Sane ko ní Odasefonyo ko kɛ Mɔ ko Gba​—Ani Gbɔmɛi Kpakpai Fɛɛ Yaa Ŋwɛi?

YEHOWA ODASEFOI náa he miishɛɛ akɛ amɛkɛ mɛi aaagba Biblia mli sane. Ani oyɛ Biblia mli sanebimɔ pɔtɛɛ ko ni oosusu he? Ani oosumɔ ni ole Yehowa Odasefoi lɛ ahemɔkɛyeli lɛ loo amɛjamɔŋ nifeemɔi lɛ ahe saji babaoo? Kɛ́ nakai lɛ, no lɛ be kroko kɛ́ okɛ Odasefonyo ko kpe lɛ, bɔɔ mɔdɛŋ ní obi lɛ. Ebaaná he miishɛɛ waa akɛ ekɛ bo baasusu saji ni tamɔ nɛkɛ lɛ ahe.

Sane ni nyiɛ sɛɛ nɛɛ ji nɔkwɛmɔnɔ ni tsɔɔ sane ko ní Yehowa Odasefonyo ko kɛ mɔ ko baagba. Ŋɔɔ lɛ akɛ Odasefonyo ko ni atsɛɔ lɛ Marcus lɛ eyasara nuu ko ni atsɛɔ lɛ Robert yɛ eshĩa.

Mɛni Mɛi ni Yaa Ŋwɛi lɛ Feɔ Yɛ Jɛmɛ?

Marcus: Kɛ́ okwɛ lɛ, mɛɛ shihilɛ gbɔmɛi kpakpai anine baanyɛ ashɛ nɔ wɔsɛɛ?

Robert: Kɛ́ nibii ehiŋ yɛ shikpɔŋ nɛɛ nɔ po lɛ, miheɔ miyeɔ akɛ gbɔmɛi kpakpai lɛ baaná amɛnyɔmɔwoo. Amɛbaaya ŋwɛi kɛ̃.

Marcus: Hiɛnɔkamɔ kpakpa nɛ. Biblia lɛ wieɔ bɔ ni ŋwɛi shihilɛ yɔɔ ha, kɛ hegbɛ ákɛ abaaya jɛmɛ lɛ he babaoo. Ani osusu nɔ ni mɛi ni yaa ŋwɛi lɛ baafee yɛ jɛmɛ lɛ he jogbaŋŋ?

Robert: Wɔkɛ Nyɔŋmɔ baahi shi, ni wɔbaajie eyi kɛya naanɔ.

Marcus: Gbɛkpamɔ ni sa jogbaŋŋ nɛ. Miishɛɛ sane ji akɛ, jeee hegbɛi ni mɛi ni baaya ŋwɛi lɛ náa lɛ pɛ he Biblia lɛ wieɔ, shi ewieɔ nitsumɔ ni he hiaa waa ni amɛbaatsu lɛ hu he.

Robert: Mɛni ji no?

Marcus: No ji nitsumɔ ni atsĩ tã yɛ Kpojiemɔ 5:10 lɛ, NW. Nakai kuku lɛ kɛɔ akɛ: “[Yesu] kɛ amɛ efee maŋtsɛmɛi kɛ osɔfoi eha wɔ-Nyɔŋmɔ lɛ, ni amɛaaye shikpɔŋ lɛ nɔ akɛ maŋtsɛmɛi.” Robert, ani oyɔse sɔ̃ ni baajwere mɛi ni baaya ŋwɛi lɛ anɔ?

Robert: Ŋmalɛ lɛ kɛɛ akɛ amɛbaaye shikpɔŋ lɛ nɔ akɛ maŋtsɛmɛi.

Marcus: Sane nɛɛ yɛ miishɛɛ waa, aloo okɛɛ?

Namɛi Anɔ Amɛbaaye?

Marcus: Belɛ, ani okɛ mi kpaaa gbee akɛ kɛ́ mɛi ni yaa ŋwɛi lɛ baaye nɔ akɛ maŋtsɛmɛi lɛ, no lɛ esa akɛ aná mɛi ni abaaye amɛ nɔ? Mɛɛ nɔyeli hu yɔɔ ni ebɛ shishibii?

Robert: Miina nɔ ni otaoɔ otsɔɔ lɛ.

Marcus: No hewɔ lɛ, sane ni sa bimɔ ji akɛ, Namɛi anɔ amɛbaaye?

