Abɔi wolo ni okaneɔ nɛɛ kalamɔ kɛjɛ July 1879 tɔ̃ɔ. Nibii etsake kwraa kɛjɛ nakai beaŋ kɛbaa—ni nakai pɛpɛɛpɛ eji hu yɛ wolo nɛɛ gbɛfaŋ. (Kwɛmɔ mfoniri ni yɔɔ yiteŋgbɛ lɛ.) Kɛjɛ wolo ni ohiɛ nɛɛ nɔ kɛyaa lɛ, obaayɔse tsakemɔi krokomɛi ni afee yɛ Buu-Mɔɔ lɛ he. Mɛɛ tsakemɔi obaana?

Yɛ maji babaoo anɔ lɛ, mɛi babaoo yataoɔ saji yɛ Intanɛt lɛ nɔ, ni amɛnáa enɛ feemɔ he miishɛɛ. Ewaaa kwraa akɛ amɛbaaná sane ni amɛtaoɔ lɛ yɛ hei srɔtoi yɛ Intanɛt lɛ nɔ pɛ. Woji henɔi srɔtoi kɛ adafitswaa woji babaoo yɛ ni abaanyɛ akane yɛ Intanɛt lɛ nɔ.

Akɛni mɛi babaoo sumɔɔ ni amɛkane nii yɛ Intanɛt lɛ nɔ hewɔ lɛ, nyɛsɛɛ nɛɛ lɛ wɔtsake wɔ-Wɛb saiti ni ji www.pr418.com lɛ hiɛ kwraa bɔni afee ni mɛi anya he koni ekɛ nitsumɔ hu afee mlɛo. Mɛi ni yaa wɔ-Wɛb saiti lɛ nɔ lɛ baanyɛ amɛyakane woji srɔtoi ni afee yɛ wiemɔi ni fa fe 430 amli. Kɛlɛ kɛjɛ nyɔɔŋ nɛɛ nɔ kɛyaa lɛ, mɛi ni yaa wɔ-Wɛb saiti lɛ nɔ lɛ baanyɛ amɛyakane saji komɛi ni kulɛ wɔkalaa yɛ wɔwoji lɛ amli, shi amrɔ nɛɛ akɛbaawo Intanɛt lɛ pɛ nɔ lɛ. *

Akɛni wɔkɛ saji babaoo baawo Intanɛt lɛ pɛ nɔ hewɔ lɛ, abaatse Buu-Mɔɔ ni akɛhaa maŋbii lɛ baafãi lɛ anɔ kɛjɛ 32 kɛba 16, ni akɛ nɔ ni ohiɛ nɛɛ miije shishi. Amrɔ nɛɛ, akalaa Buu-Mɔɔ lɛ yɛ wiemɔi 204 amli. Akɛni Buu-Mɔɔ ni akɛhaa maŋbii lɛ eko fɛɛ eko ni baaje kpo lɛ mli saji lɛ faŋ tsɔ hewɔ lɛ, abaanyɛ atsɔɔ shishi kɛya wiemɔi srɔtoi babaoo amli.

Wɔgbɛkpamɔ ji akɛ tsakemɔi nɛɛ baaha wɔnyɛ wɔkɛ Biblia mli sane ni hereɔ mɔ yiwala lɛ aha mɛi babaoo. Wɔtswa wɔfai shi akɛ wɔbaaya nɔ wɔkɛ saji kpakpai ni baaha mɛi ale nibii babaoo ni amɛnya he lɛ awo wɔwoji lɛ amli kɛ Intanɛt lɛ nɔ, koni mɛi babaoo ni kaneɔ, ni yɔɔ bulɛ kɛha Biblia lɛ, ni miisumɔ ni amɛle nɔ ni Biblia lɛ tsɔɔ diɛŋtsɛ lɛ aná he sɛɛ.

Mɛi ni Fee