Mlihilɛ​—Su ko ni He Hiaa Waa yɛ Nyɔŋmɔ Hiɛ

OBLANYO ko ni yɔɔ Japan lɛ hiɛ sɔ mlihilɛ ni nuu onukpa ko ni he jɔ jie lɛ kpo etsɔɔ lɛ lɛ waa. Nuu nɛɛ, ni eji maŋsɛɛ sɔɔlɔ lɛ, shi Asiabii amaŋ nɛɛ mli afii abɔ nɛ, ni loloolo lɛ, enyɛɛɛ ewie Japan wiemɔ lɛ jogbaŋŋ. Kɛlɛ, daa otsi lɛ, eyasaraa oblanyo nɛɛ yɛ shia koni ekɛ lɛ akase Biblia lɛ. Nuu nɛɛ kɛ hiɛ ŋmɔlɔ kɛ mlihilɛ toɔ etsui shi kɛhaa saji babaoo ni oblanyo ni taoɔ ale nibii pii lɛ biɔ lɛ ahetoo.

Oblanyo lɛ hiɛ kpaaa mlihilɛ ni maŋsɛɛ sɔɔlɔ ni hiɛ efã nɛɛ jie lɛ kpo etsɔɔ lɛ lɛ nɔ kɔkɔɔkɔ. Oblanyo lɛ kɛɛ akɛ, ‘Kɛji Biblia lɛ haa mɔ mli hiɔ, ni ejieɔ suɔmɔ kpo nɛkɛ lɛ, no lɛ bɔ fɛɛ bɔ ni fee lɛ esa akɛ makase Biblia lɛ.’ Enɛ wo lɛ hewalɛ ni ekase nɔ ko hee ni eleee kwraa. Hɛɛ, mlihilɛ taa gbɔmɔ tsuiŋ, ni enáa tsui lɛ nɔ hewalɛ waa po fe wiemɔi.

Eji Nyɔŋmɔ Sui lɛ Eko

Ewaaa kwraa akɛ wɔɔjie mlihilɛ kpo wɔtsɔɔ wɔwekumɛi. Kɛlɛ, shishinumɔ ni mlihilɛ hiɛ lɛ yaa shɔŋŋ fe henumɔ ni ayɔɔ kɛha wekumɛi. Yesu wie akɛ eŋwɛi Tsɛ lɛ jieɔ mlihilɛ kpo etsɔɔ mɛi ni sumɔɔ Etsɛ lɛ kɛ “trumui” fɛɛ. Yesu wo esɛɛnyiɛlɔi lɛ hewalɛ koni amɛkase Nyɔŋmɔ yɛ enɛ gbɛfaŋ, ekɛɛ akɛ: “Nyɛhia kɛwulaa shi, tamɔ bɔ ni nyɛtsɛ ni yɔɔ ŋwɛi lɛ hi kɛwula shi lɛ.”—Luka 6:35; Mateo 5:48; 2 Mose 34:6.

Adesai ni abɔ yɛ Nyɔŋmɔ subaŋ nɔ lɛ baanyɛ ajie mlihilɛ kpo amɛtsɔɔ mɛi krokomɛi taakɛ Yehowa feɔ lɛ. (1 Mose 1:27) Hɛɛ, wɔbaanyɛ wɔkase Nyɔŋmɔ, koni wɔkpã wɔmlihilɛ lɛ mli ni eshɛ mɛi krokomɛi ni amɛjeee wɔwekumɛi lɛ anɔ. Biblia lɛ wieɔ mlihilɛ he akɛ eji Nyɔŋmɔ mumɔ krɔŋkrɔŋ lɛ loo ehewalɛ ni miitsu nii lɛ sui ni he hiaa lɛ fã. (Galatabii 5:22) No hewɔ lɛ, be mli ni mɔ ko kaseɔ Nyɔŋmɔ, ni ji Bɔlɔ lɛ he nii, ni ebɛŋkɛɔ lɛ kpaakpa lɛ, ebaanyɛ ená su nɛɛ ni eya nɔ ejie lɛ kpo babaoo.

Akɛni mlihilɛ fata sui ni akɛbɔ adesai lɛ ahe, ni Nyɔŋmɔ buɔ nakai su lɛ waa hewɔ lɛ, eja jogbaŋŋ akɛ Nyɔŋmɔ kɛɔ wɔ akɛ “nyɛmli ahia ahaa nyɛhe.” (Efesobii 4:32) Agbɛnɛ hu akaiɔ wɔ akɛ: “Gbɔfeemɔ hu, nyɛhiɛ akakpaa nɔ.”—Hebribii 13:2.

