Te Onaa Jamɔ Ohaa Tɛŋŋ yɛ Ta Gbɛfaŋ?
Alberto kɛ nɔ ni aaashɛ afii nyɔŋma sɔmɔ akɛ asraafonyo. Ewie akɛ: “Wɔsɔfo lɛ jɔɔ wɔ ekɛɛ, ‘Nyɔŋmɔ kɛ nyɛ yɛ.’ Shi mishwie miyiŋ mikɛɛ, ‘Miiya miyagbe gbɔmɔ, kɛlɛ Biblia lɛ kɛɛ akɛ, “kaagbe gbɔmɔ.”’”
Ray sɔmɔ akɛ asraafonyo yɛ ŋshɔ hiɛ beni Jeŋ Ta ni ji II lɛ yaa nɔ lɛ. Gbi ko lɛ, ebi amɛsɔfo lɛ akɛ: “Obaa meele nɛɛ mli, ni osɔleɔ ohaa tabilɔi lɛ koni amɛye kunim. Ani mɛi ni wɔkɛyaawu ta lɛ hu efeee nakai nɔŋŋ?” Osɔfo lɛ here nɔ ekɛɛ akɛ, Nuŋtsɔ lɛ tsuɔ nii yɛ naakpɛɛ gbɛi anɔ.
Kɛ́ hetoo ni osɔfo lɛ kɛha Ray lɛ eŋɔɔɔ onaa lɛ, belɛ jeee okome onuɔ he nakai.
MƐNI BIBLIA LƐ TSƆƆ?
Yesu wie akɛ, Nyɔŋmɔ kitãi titrii lɛ ateŋ ekome ji “suɔmɔ onaanyo tamɔ bɔ ni osumɔɔ bo diɛŋtsɛ ohe.” (Marko 12:31) Ani Yesu tsɔɔ akɛ akwɛ he ni mɔ ko yɔɔ loo maŋ nɔ ni mɔ lɛ jɛ dani asumɔ lɛ? Dabi. Ekɛɛ ekaselɔi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:34, 35) Amɛbaasumɔ amɛhe bɔ ni baaha esoro amɛ, ni akɛ no baakadi amɛ. Amɛbaasumɔ ni amɛgbo amɛha amɛhe moŋ fe ni amɛbaagbe amɛhe.
Mra beaŋ Kristofoi lɛ hi shi yɛ Yesu wiemɔi lɛ anaa. Wolo ko (The Encyclopedia of Religion) wie akɛ: “Mra beaŋ jamɔŋ hiɛnyiɛlɔi, ni Tertullian kɛ Origen fata he lɛ ma nɔ mi akɛ aŋmɛɛɛ gbɛ ni Kristofoi akpãta adesa wala hiɛ, ni eji shishitoo mla ko ni haaa Kristofoi kɛ amɛhe awo Roma asraafoi anitsumɔ mli.”
NI YEHOWA ODASEFOI HU?
Akɛni kɛ́ hooo kwraa lɛ, Yehowa Odasefoi yɛ maŋ fɛɛ maŋ nɔ hewɔ lɛ, aŋkroaŋkroi ni ji Odasefoi lɛ ekomɛi yɛ maji ni kɛ amɛhe wuɔ ta lɛ amli. Kɛlɛ, amɛbɔɔ mɔdɛŋ amɛhiɛɔ amɛkadimɔnɔ ni ji suɔmɔ lɛ mli.
Ani jamɔŋ hiɛnyiɛlɔi eha amɛjamɔŋbii lɛ ele anɔkwa Kristofoi asuɔmɔ nɛɛ?
Ákɛ nɔkwɛmɔnɔ lɛ, beni Hutubii kɛ Tutsibii ni yɔɔ Rwanda lɛ kɛ amɛhe wuɔ ta yɛ afi 1994 mli lɛ, Yehowa Odasefoi lɛ fiii afã ko sɛɛ. Hutu Odasefoi lɛ baa Tutsi Odasefoi lɛ ayi, ni Tutsi Odasefoi lɛ hu fee nakai, ni bei pii lɛ amɛkɛ amɛwala woɔ oshara mli po. Beni amɔmɔ Hutu hii Odasefoi enyɔ komɛi ni ha Tutsi Odasefoi bahi amɛŋɔɔ lɛ, Hutu asraafoi (Interahamwe militia) lɛ kɛɛ akɛ, “Esa akɛ agbe nyɛ, ejaakɛ nyɛye nyɛbua Tutsibii lɛ ni amɛjo foi.” Mɔbɔ sane ji akɛ, agbe Hutu Odasefoi enyɔ lɛ.—Yohane 15:13.
Te osusuɔ tɛŋŋ: Aso Yehowa Odasefoi anifeemɔi kɛ Yesu wiemɔi ni kɔɔ suɔmɔ ni haa akɛ he shãa afɔle lɛ he lɛ kpãaa gbee?
