Ani obaanyɛ okai gbi nɔ ni afɔ obi lɛ? Ekã shi faŋŋ akɛ ohe tswa shi waa koni owo abifao lɛ. Yɛ fɔlɔi tamɔ Carlo kɛ Mia gbɛfaŋ lɛ, amɛmiishɛɛ lɛ batsɔ haomɔ beni aha amɛle akɛ amɛbi lɛ eje kpa lɛ.

Ani oyɛ bi ko ni eje kpa? Kɛ́ nakai ni lɛ, ekolɛ obaashwie oyiŋ akɛ ‘ani manyɛ makpee naa lo?’ Onijiaŋ akaje wui. Fɔlɔi tamɔ bo enyɛ ekpee shihilɛi nɛɛ anaa. Susumɔ naagbai etɛ ni fɔɔ kaa ni obaanyɛ okɛkpe, kɛ bɔ ni Biblia mli nilee baanyɛ aye abua bo kɛkpee naa lɛ he okwɛ.

Fɔlɔi babaoo atsui yeɔ waa kɛ́ amɛná amɛle akɛ amɛbi eje kpa. Juliana, mami ko ni yɔɔ Mexico lɛ  kɛɛ akɛ: “Beni datrɛfoi lɛ kɛɛ mi akɛ wɔbi Santiago ená hela ko ni haaa gbɔmɔtso lɛ fãi komɛi atsu nii jogbaŋŋ lɛ, minu he akɛ je lɛ miikpa abu minɔ.” Mɛi komɛi hu baanu he tamɔ Villana, yoo ko ni jɛ Italia lɛ nu he lɛ. Ekɛɛ akɛ: “Mihala akɛ mafɔ, tsɛ mile akɛ afii abɔ ni miye hewɔ lɛ, eyɛ oshara akɛ mafɔ. Amrɔ nɛɛ mibinuu lɛ etsɔ helatsɛ, ni kɛ́ hela lɛ bɔi enaagbamɔ lɛ minuɔ fɔyeli he waa.”

Kɛ́ onijiaŋ je wui loo onu fɔyeli he lɛ, ná ole akɛ bɔ ni onuɔ he lɛ jeee nɔ ko srɔto ko. Nyɔŋmɔ ebɔɔɔ adesa koni ehe aye. (1 Mose 1:27, 28) Ebɔɔɔ fɔlɔi koni kɛ́ amɛkɛ shihilɛ ko ni ehiii kpe lɛ, amɛná lɛ mlɛo. Yɛ gbɛ ko nɔ lɛ, ekolɛ obaaye “awerɛho” yɛ obi lɛ hela hewɔ. Ná ole akɛ ebaahe be dani obaanyɛ oye ohenumɔi anɔ, koni onyɛ okɛ ohe awo shihilɛ hee ni oyaje mli lɛ mli.

Ni kɛ́ onu he akɛ bo oha obi lɛ je kpa hu? Kaimɔ akɛ mɔ ko kwraa bɛ ni baanyɛ atsɔɔ nɔ tuuntu hewɔ ni akɛ hela ko fɔɔ mɔ, loo bɔ ni feɔ ni he ni mɔ ko yɔɔ kɛ nibii krokomɛi saa gbekɛ ko hewalɛnamɔ he lɛ. Yɛ gbɛ kroko nɔ lɛ, ekolɛ obaanu he akɛ esa akɛ oshwa ohefatalɔ lɛ. Kaafee nakai kɔkɔɔkɔ. Esa akɛ okɛ ohefatalɔ lɛ afee ekome kɛsusu bɔ ni nyɛbaafee nyɛkwɛ gbekɛ lɛ he.—Jajelɔ. 4:9, 10.

ŊAAWOO: Kasemɔ obi lɛ shihilɛ lɛ he nii. Biblia lɛ kɛɔ akɛ: “Nilee akɛmaa tsu, ni niiashishinumɔ akɛhaa emaa shi.”—Abɛi 24:3, Ga Biblia hee.

Obaanyɛ okase nii babaoo kɛjɛ datrɛfoi adɛŋ, kɛ woji hu ni anyɛɔ akɛhe fɔ̃ɔ nɔ lɛ amli. Obaanyɛ okɛ obi lɛ hela lɛ he nii ni okaseɔ lɛ ato wiemɔ hee ko kasemɔ he. Shishijee lɛ, onáŋ lɛ mlɛo, shi obaanyɛ okase koni ole.

Carlo kɛ Mia ni awie amɛhe yɛ shishijee gbɛ lɛ bi gbɛtsɔɔmɔi kɛjɛ amɛdatrɛfoi adɛŋ, ni amɛbi yelikɛbuamɔ hu kɛjɛ nitsumɔhei ni he esa kɛ hela nɛɛ he nitsumɔ lɛ adɛŋ. Amɛkɛɛ akɛ: “Enɛ ni wɔfee lɛ ye ebua wɔ ni wɔnu naagba ni hela lɛ kɛbaa lɛ shishi, ni eha wɔná ‘jwɛŋmɔ ni ja’ hu yɛ hela lɛ he. Wɔna akɛ wɔbinuu lɛ baanyɛ ahi shi ni efee nɔ fɛɛ nɔ pɛpɛɛpɛ yɛ nibii babaoo amli. Enɛ ha wɔtsui nyɔ wɔmli waa.”