Yɛ ŋmɛnɛ jeŋ ni mɛi babaoo ejieee mlihilɛ kpo, ni afeɔ trumu nɛɛ mli lɛ, ani wɔbaanyɛ wɔjie mlihilɛ kpo wɔtsɔɔ mɛi krokomɛi, ní mɛi ni wɔleee po fata he? Mɛni baanyɛ aye abua wɔ koni wɔjie mlihilɛ kpo? Anɔkwa, mɛni hewɔ po esa akɛ wɔsusu enɛ he?

Ehe Hiaa Waa yɛ Nyɔŋmɔ Hiɛ

Esa kadimɔ waa akɛ beni Paulo wie mlihilɛ ni ajieɔ lɛ kpo atsɔɔ gbɔi lɛ he sɛɛ lɛ, etee nɔ ekɛɛ akɛ: “No nɔ mɛi komɛi tsɔ fee ŋwɛi bɔfoi agbɔ, ni amɛleee.” Kɛ́ oná hegbɛ akɛ ofee ŋwɛi bɔfoi agbɔ lɛ, te obaanu he tɛŋŋ? Shi Paulo kɛ wiemɔ ni ji “ni amɛleee” lɛ mu sane nɛɛ naa. Kɛ́ wɔɔwie sane nɛɛ yɛ gbɛ kroko nɔ lɛ, nɔ ni Paulo tsɔɔ ji akɛ kɛ́ wɔjieɔ mlihilɛ kpo wɔtsɔɔ mɛi krokomɛi, ni gbɔi, loo mɛi kpɔji fata he lɛ, abaajuro wɔ yɛ gbɛi ni wɔbɔleee anɔ.

Biblia shishitsɔɔmɔi babaoo ni gbalaa jwɛŋmɔ yɛ ŋmalɛ kome nɔ kɛyaa ŋmalɛ kroko nɔ lɛ haa wɔnaa tsakpaa ni yɔɔ Paulo wiemɔ nɛɛ kɛ Abraham kɛ Lot sane ni yɔɔ  1 Mose wolo lɛ yitsei 18 kɛ 19 lɛ ateŋ. Yɛ shihilɛi enyɔ lɛ fɛɛ mli lɛ, wɔkaneɔ akɛ ŋwɛi bɔfoi bapue akɛ gbɔi ni hiɛ shɛɛ ni he hiaa waa. Yɛ Abraham nɔ lɛ mli lɛ, shɛɛ lɛ kɔɔ Nyɔŋmɔ shiwoo akɛ abaafɔ bi nuu aha lɛ lɛ mlibaa lɛ he, ni yɛ Lot nɔ lɛ mli lɛ, ekɔɔ amɛkpɔ̃mɔ kɛmiijɛ Sodom kɛ Gomora maji lɛ ahiɛkpatamɔ ni baa lɛ he.—1 Mose 18:1-10; 19:1-3, 15-17.

Kɛ́ okane ŋmalɛi ni atsĩ tã yɛ yiteŋ gbɛ nɛɛ, obaana akɛ Abraham kɛ Lot fɛɛ jie mlihilɛ kpo amɛtsɔɔ mɛi komɛi ni miiho ní amɛleee amɛ. Ekã shi faŋŋ akɛ yɛ Biblia beaŋ lɛ, gbɔ ni afeɔ gbɛfalɔi kɛ mɛi ni miiho—kɛ́ amɛji nanemɛi, wekumɛi, loo mɛi kpɔji jio—lɛ ji nɔ ko ni afɔɔ feemɔ, ni eji sɔ̃ hu. Anɔkwa, Mose Mla lɛ biɔ ni Israelbii lɛ akwɛ mɛi ni ebato gbɔ yɛ amɛshikpɔŋ nɔ lɛ atsiabo. (5 Mose 10:17-19) Fɛɛ mli lɛ, Abraham kɛ Lot fee babaoo po fe nɔ ni sɛɛ mli lɛ ebatsɔ mla lɛ. Amɛbɔ mɔdɛŋ waa kɛjie mlihilɛ kpo amɛtsɔɔ mɛi kpɔji, ni ajɔɔ amɛ yɛ enɛ hewɔ.