Robert: Misusuɔ akɛ wɔbaaye mɛi ni yɔɔ shikpɔŋ nɛɛ nɔ, ni amrɔ nɛɛ amɛgboiko ni amɛbaaya ŋwɛi lɛ anɔ.

Marcus: Eji gbɔmɛi kpakpai fɛɛ baaya ŋwɛi kulɛ, saŋŋ. Shi náa nɔ kroko hu ni sa jogbaŋŋ ni esa akɛ wɔsusu he. Ani eeenyɛ efee akɛ mɛi komɛi—gbɔmɛi kpakpai komɛi—eyaŋ ŋwɛi?

Robert: Minuko pɛŋ akɛ Kristofonyo ko miiwie akɛ eheɔ enɛ eyeɔ.

 Marcus: Mibi sane nɛɛ yɛ nɔ ni wɔkaneɔ yɛ Lala 37:29 lɛ hewɔ. Ofainɛ, bɛ obaasumɔ ni okane ŋmalɛ nɛɛ?

Robert: Ojogbaŋŋ. Ekaneɔ akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”

Marcus: Oyiwaladɔŋŋ. Ani okadi he ni gbɔmɛi kpakpai babaoo baahi lɛ?

Robert: Ŋmalɛ lɛ kɛɛ amɛbaahi shikpɔŋ lɛ nɔ.

Marcus: Nakai pɛpɛɛpɛ—ni jeee be kukuoo ko pɛ kɛkɛ. Kadimɔ akɛ ŋmalɛ lɛ kɛɛ: “Amɛaahi nɔ daa.”

Robert: Ekolɛ, no tsɔɔ akɛ gbɔmɛi kpakpai komɛi baahi shikpɔŋ lɛ nɔ be fɛɛ be. Kɛ́ wɔgboi ni wɔtee ŋwɛi lɛ, gbɔmɛi kpakpai krokomɛi ni afɔɔ lɛ bayeɔ wɔsɛɛ.

Marcus: Ekolɛ, mɛi babaoo baatsɔɔ ŋmalɛ nɛɛ shishi nakai. Shi, ani eeenyɛ efee akɛ ŋmalɛ nɛɛ hiɛ shishinumɔ kroko kwraa yɛ enɛ he? Ani ŋmalɛ nɛɛ etsɔɔɔ moŋ akɛ gbɔmɛi kpakpai lɛ diɛŋtsɛ ji mɛi ni baahi shikpɔŋ lɛ nɔ kɛya naanɔ?

Robert: Efeee mi akɛ miinu bo shishi.

Shikpɔŋ lɛ Baatsɔ Paradeiso Wɔsɛɛ

Marcus: Ojogbaŋŋ, susumɔ nɔ ni Biblia lɛ fã kroko hu kɛɔ yɛ bɔ ni shihilɛ lɛ baafee wɔsɛɛ yɛ shikpɔŋ lɛ nɔ lɛ he okwɛ. Ha wɔkane Kpojiemɔ 21:4 lɛ. Ŋmalɛ lɛ kɛɔ yɛ mɛi ni baahi shi nakai beaŋ lɛ ahe akɛ: “Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” Ani jeee gbɛkpamɔ ni nɔ bɛ nɛ?

Robert: Hɛɛ. Shi misusuɔ akɛ ŋmalɛ nɛɛ miiwie bɔ ni shihilɛ lɛ baaji yɛ ŋwɛi lɛ he.

Marcus: Ojogbaŋŋ, eji anɔkwale akɛ mɛi ni baaya ŋwɛi lɛ baaná jɔɔmɔi ni tamɔ nakai. Shi, kwɛmɔ ŋmalɛ lɛ shi kome ekoŋŋ. Mɛni ŋmalɛ lɛ kɛɛ abaafee gbele?

Robert: Ekɛɛ, “gbele bɛ dɔŋŋ.”

Marcus: Nakai pɛpɛɛpɛ. Miheɔ miyeɔ akɛ okɛ mi baakpã gbee akɛ, dani abaakɛɛ akɛ nɔ ko bɛ dɔŋŋ loo ehiŋ shi dɔŋŋ lɛ, belɛ no tsɔɔ akɛ nii lɛ yɛ shihilɛ mli.

Robert: Nakai ni.

Marcus: Shi agboko yɛ ŋwɛi pɛŋ, aloo? Shikpɔŋ nɛɛ nɔ pɛ agboɔ yɛ.

Robert: Efeɔ mi akɛ, esa akɛ masusu enɛ he.

