Mɛi Miitao Hetoi

“Etamɔ nɔ ni mɔ fɛɛ mɔ hiɛ susumɔ ko yɛ mɔ ni [Yesu] ji lɛ he. Ekɔɔɔ he eko wɔhemɔkɛyeli loo bɔ ni wɔyiŋ etɛ̃ɛɛ wɔ yɛ mɔ ni eji lɛ he lɛ, wɔ fɛɛ wɔbiɔ wɔhe sane nɛɛ akɛ, ‘Namɔ kwraa ji nuu nɛɛ?’”—NIŊMALƆ STAN GUTHRIE.

MƐI miitao waa akɛ amɛle mɔ ni Yesu ji. Woji ni wieɔ ehe lɛ ehe shi waa. Sinii ni kɔɔ ehe lɛ hu ebu, ni mɛi kwɛɔ waa. Fɛɛ sɛɛ lɛ, mɛi babaoo kã he amɛbiɔ saji yɛ mɔ ni Yesu ji lɛ he. Mɛi hiɛ susumɔi srɔtoi yɛ mɔ tuuntu ni Yesu ji lɛ he.

Afii fioo komɛi ni eho lɛ, adafitswaa saji aŋmalalɔi enyɔ bi mɛi koni amɛtsɔɔ amɛjwɛŋmɔ yɛ sanebimɔ ni ji “Namɔ ji Yesu?” lɛ he yɛ Intanɛt lɛ nɔ. Hetoi ni mɛi ha lɛ ekomɛi nɛ:

● “Eeenyɛ efee akɛ eji rabi (tsɔɔlɔ) ni jie musuŋtsɔlɛ babaoo kpo yɛ eshihilɛ mli fɛɛ.”

● “Eji gbɔmɔ adesa ko kɛkɛ, ni fee nibii wuji yɛ shihilɛ mli.”

● “Nɔ ko bɛ ni tsɔɔ akɛ Yesu ehi shi pɛŋ.”

● “Yesu ji Nyɔŋmɔ Bi ni afɔ lɛ, egbo, ni atee lɛ shi kɛjɛ gbohii ateŋ koni ehere wɔ kɛjɛ wɔhe eshai lɛ amli. Amrɔ nɛɛ ehiɛ kã, ni E-baaku sɛɛ eba shikpɔŋ lɛ nɔ ekoŋŋ.”

● “Miheɔ miyeɔ akɛ Yesu Kristo ji Nyɔŋmɔ bi koome lɛ, eji gbɔmɔ adesa ni lɛ nɔŋŋ hu lɛ Nyɔŋmɔ ni.”

● “Yesu ji adesã ko ni atãa gbekɛbii ni hiɛ efã.”

Eyɛ faŋŋ akɛ, susumɔi srɔtoi nɛɛ fɛɛ nyɛŋ afee nɔ ni ja. Ani he ko yɛ ni wɔbaanyɛ wɔná wɔsanebimɔi ni kɔɔ Yesu he lɛ ahetoo ni ja ni abaanyɛ amu afɔ̃ nɔ? Mɛi ni fee wolo nɛɛ heɔ amɛyeɔ akɛ Biblia lɛ ji Nyɔŋmɔ Wiemɔ, ni ákɛ no pɛ tsɔɔ wɔ Yesu he anɔkwalei fɛɛ. *—2 Timoteo 3:16.

Yɛ sane ni nyiɛ sɛɛ lɛ mli lɛ, wɔbaasusu bɔ ni Biblia lɛ haa saji komɛi ni mɛi fɔɔ bimɔ yɛ Yesu he lɛ ahetoi lɛ he. Yesu diɛŋtsɛ kɛɛ akɛ “mɔ fɛɛ mɔ ni heɔ enɔ yeɔ lɛ” baanyɛ aná yiwalaheremɔ. (Yohane 3:16) Wɔmiifɔ̃ bo nine ni otao hetoi lɛ, ni no sɛɛ lɛ bo diɛŋtsɛ okpɛ oyiŋ kɛ́ esa akɛ okase Yesu he nii babaoo, kɛ bɔ ni ooofee oná emli hemɔkɛyeli.

[Shishigbɛ niŋmaa]