Ajɔɔ Abraham kɛ bi nuu yɛ emlihilɛ lɛ hewɔ, kɛlɛ jeee lɛ pɛ ená he sɛɛ, ehe ba sɛɛnamɔ kɛha wɔ fɛɛ hu. Mɛɛ gbɛ nɔ? Abraham kɛ ebi Isak tsu gbɛfaŋnɔ ko ni he hiaa waa he nii yɛ Nyɔŋmɔ yiŋtoo he nitsumɔ mli. Amɛbatsɔmɔ mɛi titri yɛ wekutɔkpaa ni atsɔ nɔ aná Mesia, ni ji Yesu lɛ mli. Ni amɛnɔkwayeli gbɛ lɛ fee bɔ ni abaadamɔ Nyɔŋmɔ suɔmɔ kɛ eduromɔ nɔ ahere adesai ayiwala lɛ he mfoniri.—1 Mose 22:1-18; Mateo 1:1, 2; Yohane 3:16.

Nakai saji lɛ haa wɔnaa nɔ ni Nyɔŋmɔ kpaa gbɛ yɛ mɛi ni esumɔɔ amɛsane lɛ adɛŋ, kɛ bɔ ni ehiɛ sɔɔ su ni ji mlihilɛ lɛ jogbaŋŋ. Eji nɔ ko ni he hiaa waa yɛ Nyɔŋmɔ hiɛ, jeee nɔ ni kɛ́ aasumɔ dani afeɔ.

Kɛ́ Wɔjie Mlihilɛ Kpo lɛ Eyeɔ Ebuaa ni Wɔleɔ Nyɔŋmɔ Jogbaŋŋ

Biblia lɛ wieɔ akɛ wɔbe nɛɛ mli lɛ, mɛi babaoo baatsɔmɔ “trumui, mɛi ni he tseee” loo amɛyeee anɔkwa, “mɛi ni edɔɔɔ mɔ he.” (2 Timoteo 3:1-3) Ŋwanejee ko bɛ he akɛ okɛ mɛi ni tamɔ nɛkɛ kpeɔ daa gbi. Kɛlɛ, no etsĩii wɔnaa akɛ wɔkajie mlihilɛ kpo wɔtsɔɔ mɛi krokomɛi. Akaiɔ Kristofoi akɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ; nyɛjwɛŋa nɔ ni yɔɔ fɛo nɔ nyɛtoa yɛ gbɔmɛi fɛɛ hiɛ.”—Romabii 12:17.

Wɔbaanyɛ wɔbɔ mɔdɛŋ fɛɛ ni wɔɔnyɛ wɔjɛ wɔtsuiŋ wɔjie mlihilɛ kpo wɔtsɔɔ mɛi. Biblia lɛ kɛɔ akɛ: “Mɔ fɛɛ mɔ ni sumɔɔ mɔ lɛ . . . ele Nyɔŋmɔ,” ni mlihilɛ kpo ni wɔjieɔ wɔtsɔɔ mɛi krokomɛi lɛ ji gbɛ kome ni wɔtsɔɔ akɛ wɔyɛ suɔmɔ. (1 Yohane 4:7; 1 Korintobii 13:4) Hɛɛ, kɛ́ wɔjie mlihilɛ kpo wɔtsɔɔ mɛi krokomɛi lɛ, wɔbaleɔ Nyɔŋmɔ jogbaŋŋ, ni  no haa wɔmii shɛɔ wɔhe waa. Yesu wie yɛ egɔŋ nɔ shiɛmɔ lɛ mli akɛ: “Nyɛfea ejurɔ . . . ni nyɛnyɔmɔwoo aaafa, ni nyɛaatsɔmɔ Ŋwɛinyo lɛ bii.”—Luka 6:35.

