“Efeɔ mi akɛ naagba ni miibɔ mɔdɛŋ waa akɛ maye nɔ lɛ ji bɔ ni bei pii lɛ, minuɔ he akɛ misaaa, ni no hewɔ lɛ minyɛŋ matsi mabɛŋkɛ Nyɔŋmɔ lɛ.” Nakai ji bɔ ni yoo ko ni ebawa kɛha lɛ akɛ ebaahe eye akɛ Yehowa baanyɛ aná yiŋtoo ko nɔ edamɔ esusu ehe lɛ kɛɛ. Ani bo hu onuɔ he nakai? Kɛ́ nakai lɛ, ekolɛ obaabi ohe akɛ, ‘Ani Yehowa susuɔ mɛi ni jáa lɛ lɛ ahe ákɛ aŋkroaŋkroi?’ Hetoo lɛ ji hɛɛ! Wɔnaa odaseyeli ni tsɔɔ akɛ Yehowa susuɔ wɔhe akɛ aŋkroaŋkroi lɛ yɛ sane ko ni Yesu wie lɛ mli.—Kanemɔ Yohane 6:44.

Mɛni Yesu, mɔ ni le Yehowa sui kɛ esuɔmɔnaa nii jogbaŋŋ fe mɔ fɛɛ mɔ lɛ kɛɛ? (Luka 10:22) Yesu tsɔɔ mli akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” No hewɔ lɛ, wɔnyɛŋ wɔbatsɔmɔ Kristo sɛɛnyiɛlɔi—kɛ wɔŋwɛi Tsɛ Yehowa jálɔi—ja Yehowa diɛŋtsɛ egbala wɔ dã. (2 Tesalonikabii 2:13) Kɛ́ wɔnu nɔ ni Yesu tsɔɔ lɛ shishi lɛ, wɔbaana odaseyeli ni mli wa diɛŋtsɛ yɛ ewiemɔ lɛ mli ni tsɔɔ akɛ Nyɔŋmɔ susuɔ wɔhe ákɛ aŋkroaŋkroi.

Mɛni wiemɔ ni ji Yehowa gbalaa wɔ lɛ tsɔɔ? Akɛ Hela feemɔ wiemɔ ni atsɔɔ shishi akɛ “gbalaa” lɛ hu tsuɔ nii kɛtsɔɔ yaa ni edu loi ni aagbala lɛ mli. (Yohane 21:6, 11) Ani Yehowa gbalaa wɔ yɛ nɔnyɛɛ naa, ni tsɔɔ akɛ enyɛɔ wɔnɔ koni wɔsɔmɔ lɛ? Dabida. Yehowa ha wɔ hegbɛ koni wɔfee nɔ ni wɔsumɔɔ, no hewɔ lɛ, ekɛ nɔnyɛɛ gbeleee wɔtsuii anaa. (5 Mose 30:19, 20) Woloŋlelɔ ko wie lɛ nɛkɛ gbɛ nɔ akɛ: “He ko bɛ adesa tsui lɛ kponɔgbɛ shinaa lɛ he ni abaanyɛ amɔ mli kɛgbele tsui lɛ naa. Esa akɛ ajɛ mli gbɛ agbele.” Yehowa taoɔ tsuii akpekpe toi akpei abɔ ni yɔɔ je nɛɛ mli lɛ amli akɛ ebaana aŋkroaŋkroi ni miitao esɛɛgbɛ lɛ lo. (1 Kronika 28:9) Kɛ́ ena mɔ ni miitao esɛɛgbɛ lɛ, ehereɔ mɔ lɛ yɛ gbɛ ni taa mɔ tsuiŋ nɔ. Mɛɛ gbɛ nɔ etsɔɔ efeɔ nakai?

Yehowa kɛ mlihilɛ gbalaa aŋkroaŋkroi ni hiɛ “tsui kpakpa lɛ.” (Bɔfoi lɛ Asaji 13:48, NW) Yehowa feɔ enɛ yɛ gbɛi enyɔ anɔ—kɛtsɔ sanekpakpa ni yɔɔ Biblia lɛ mli ni wɔnine shɛɔ nɔ akɛ aŋkroaŋkroi lɛ nɔ, kɛ agbɛnɛ hu kɛtsɔ emumɔ krɔŋkrɔŋ lɛ nɔ. Kɛ́ Yehowa na tsui ko ni kpɛlɛɔ Biblia mli anɔkwalei anɔ lɛ, ekɛ emumɔ lɛ yeɔ ebuaa nakai mɔ lɛ koni enu anɔkwale lɛ shishi ni ekɛtsu nii yɛ eshihilɛ mli. (1 Korintobii 2:11, 12) Kɛ́ jeee Yehowa ye ebua wɔ kulɛ, wɔnyɛŋ wɔbatsɔmɔ Yesu anɔkwa kaselɔi kɛ Yehowa jálɔi ni etuu amɛhe amɛha lɛ.

Belɛ, mɛni Yesu wiemɔ ni aŋma yɛ Yohane 6:44 lɛ tsɔɔ wɔ yɛ Yehowa Nyɔŋmɔ he mɔ? Yehowa gbalaa mɛi kɛbaa eŋɔɔ akɛni enaa nɔ ko kpakpa yɛ amɛtsuiiaŋ, ni esusuɔ amɛhe akɛ aŋkroaŋkroi lɛ hewɔ. Yoo ni atsĩ etã yɛ sane nɛɛ shishijee lɛ bale anɔkwale ni nɔ bɛ nɛɛ, ni enɛ ha etsui nyɔ emli. Ewie akɛ: “Yehowa tsulɔ ni mɔ ko ji lɛ ji hegbɛ ni fe fɛɛ ni adesa ko baanyɛ aná. Ni kɛ́ Yehowa ehala mi akɛ etsulɔ lɛ, belɛ no tsɔɔ akɛ esusuɔ mihe waa diɛŋtsɛ.” Ni bo hu? Ani le ni obale akɛ Yehowa susuɔ mɛi ni jáa lɛ lɛ ahe akɛ aŋkroaŋkroi lɛ tsirɛɔ bo koni ogbele otsui lɛ naa shinaa lɛ oha lɛ, no ji osumɔ akɛ obaabɛŋkɛ lɛ?