Marcus: Robert, ole nɔ ko, Biblia lɛ tsɔɔ akɛ gbɔmɛi kpakpai komɛi baaya ŋwɛi, shi mɛi babaoo hu baahi shi kɛya naanɔ yɛ shikpɔŋ nɛɛ nɔ. Anɔkwa, miheɔ miyeɔ akɛ, onu wiemɔ ni ehe shi waa nɛɛ pɛŋ: “Ajɔɔ mɛi ni he jɔ lɛ; shi shikpɔŋ lɛ aaatsɔ amɛnɔ.”—Mateo 5:5, Ga Biblia hee.

Robert: Hɛɛ, minu ni akane ŋmalɛ nɛɛ shii abɔ yɛ sɔlemɔ.

Marcus: Kɛ́ shikpɔŋ lɛ aaatsɔ mɛi ni he jɔ lɛ anɔ lɛ, ani no etsɔɔɔ akɛ mɛi komɛi baahi shikpɔŋ lɛ nɔ? Mɛi ni baahi shikpɔŋ lɛ nɔ lɛ baaná shihilɛ ni awie he yɛ Kpojiemɔ wolo lɛ mli lɛ mli gbɛfaŋ nɔ. Amɛbaana bɔ ni abaatsake wɔshikpɔŋ nɛɛ hiɛ kwraa lɛ, ejaakɛ Nyɔŋmɔ baajie nibii fɛɛ ni ehiii lɛ kɛya—ebaajie gbele tete po.

Robert: Miina nɔ ni otaoɔ otsɔɔ lɛ, shi efeee mi akɛ esa akɛ odamɔ ŋmalɛ kome loo enyɔoo ko kɛkɛ nɔ omu sane naa nakai.

Marcus: Jeee nakai ji sane lɛ. Anɔkwa, ŋmalɛi babaoo yɛ ni wieɔ bɔ ni shihilɛ lɛ baaji aha yɛ shikpɔŋ nɛɛ nɔ wɔsɛɛ lɛ he. Mileee akɛ oyɛ be lo, kulɛ masumɔ ni matsɔɔ bo ŋmalɛi ni minyaa he waa lɛ ateŋ ekome.

Robert: Hɛɛ, miyɛ minitii fioo ko.

“Mɔ Fɔŋ lɛ Bɛ [loo Ehiŋ Shi] Dɔŋŋ”

Marcus: Mra mli lɛ, wɔkane Lala 37 kuku 29 lɛ. Ha wɔkwɛ nakai ŋmalɛ lɛ shi kome ekoŋŋ. Shi, be nɛɛ mli lɛ, wɔbaakane kukuji 10 kɛ 11 lɛ. Ofainɛ, bɛ obaasumɔ ni okane?

Robert: Aahu. “Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ́ okwɛ eshihilɛhe lɛ, ebɛ jɛi. Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.”

 Marcus: Oyiwaladɔŋŋ. Taakɛ kuku 11 lɛ tsɔɔ lɛ, nɛgbɛ “mɛi ni he jɔ,” loo gbɔmɛi kpakpai lɛ baahi?

Robert: Ekɛɛ “shikpɔŋ lɛ aaatsɔ̃ amɛnɔ̃.” Kɛlɛ, minuɔ he akɛ ŋmalɛ nɛɛ kɔɔ amrɔ nɛɛ shihilɛ lɛ he; ejaakɛ, gbɔmɛi kpakpai yɛ shikpɔŋ lɛ nɔ ŋmɛnɛ.

Marcus: Eji anɔkwale. Shi, kadimɔ hu akɛ kuku lɛ ni wɔkane lɛ kɛɛ akɛ amɛmii aaashɛ amɛhe yɛ “hejɔlɛ babaoo mli.” Wɔnáaa hejɔlɛ babaoo yɛ shikpɔŋ lɛ nɔ ŋmɛnɛ, aloo?

Robert: Dabi, hejɔlɛ bɛ.

Marcus: No hewɔ lɛ, te shiwoo nɛɛ aaafee tɛŋŋ aba mli lɛ? Ekolɛ, manyɛ mikɛ sane nɛɛ ato he aha bo: Ŋɔɔ lɛ akɛ oyɛ shĩa ko ni okɛhai. Mɛi ni ebahi shĩa lɛ ateŋ mɛi komɛi lɛ gbɔmɛi kpakpai ji amɛ—amɛkwɛɔ amɛtsũi lɛ jogbaŋŋ, ni amɛkɛ akutsoŋbii lɛ yeɔ jogbaŋŋ. Oyɛ he miishɛɛ waa akɛ okɛ tsũ lɛ eha amɛ akɛ amɛhi mli. Shi mɛi ni yɔɔ shĩa lɛ ateŋ mɛi komɛi hu asu ehiii kwraa; amɛfiteɔ nibii yɛ shĩa lɛ, ni amɛsuɔ akutsoŋbii lɛ atsui. No hewɔ lɛ, kɛ́ mɛi ni sui ehiii kwraa nɛɛ kpoo akɛ amɛaatsake amɛjeŋba lɛ, mɛni obaafee?