Susumɔ Aki, ni eji Japan yoogbayoo fioo ni hiɛ bi hii enyɔ lɛ nɔkwɛmɔnɔ lɛ he okwɛ. Beni enyɛ awo gbo eshi lɛ trukaa lɛ, shihilɛ lɛ ná ejwɛŋmɔ nɔ hewalɛ waa. Bei komɛi lɛ, egbaa enaa aahu akɛ ehe bahiaa ni eyana datrɛfonyo. Kɛkɛ ni weku ko fã kɛbahi ekutso lɛŋ. No mli lɛ, tsɛ ni yɔɔ weku lɛ mli lɛ egbo etsɛko yɛ tsɔne oshara ko mli, ni eshwɛ nyɛ lɛ kɛ gbekɛbii enumɔ ni darako. Aki nu he waa eha weku lɛ, ni ebɔ mɔdɛŋ waa akɛ ekɛ nyɛ lɛ kɛ bii lɛ baafee nanemɛi. Efee nɔ fɛɛ nɔ ni eeenyɛ kɛye ebua weku lɛ—ehaa amɛ niyenii, atadei, kɛ nibii krokomɛi—Aki naagba lɛ laaje kwraa. Ena bɔ ni Biblia sane nɛɛ ji anɔkwale ha: “Nɔhamɔ mli yɛ jɔɔmɔ fe hemɔ.” (Bɔfoi lɛ Asaji 20:35) Lɛɛlɛŋ, kɛ́ obɛ miishɛɛ lɛ, mlihilɛ kpo ni ooojie otsɔɔ mɛi krokomɛi lɛ ji nɔ ni hi fe fɛɛ ni baaye abua bo.

‘Wɔkɛmiifa Yehowa’

Ebiii ni afite shika babaoo dani anyɛ ajie mlihilɛ kpo. Ni edamɔɔɔ nyɛmɔ ni oyɔɔ loo ogbɔmɔtsoŋ hewalɛ hu nɔ. Bei pii lɛ, kɛ́ ofee ohiɛ ŋmɔlɔŋmɔlɔ, owie nɔ ko kɛtsɔɔ akɛ osusuɔ mɔ he, oye obua mɔ ko, oha nikeenii ko ni tsɔɔ mɔhesusumɔ, loo oha mɔ ko ye ohiɛ be ni ato srɛnɛɛ kɛkɛ po lɛ, mɛi ahiɛ sɔɔ waa. Kɛ́ yɛ shihilɛ pɔtɛɛ ko mli lɛ, oleee nɔ ni sa akɛ owie loo ofee lɛ, jɛɛ mlihilɛ mli owie loo ofee nii lɛ. Maŋsɛɛ sɔɔlɔ ni hiɛ efã lɛ mlihilɛ lɛ ná oblanyo ni atsĩ etã yɛ sane nɛɛ shishijee mli lɛ nɔ hewalɛ waa fe nibii po ni ekɛɛ oblanyo lɛ. Ebɛ naakpɛɛ mɔ akɛ Nyɔŋmɔ taomɔnii kɛha mɛi ni jáa lɛ lɛ ateŋ ekome ji ‘amɛsumɔ ejurɔfeemɔ’ loo amɛmli ahi!—Mika 6:8.

Mlihilɛ fioo ko ni abaajie kpo atsɔɔ mɔ ko lɛ baanyɛ aye abua mɔ lɛ be kpalaŋŋ. Kɛ́ akɛ jwɛŋmɔ ni ja fee, ni titrii lɛ afee yɛ suɔmɔ ni ayɔɔ kɛha Nyɔŋmɔ lɛ hewɔ lɛ, ebaanyɛ eha mɔ ni jie mlihilɛ kpo lɛ kɛ mɔ ni ajie kpo atsɔɔ lɛ fɛɛ atsuii anyɔ amɛmli pam. Kɛ́ ajieee hiɛsɔɔ kpo yɛ omlihilɛ lɛ he lɛ, no etsɔɔɔ akɛ efee yaka. Eji nɔ ko kple yɛ Nyɔŋmɔ hiɛ. Biblia lɛ woɔ wɔ shi akɛ kɛ́ wɔjie mlihilɛ kpo wɔtsɔɔ mɛi lɛ, yɛ anɔkwale mli lɛ ‘wɔkɛmiifa Yehowa.’ (Abɛi 19:17) Mɛni hewɔ otaooo hegbɛi koni okɛjie mlihilɛ kpo otsɔɔ mɛi ni okɛkpeɔ?—w12-E 9/1.

[Mfoniri ni yɔɔ baafa 19]

Ajɔɔ Abraham waa yɛ mlihilɛ kpo ni ejie lɛ hewɔ

[Wiemɔ ni akɔ ni akɛmiitsu nii ni yɔɔ baafa 20]

Kɛ́ yɛ shihilɛ pɔtɛɛ ko mli lɛ, oleee nɔ ni sa akɛ owie loo ofee lɛ, jɛɛ mlihilɛ mli owie loo ofee nii lɛ

[Mfoniri ni yɔɔ baafa 20]

Kɛ́ wɔjie mlihilɛ kpo wɔtsɔɔ mɛi lɛ, etamɔ ‘wɔkɛmiifa Yehowa’