɛɛ hiɔ tso ko ni atsɛɔ lɛ oak lɛ nɔ, ni tso nɛɛ kwɛ̃ɔ yɛ Middle East kɛ Mediteranea Ŋshɔ lɛ naa. Kɔla tsuru lɛ hiɔ wɔji ni yɔɔ kooloi bibii nɛɛ ateŋ yei lɛ amli lɛ mli. Kɛ́ wɔji yɛ kooloo lɛ mli lɛ, anaa kooloo lɛ tamɔ yɔɔyi, ni edalɛ tamɔ yɔɔ, ni ekpɛtɛɔ oak tso lɛ bai kɛ eniji fɔbii lɛ ahe. Kɛ́ akpɔlɔ kooloi nɛɛ lɛ, nu ni aŋaa kɛjɛɔ amɛmli lɛ tsuuɔ, ni akɛni amɛmli nu lɛ nyɛɔ efutuɔ nu hewɔ lɛ, akɛtsakeɔ mamai asu. Pliny Onukpa ni eji Roma yinɔsaneŋmalɔ lɛ tsĩ su ni ji etsuru lɛ tã, ni etsɔɔ akɛ efata sui ni asumɔɔ waa yɛ ebeaŋ lɛ he.

Mɛi ni ŋmala Kristofoi a-Hela Ŋmalɛi lɛ ateŋ namɛi fata kaselɔi ni bua amɛhe naa yɛ Pentekoste gbi lɛ nɔ lɛ he yɛ afi 33 Ŋ.B.?

▪ Eeenyɛ efee akɛ hii kpaanyɔ ni ŋmala Hela Ŋmalɛi lɛ ateŋ mɛi ekpaa yɛ jɛmɛ.

Amaniɛbɔɔ ni yɔɔ Bɔfoi lɛ Asaji lɛ tsɔɔ akɛ Yesu fã ekaselɔi lɛ akɛ “amɛkaje Yerusalem, shi moŋ amɛmɛ tsɛ lɛ shiwoo lɛ.” (Bɔfoi lɛ Asaji 1:4) Nakai amaniɛbɔɔ lɛ nɔŋŋ tsɔɔ akɛ Mateo, Yohane, kɛ Petro ní fata mɛi ni ŋmala Biblia lɛ ahe yɛ sɛɛ mli lɛ bo Yesu fãmɔ lɛ toi ni amɛkɛ kaselɔi krokomɛi lɛ anaa kpe shi “yɛ he kome.” Yesu nyɛbii lɛ hu fata he. (Bɔfoi lɛ Asaji 1:12-14; 2:1-4) Sɛɛ mli lɛ, amɛteŋ mɛi enyɔ ni ji Yakobo kɛ Yuda ŋmala Biblia mli woji ni amɛgbɛ́i kã nɔ lɛ.—Mateo 13:55; Yakobo 1:1; Yuda 1.

Marko wie oblanyo ko he yɛ e-Sanekpakpa lɛ mli akɛ ejo foi gbi gbɛkɛ ni amɔ Yesu lɛ. Ekã shi faŋŋ akɛ Marko miiwie lɛ diɛŋtsɛ ehe, ejaakɛ no mli lɛ kaselɔi krokomɛi lɛ fɛɛ ejo foi amɛshi Yesu momo. (Marko 14:50-52) No hewɔ lɛ, etamɔ nɔ ni Marko fata klɛŋklɛŋ kaselɔi lɛ ahe, ni eeenyɛ efee akɛ efata mɛi ni naa kpe shi yɛ Pentekoste gbi lɛ nɔ lɛ ahe.

Paulo kɛ Luka ji mɛi enyɔ ni eshwɛ ni ŋmala Kristofoi a-Hela Ŋmalɛi ni jɛ mumɔŋ lɛ. Beni ayeɔ Pentekoste gbi jurɔ lɛ yɛ afi 33 Ŋ.B. lɛ, no mli lɛ Paulo ebatsɔko Kristo sɛɛnyiɛlɔ. (Galatabii 1:17, 18) Ekã shi faŋŋ akɛ Luka hu bɛ jɛmɛ, ejaakɛ efataaa ‘mɛi ni kɛ amɛhiŋmɛi na’ Yesu sɔɔmɔ nitsumɔ lɛ ahe.—Luka 1:1-3.—w11-E 12/1.

[Mfoniri ni yɔɔ baafa 20]

Kooloi ni akɛfeɔ tsofa lɛ

[He ni Sane lɛ Jɛ]

Courtesy of SDC Colour Experience (www.sdc.org.uk)

[Mfoniri ni yɔɔ baafa 20]

Petro miiwie yɛ afi 33 Ŋ.B. Pentekoste gbi lɛ nɔ