Saji Ni Mɛi Ni Kaneɔ Lɛ Biɔ . . .

Mɛni Hewɔ Nyɔŋmɔ kɛɛ Abraham akɛ Ekɛ Ebi lɛ Ashã Afɔle Lɛ?

▪ Taakɛ aŋma yɛ Biblia mli wolo ni ji Mose Klɛŋklɛŋ Wolo lɛ mli lɛ, Yehowa kɛɛ Abraham akɛ ekɛ ebi Isak ashã afɔle. (1 Mose 22:2) Ewa kɛha mɛi komɛi ni kaneɔ Biblia lɛ akɛ amɛaanu nakai sane lɛ shishi. Woloŋlelɔ ko ni atsɛɔ lɛ Carol lɛ kɛɛ akɛ, “Beni miji gbekɛ fioo ni minu sane nɛɛ klɛŋklɛŋ kwraa lɛ, mimli wo la. Mibi mihe akɛ, mɛɛ Nyɔŋmɔ po baabi ni afee nɔ ko tamɔ nɛkɛ?” Shishinumɔ yɛ he akɛ aaanu nii ahe nakai, kɛlɛ, ehe miihia ni wɔha otii komɛi ahi wɔjwɛŋmɔŋ.

Klɛŋklɛŋ kwraa lɛ, susumɔ nɔ ni Yehowa efeee lɛ he. Eyɛ mli akɛ Abraham fee klalo akɛ ekɛ ebi lɛ baashã afɔle moŋ, shi Yehowa eŋmɛɛɛ lɛ gbɛ kɔkɔɔkɔ, ni kɛjɛ nakai beaŋ kɛbaa nɛɛ, Nyɔŋmɔ biko ni mɔ ko afee nakai. Yehowa miisumɔ ni mɛi fɛɛ ni jaa lɛ lɛ, ni gbekɛbii hu fata he lɛ, aya nɔ ahi shi—amɛwala sɛɛ atsɛ, ni amɛtsui anyɔ amɛmli yɛ shihilɛ mli.

Nɔ ni ji enyɔ lɛ, Biblia lɛ haa wɔnaa akɛ Yehowa yɛ yiŋtoo krɛdɛɛ ko hewɔ ni ekɛɛ Abraham ni ekɛ ebi Isak ashã afɔle lɛ. Nyɔŋmɔ le akɛ, afii ohai babaoo komɛi asɛɛ lɛ, Ebaaŋmɛ gbɛ ni Lɛ diɛŋtsɛ e-Bi * Yesu, abagbo yɛ wɔhewɔ. (Mateo 20:28) No mli lɛ, Yehowa miitao ni wɔna bɔ ni afɔleshãa nɛɛ baaha nɔ ko ni jara wa waa aŋmɛɛ lɛ lɛ. Yehowa kɛ nɔ ni ebi ni Abraham afee lɛ fee nɔkwɛmɔnɔ ni mli kã shi jogbaŋŋ kɛtsɔɔ afɔle ni lɛ diɛŋtsɛ ebaashã wɔsɛɛ lɛ. Mɛɛ gbɛ nɔ?

Susumɔ nɔ ni Yehowa kɛɛ Abraham lɛ he okwɛ: “Agbɛnɛ ŋɔɔ obi Isak, ni ji obi koome ni odɔɔ ehe lɛ, ni . . . okɛ lɛ ayashã shãa afɔle.” (1 Mose 22:2) Kadimɔ akɛ, Yehowa wie Isak he akɛ obi ‘ni odɔɔ ehe lɛ.’ Yehowa le bɔ ni Isak sane kã Abraham tsui nɔ waa ha. Nyɔŋmɔ le bɔ ni lɛ diɛŋtsɛ hu enuɔ he ehaa yɛ e-Bi Yesu he. Yehowa sumɔɔ Yesu sane aahu akɛ ejɛ ŋwɛi ewie Yesu he tɛ̃ɛ shii enyɔ sɔŋŋ akɛ “misuɔmɔ bi.”—Marko 1:11; 9:7.

Kadimɔ hu akɛ, beni Yehowa biɔ ni Abraham kɛ ebi Isak ashã afɔle lɛ, wiemɔ ni Yehowa kɛtsu nii lɛ, yɛ Hebri mli lɛ, etsɔɔ heshibaa mli ni ajɛɔ abiɔ nii. Biblia nilelɔ ko tsɔɔ mli akɛ wiemɔ nɛɛ ni Nyɔŋmɔ kɛtsu nii lɛ tsɔɔ akɛ “NUŊTSƆ lɛ le akɛ nɔ wulu diɛŋtsɛ ji nɔ ni baaŋmɛɛ Abraham lɛ.” Taakɛ wɔbaanyɛ wɔna lɛ, nakai nibimɔ lɛ baanyɛ aha Abraham aye ŋkɔmɔ waa; nakai nɔŋŋ ekã shi faŋŋ akɛ, Yehowa nu piŋmɔ he waa be ni ená ni esuɔmɔ Bi lɛ miiná nɔ ni eegbo lɛ. Ŋwanejee ko bɛ he akɛ no ji piŋmɔ ni fe fɛɛ ni Yehowa etsɔ mli dã loo ebaatsɔ mli.

No hewɔ lɛ, eyɛ mli akɛ ekolɛ kɛ́ wɔsusu nɔ ni Yehowa bi ni Abraham afee lɛ he lɛ, ŋmiŋmi baamɔ wɔ moŋ, shi nilee yɛ mli akɛ wɔɔkai akɛ Yehowa eŋmɛɛɛ nakai blematsɛ anɔkwafo lɛ gbɛ koni ekɛ ebi lɛ ashã afɔle lɛ. Eŋmɛɛɛ gbɛ ni Abraham atsɔ piŋmɔ ni naa wa fe fɛɛ ni fɔlɔ ko tsɔɔ mli kɛ́ ebi gbo lɛ mli; ebu Isak he koni ekagbo. Kɛlɛ, Yehowa kamaaa wɔ “lɛ diɛŋtsɛ ebi lɛ, shi moŋ eŋɔ lɛ eha yɛ wɔ fɛɛ wɔnajiaŋ.” (Romabii 8:32) Mɛni hewɔ ni Yehowa kɛ ehe wo piŋmɔ ni tamɔ nɛkɛ mli lɛ? Efee nakai bɔni afee ni “wɔná wala.” (1 Yohane 4:9) Kwɛ bɔ ni enɛ haa wɔkaiɔ suɔmɔ kpele ni Nyɔŋmɔ yɔɔ kɛha wɔ! Ani enɛ tsirɛɛɛ wɔ ni wɔ hu wɔjie suɔmɔ kpo wɔtsɔɔ lɛ? *—w12-E 01/1.

[Shishigbɛ niŋmai]