Suɔmɔ tsɔɔ henumɔ ni mli wa ni ajieɔ lɛ kpo atsɔɔ mɛi krokomɛi. Kɛ́ mɔ ko sumɔɔ mɔ lɛ, etsɔɔ ewiemɔi kɛ enifeemɔi anɔ ejieɔ ehenumɔi akpo etsɔɔ mɛi ni esumɔɔ amɛsane lɛ, ekɔɔɔ he eko kɛ́ nakai feemɔ baabi ni ekɛ nɔ ko ashã afɔle po.

Mose tsɔɔ akɛ esumɔɔ Nyɔŋmɔ. Yɛ mɛɛ gbɛ nɔ? Ojogbaŋŋ, kaimɔ wiemɔi ni yɔɔ 1 Yohane 5:3 lɛ, ekɛɔ akɛ: “Ejaakɛ enɛ ji Nyɔŋmɔ suɔmɔ lɛ, akɛ wɔye ekitai lɛ anɔ.” Akɛni Mose sumɔɔ Nyɔŋmɔ hewɔ lɛ, eye ekitai lɛ anɔ. Nɔ fɛɛ nɔ ni Nyɔŋmɔ fã Mose akɛ efee lɛ, efee; kɛjɛ nitsumɔ ni bɛ mlɛo ni akɛwo edɛŋ akɛ ekɛ Farao ni yɔɔ gbɛnaa wulu lɛ ayawie lɛ nɔ, kɛyashi nitsumɔ ni waaa tsɔ, ni ji etso ni akɛɛ ekpã mli kɛtsɔɔ Ŋshɔ Tsuru lɛ nɔ. Kɛ́ fãmɔ ni akɛha Mose lɛ nɔyeli wa jio, ewaaa jio lɛ, eye nɔ. ‘Efee bɔ ni afã lɛ lɛ pɛpɛɛpɛ.’—2 Mose 40:16, Ga Biblia hee.

Mose jie suɔmɔ kpo etsɔɔ enyɛmimɛi Israelbii lɛ. Amɛyɔse akɛ Yehowa kɛ Mose miitsu nii akɛ amɛhiɛnyiɛlɔ, no hewɔ lɛ amɛkɛ amɛnaagbai srɔtoi baa Mose hiɛ. Wɔkaneɔ akɛ: “Maŋ lɛ damɔ Mose nɔ kɛjɛ leebileebi kɛyashi gbɛkɛ.” (2 Mose 18:13-16) Kwɛ bɔ ni ekolɛ ebaatɔ Mose eha, beni Israelbii lɛ kɛ lɛ ewie gbi muu fɛɛ ni ebo amɛ toi egbe naa lɛ! Kɛlɛ, akɛni Mose sumɔɔ amɛ hewɔ lɛ, ená he miishɛɛ akɛ ebaaye ebua amɛ.

Mose fee toi eha esuɔlɔi lɛ, ni esɔle hu eha amɛ. Esɔle po eha mɛi ni tɔ̃ enɔ lɛ! Akɛ nɔkwɛmɔnɔ lɛ, beni Mose nyɛmiyoo Miriam wie huhuuhu eshi Mose lɛ, Yehowa ha kpiti shwie Miriam. Nɔ najiaŋ ni Mose mii baashɛ ehe akɛ agbala Miriam toi lɛ, oya nɔŋŋ kɛkɛ ni edamɔ mli eha lɛ, esɔle akɛ: “Oo Nyɔŋmɔ, ofainɛ, tsá lɛ!” (4 Mose 12:13) Kɛ́ jeee suɔmɔ ha Mose jɛ etsuiŋ esɔle nɛkɛ lɛ, belɛ mɛni dɔŋŋ?

Suɔmɔ krɔŋŋ ni wɔbaaná wɔha Nyɔŋmɔ lɛ baaha wɔnyɛ wɔkase Mose. Suɔmɔ ni tamɔ nɛkɛ lɛ tsirɛɔ wɔ koni ‘wɔjɛ wɔtsuiaŋ’ wɔbo ekitai lɛ atoi. (Romabii 6:17) Kɛ́ wɔjɛ wɔtsuiaŋ wɔbo Yehowa toi lɛ, wɔhaa etsui nyɔɔ emli. (Abɛi 27:11) Wɔ diɛŋtsɛ hu wɔnáa he sɛɛ. Ejaakɛ kɛ́ wɔkɛ suɔmɔ krɔŋŋ sɔmɔ Nyɔŋmɔ lɛ, jeee akɛ wɔbaafee nibii ni ja kɛkɛ, shi moŋ wɔbaaná nomɛi afeemɔ hu he miishɛɛ!—Lala 100:2.

Gbɛ kroko ni wɔbaanyɛ wɔtsɔ nɔ wɔkase Mose ji wɔhe ni wɔkɛbaashã afɔle wɔha mɛi krokomɛi. Kɛ́ wɔnanemɛi loo wekumɛi kɛ amɛnaagbai bafɔ̃ wɔhiɛ lɛ, esa akɛ suɔmɔ atsirɛ wɔ koni (1) wɔjɛ wɔtsuiŋ wɔbo amɛ toi jogbaŋŋ; (2) wɔkɛ wɔhe awo amɛshihilɛ mli loo wɔbɔ mɔdɛŋ wɔnu amɛshihilɛ lɛ shishi; ni (3) wɔfee nii kɛtsɔɔ akɛ wɔsusuɔ amɛhe.

Wɔbaanyɛ wɔsɔle wɔha wɔsuɔlɔi taakɛ Mose fee lɛ. Bei komɛi lɛ, kɛ́ amɛgba wɔ amɛnaagbai ni wɔnyɛŋ he nɔ ko wɔfee lɛ, ekolɛ wɔbaahao. Ekolɛ, wɔkɛ dɔlɛ baakɛɛ akɛ, “Edɔ mi waa, nɔ pɛ ni manyɛ mafee ji masɔle maha bo.” Shi kaimɔ akɛ: “Kɛ́ jalɔ sɔle lɛ, nakai sɔlemɔ lɛ yɛ hewalɛ waa.” (Yakobo 5:16, The Kingdom New Testament) Anɔkwa, wɔsɔlemɔi lɛ baanyɛ aha Yehowa afee nɔ ko aha mɔ lɛ, ni ekolɛ kɛ́ jeee wɔsɔlemɔ lɛ kulɛ efeŋ. Kɛ́ nakai ni lɛ, belɛ mɛɛ nɔ kpakpa po wɔbaanyɛ wɔfee wɔha wɔsuɔlɔi akɛ ja wɔsɔle wɔha amɛ? *

Ani okpɛlɛɛɛ nɔ akɛ wɔbaanyɛ wɔkase nibii babaoo yɛ Mose dɛŋ? Tsɛ eji gbɔmɔ adesa tamɔ wɔ nɔŋŋ moŋ, kɛlɛ efee hemɔkɛyeli, heshibaa, kɛ suɔmɔ he nɔkwɛmɔnɔ ni sa kadimɔ jogbaŋŋ efɔ̃ shi eha wɔ. Babaoo ni wɔkaseɔ enɔkwɛmɔnɔ lɛ jogbaŋŋ lɛ, babaoo ni wɔ kɛ mɛi krokomɛi náa he sɛɛ ji no.—Romabii 15:4.