Ekolɛ, obaanu he akɛ obi helatsɛ lɛ kwɛmɔ gbalaa omli waa. Jenney, yoo ko ni jɛ New Zealand lɛ kɛɛ akɛ: “Afii fioo komɛi asɛɛ beni ana akɛ hela ko ni haa gbɛ bakãa mliteŋ wu lɛ mli lɛ miigba mibinuu lɛ naa lɛ, kɛ́ ebalɛ akɛ matsu nibii krokomɛi kɛfata nɔ ni mitsuɔ momo yɛ shĩa lɛ he lɛ, etɔɔ mi waa, ni mifoɔ.”

Naagba kroko hu ji akɛ, ekolɛ onuɔ he akɛ mɛi etse amɛhe kɛjɛ ohe. Ben yɛ binuu ko ni hela ko eha efaji amli egbɔjɔ, kɛ ekroko hu ni haaa enyɛ ekɛ mɛi krokomɛi ashara. Ben kɛɛ akɛ: “Mɛi babaoo nuŋ shihilɛ mli ni wɔyɔɔ lɛ shishi jogbaŋŋ.” Ekolɛ obaasumɔ ni okɛ mɔ ko awie he. Kɛlɛ, onanemɛi lɛ ateŋ babaoo abii yɛ hewalɛ. No hewɔ lɛ, oshashaoɔ shi akɛ obaaha amɛle bɔ ni onuɔ he ohaa.

ŊAAWOO: Bi yelikɛbuamɔ. Kpɛlɛmɔ wamɔ ni akɛbaaha bo lɛ nɔ. Juliana ni wɔtsĩ etã kɛtsɔ hiɛ lɛ kɛɛ akɛ: “Bei komɛi lɛ, mi kɛ miwu hiɛ gboɔ akɛ wɔbaabi yelikɛbuamɔ.” Ekɛfata he akɛ: “Wɔna akɛ mɛi krokomɛi ayelikɛbuamɔ he miihia wɔ. Kɛ́ mɛi ye amɛbua wɔ lɛ, wɔnuuu he akɛ wɔhe efee shoo.” Kɛ́ atee henaabuamɔ ko loo Kristofoi akpee shishi ni onaanyo loo wekunyo ko ni bɛŋkɛ kpaakpa lɛ bi koni ekɛ obi lɛ ata shi lɛ, okɛ hiɛsɔɔ akpɛlɛ nɔ. Biblia abɛ ko kɛɛ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi ha haomɔ be.”—Abɛi 17:17.

Kwɛmɔ ohewalɛnamɔ nɔ jogbaŋŋ. Bɔ ni ehe hiaa ni daa nɛɛ akɛ pɛtro awo ambolans mli bɔni afee ni enyɛ ekɛ helatsɛmɛi aya helatsamɔhe lɛ, nakai esa akɛ oye niyenii ni hewalɛ yɔɔ mli, ogbɔle okpɔiaŋ, ni ojɔɔ ohe bɔni afee ni oná hewalɛ ni oya nɔ okwɛ obi lɛ jogbaŋŋ. Javier ni yɔɔ binuu obubuafo lɛ kɛɛ akɛ: “Mibinuu lɛ nyɛɛɛ anyiɛ no hewɔ lɛ, minuɔ he akɛ esa akɛ mabɔ mɔdɛŋ maye nii jogbaŋŋ. Ejaakɛ mi nɔŋŋ mikɛ lɛ yaa kɛ baa. Minane ji enane!”

Te obaafee tɛŋŋ oná be kɛkwɛ ohewalɛnamɔ nɔ lɛ? Fɔlɔi komɛi toɔ naa kɛkwɛɔ amɛbi lɛ. No haa mɔ kome náa be kɛjɔɔ ehe loo ekɛfeɔ ehewɔŋ nibii krokomɛi. Ehe baahia ni okwa nibii komɛi ni amɛhe ehiaaa lɛ bɔni afee ni oná be oha ohe, ni enɛ feemɔ bɛ mlɛo. Shi taakɛ Mayuri, yoofɔyoo ko ni jɛ India lɛ kɛɛ lɛ, “Fiofio lɛ, obaaná enɛ feemɔ mlɛo.”

