Ani bo diɛŋtsɛ oná niiashikpamɔ pɛŋ ni tsɔɔ akɛ aajie nii amli? Ani obi nɔ ko ni ahaaa bo, akpoo akɛ abaafee nɔ ko aha bo, loo akɛ bo yeee yɛ bulɛ gbɛ nɔ yɛ ohewolonɔ su, maŋ nɔ ni ojɛ, kɛ nɔ̃ mɔ ni oji lɛ hewɔ? Kɛ́ nakai ji sane lɛ, no lɛ jeee bo pɛ akɛ nɛkɛ sane eye. Naa sanekpakpa ko: Eyɛ mli akɛ nifeemɔi ni etsɔɔɔ bulɛ efa yɛ gbɔmɛi ateŋ ŋmɛnɛ moŋ, shi Nyɔŋmɔ kɛ wɔ yeŋ yɛ nakai gbɛ nɔ kɔkɔɔkɔ. Kristofonyo bɔfo Petro wie kɛ nɔmimaa akɛ, “Nyɔŋmɔ jeee mɛi ahiɛaŋkwɛlɔ.”—Kanemɔ Bɔfoi lɛ Asaji 10:34, 35.

Petro wie nakai wiemɔi lɛ yɛ shihilɛ ko ni efɔɔɔ kaa lɛ mli—yɛ Jeŋmajiaŋnyo ko ni atsɛɔ lɛ Kornelio lɛ shĩa. Petro, ni ji Yudanyo lɛ hi shi yɛ beaŋ ni Yudafoi lɛ buɔ Jeŋmajiaŋbii lɛ akɛ mɛi ni he tseee ni ákɛ anyɛŋ akɛ amɛ abɔ yɛ gbɛ ko kwraa nɔ lɛ mli. Kɛ́ nakai ni lɛ, mɛni hewɔ Petro tee Kornelio shĩa mɔ? Sane lɛ kɛkɛ ji akɛ, Yehowa Nyɔŋmɔ ji mɔ ni to akɛ ekɛ lɛ ayakpe. No mli lɛ, Petro ena ninaa ko, ni akɛɛ lɛ yɛ ninaa lɛ mli akɛ: “Nɔ ni Nyɔŋmɔ etsuu he lɛ, kaabu lɛ akɛ yakayaka nɔ ko.” No mli lɛ, Petro leee akɛ yɛ gbi ni tsɔ hiɛ lɛ mli lɛ, Kornelio hu nine shɛ ninaa ko nɔ, ni bɔfo ko kɛɛ Kornelio yɛ ninaa lɛ mli akɛ etsu ni ayatsɛ Petro kɛba. (Bɔfoi lɛ Asaji 10:1-15) Beni Petro yɔse akɛ Yehowa ji mɔ ni kudɔɔ nibii lɛ, enyɛɛɛ emua enaa dɔŋŋ.

Petro kɛɛ akɛ: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ.” (Bɔfoi lɛ Asaji 10:34) Biblia he nilelɔ ko wie enɛ he akɛ: “Abaanyɛ akɛto kojolɔ ko ni kwɛɔ mɔ ko hiɛ ekojoɔ lɛ, jeee akɛ mɔ lɛ yeɔ bem loo eyeɔ fɔ, moŋ lɛ edamɔɔ mɔ lɛ puemɔ nɔ ekojoɔ lɛ lɛ he.” Nyɔŋmɔ kwɛɛɛ mɔ ko hiɛ ebuuu lɛ akɛ enɔ kwɔ fe mɔ kroko, yɛ mɔ lɛ hewolonɔ su, maŋ nɔ ni ejɛ, mɔ ni eji, loo nibii krokomɛi ni tamɔ enɛɛmɛi ahewɔ.

Moŋ lɛ, Yehowa kwɛɔ nɔ ni yɔɔ wɔtsui mli. (1 Samuel 16:7; Abɛi 21:2) Petro kɛfata he akɛ: “Shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:35) Nyɔŋmɔ gbeyei ni abaashe lɛ biɔ ni abu lɛ, akɛ woo aha lɛ, akɛ he afɔ̃ enɔ, ni akpoo akɛ abaafee nɔ ko ni esaaa ehiɛ. Nɔ ni fata jalɛnifeemɔ he ji ni wɔbaajɛ wɔsuɔmɔ mli wɔfee nibii ni ja yɛ Nyɔŋmɔ hiɛ. Mɔ ni tsuiŋ eyi obɔ kɛ bulɛ kɛha Nyɔŋmɔ ni no tsirɛɔ lɛ ni efeɔ nɔ ni ja lɛ, Yehowa náa ehe miishɛɛ.—5 Mose 10:12, 13.

Kɛ́ okɛ shihilɛ ni tsɔɔ niiamlijiemɔ loo mɛi ahe jwɛŋmɔ ni ejaaa ni anáa lɛ eko ekpe pɛŋ lɛ, ehi jogbaŋŋ akɛ obaaha nɔ ni Petro wie yɛ Nyɔŋmɔ he lɛ awo bo hewalɛ. Yehowa miigbala gbɔmɛi ni jɛ maji fɛɛ amli lɛ kɛmiiba anɔkwa jamɔ mli. (Yohane 6:44; Bɔfoi lɛ Asaji 17:26, 27) Eboɔ mɛi ni jáa lɛ lɛ asɔlemɔi atoi ni etsuɔ he nii ekɔɔɔ he eko amɛhewolonɔ su, maji anɔ ni amɛjɛ, loo mɛi ni amɛji. (1 Maŋtsɛmɛi 8:41-43) Wɔbaanyɛ wɔná nɔmimaa akɛ, kɛ́ Yehowa ma eyi shi ni ekwɛ shikpɔŋ lɛ nɔ lɛ, enaa gbɔmɛi aweku kome pɛ ni ji adesai aweku lɛ. Ani enɛ tsirɛɛɛ bo koni okase nibii krokomɛi yɛ Nyɔŋmɔ ni kwɛɛɛ hiɛaŋ nɛɛ he?