Robert: Mafã amɛ yɛ shĩa lɛ.

Marcus: Nakai pɛpɛɛpɛ Nyɔŋmɔ baafee gbɔmɛi fɔji ni wɔkɛyɔɔ ŋmɛnɛ lɛ. Kwɛmɔ kuku 10 lɛ ekoŋŋ. Ekɛɛ: “Mɔ fɔŋ lɛ bɛ [loo ehiŋ shi] dɔŋŋ.” Wɔbaanyɛ wɔkɛɛ akɛ, Nyɔŋmɔ “baafã” mɛi fɛɛ ni haaa mɛi krokomɛi ahe ajɔ amɛ lɛ kɛjɛ shikpɔŋ nɛɛ nɔ. Kɛkɛ lɛ, gbɔmɛi kpakpai lɛ baanyɛ ahi shikpɔŋ nɛɛ nɔ yɛ hejɔlɛ mli. Efeɔ mi akɛ ekolɛ, susumɔ ákɛ gbɔmɛi kpakpai baahi shikpɔŋ nɛɛ nɔ kɛya naanɔ lɛ yɛ srɔto kwraa yɛ nɔ ni atsɔɔ bo be ko ni eho lɛ he.

Robert: Eji anɔkwale, minuko sane nɛɛ pɛŋ yɛ misɔlemɔ lɛ.

Marcus: Tamɔ okɛɛ kɛtsɔ hiɛ lɛ, esaaa akɛ adamɔɔ ŋmalɛ kome loo enyɔoo ko kɛkɛ nɔ amuɔ sane naa yɛ nɔ ni wɔsusuɔ he nɛɛ he. Lɛlɛŋ, ehe miihia ni wɔpɛi nɔ ni Biblia muu lɛ fɛɛ kɛɔ yɛ gbɔmɛi kpakpai awɔsɛɛ shihilɛ he lɛ mli. Shi, yɛ ŋmalɛi ni wɔsusu he ŋmɛnɛ lɛ anaa lɛ, ani osusuɔ akɛ eeenyɛ eba akɛ gbɔmɛi kpakpai komɛi baaya ŋwɛi, koni yɛ nakai beaŋ nɔŋŋ lɛ gbɔmɛi kpakpai komɛi hu ahi shikpɔŋ nɛɛ nɔ kɛya naanɔ?

Robert: Minyɛɛɛ matsɔɔ. Shi etamɔ nɔ ni nakai ji bɔ ni ŋmalɛi ni oha wɔkane lɛ tsɔɔ. Esa akɛ maya nɔ masusu he lolo.

Marcus: Beni oyaa nɔ osusuɔ sane lɛ he lɛ, ekolɛ sanebimɔi krokomɛi baaba ojwɛŋmɔŋ. Akɛ nɔkwɛmɔnɔ lɛ, ekolɛ obaabi akɛ, ni gbɔmɛi kpakpai ni hi shi dani wɔbeaŋ nɛɛ hu? Ani amɛ fɛɛ amɛtee ŋwɛi? Kɛ́ jeee nakai ji sane lɛ, nɛgbɛ amɛyɔɔ amrɔ nɛɛ?

Robert: Sanebimɔi nɛɛ sa jogbaŋŋ.

Marcus: Ekolɛ, manyɛ mafee nibii enyɔ komɛi maha bo. Klɛŋklɛŋ lɛ, ha maŋmala ŋmalɛi fioo komɛi ni kɔɔ sane nɛɛ he lɛ maha bo. * Nɔ ni ji enyɔ lɛ, masumɔ ni beni oná be kɛkane ŋmalɛi nɛɛ, ni ojwɛŋ nɔ ogbe naa sɛɛ lɛ maku misɛɛ maba ni wɔsusu he. Ani nakai baahi aha bo?

Robert: Hɛɛ, ebaahi nakai. Oyiwaladɔŋŋ.—w12-E 8/1.

[Shishigbɛ niŋmaa]