Okɛ onaanyo ko ni onyɛɔ omuɔ ofɔ̃ɔ enɔ lɛ agba he sane. Nanemɛi po ni amɛbii jeee helatsɛmɛi lɛ baanyɛ ashɛje omii. Obaanyɛ okɛ Yehowa agba sane  yɛ sɔlemɔ mli. Ani sɔlemɔ baanyɛ atsu nɔ ko? Yazmin ni yɔɔ bii enyɔ ni miiye hela ko tamɔ fɛ̃fɛ̃ henɔ lɛ kɛɛ akɛ: “Bei komɛi lɛ, shihilɛ lɛ mli waa aahu akɛ minuɔ he tamɔ nɔ ni miihe magbo.” Kɛlɛ ekɛfata he akɛ: “Misɔleɔ mibiɔ Yehowa koni eha mihe ajɔ mi, ni ewaje mi hu. No sɛɛ lɛ, minuɔ he akɛ manyɛ matsu sɔ ni kã mi nɔ lɛ.”—Lala 145:18.

Hela ni gbaa gbekɛ ko naa lɛ baanyɛ asa niyenii ni weku lɛ baaye, hei ni weku lɛ baaya, kɛ bei abɔ ni fɔlɔi lɛ náa amɛhaa bii lɛ ateŋ mɔ fɛɛ mɔ he lɛ ahe. Enɛ baanyɛ aha bii krokomɛi lɛ anu he akɛ akpoo amɛ. Kɛfata he lɛ, bi helatsɛ kwɛmɔ baanyɛ ahé fɔlɔi abe aahu akɛ naagba baaba amɛgbãla lɛ mli. Lionel, tsɛ ko ni yɔɔ Liberia lɛ kɛɛ akɛ: “Bei komɛi lɛ miŋa kɛɔ akɛ mishi wɔbi lɛ kwɛmɔ miwo ekome too edɛŋ, ni miwaaa lɛ kwraa. Enɛ haa minuɔ he akɛ ebuuu mi, ni no haa bei komɛi lɛ mikɛ lɛ wieɔ bɔ ni esaaa.”

ŊAAWOO: Bɔni afee ni obii lɛ fɛɛ aná nɔmimaa akɛ osusuɔ amɛhe lɛ, too nifeemɔi komɛi ni amɛnyaa he lɛ ahe gbɛjianɔ koni nyɛ fɛɛ nyɛná mli gbɛfaŋnɔ. Jenney ni wɔtsĩ etã kɛtsɔ hiɛ lɛ kɛɛ akɛ: “Bei komɛi lɛ, wɔfeɔ nɔ ko krɛdɛɛ ko wɔhaa wɔbinuu nukpa lɛ, kɛ́ ebalɛ po akɛ wɔya wɔyaye nii yɛ niyelihe ko ni esumɔɔ waa lɛ, wɔfeɔ nakai.”

Bɔni afee ni obaa ogbala lɛ yi lɛ, okɛ ohefatalɔ lɛ agba sane ni okɛ lɛ asɔle hu. Aseem, tsɛ ko ni jɛ India lɛ kɛɛ akɛ: “Eyɛ mli akɛ bei komɛi lɛ, mikɛ miŋa nuɔ he akɛ etɔ wɔ bliboo, ni wɔhaoɔ moŋ, kɛlɛ wɔtoɔ gbɛjianɔ ni wɔtaa shi wɔgbaa sane, ni wɔfeɔ ekome kɛsɔleɔ. Wɔfeɔ ekome kɛsusuɔ Biblia mli ŋmalɛ ko he daa leebi dani wɔbii lɛ teɔ shi yɛ saa mli.” Gbalashihilɛ mli hefatalɔi krokomɛi hu kɛ amɛhe gbaa sane dani amɛyakamɔɔ shi. Saji ni nyɛ sɔŋŋ nyɛgbaa, kɛ nyɛtsuiiaŋ ni nyɛjɛɔ nyɛsɔleɔ lɛ baawaje nyɛgbãla lɛ bei amli ni nyɛhao waa lɛ. (Abɛi 15:22) Gbalashihilɛ mli hefatalɔi ko kɛɛ akɛ: “Bei ni wɔkaiɔ fe fɛɛ yɛ wɔshihilɛ mli akɛ wu kɛ ŋa ji bei ni wɔkɛ shihilɛi ni mli wawai fe fɛɛ kpe.”

Biblia lɛ woɔ shi akɛ etsɛŋ kwraa Nyɔŋmɔ baajie hela fɛɛ hela kɛ kpajee fɛɛ ni gbaa onukpai kɛ gbekɛbii fɛɛ anaa lɛ kɛje shihilɛ mli kwraa kɛya. (Kpojiemɔ 21:3, 4) No beaŋ lɛ, “maŋbii lɛ ateŋ mɔ ko ekɛŋ akɛ: Migbɔjɔ [loo mibɛ hewalɛ]!” *—Yesaia 33:24.

Eyɛ mli akɛ oyɛ bi ni eje kpa moŋ nɛ, shi amrɔ nɛɛ po lɛ, obaanyɛ oye omanye. Carlo kɛ Mia ni atsĩ amɛtã kɛtsɔ hiɛ lɛ kɛɛ akɛ: “Kɛ́ efee tamɔ nibii eyaaa lɛ jogbaŋŋ po lɛ, kaaha onijiaŋ miije wui. Gbalamɔ ojwɛŋmɔ kɛya nibii kpakpai babaoo ni obi lɛ feɔ lɛ anɔ.”