Beni miye afii etɛ lɛ, atswa mipapa, mitsɛkwɛ̃, kɛ minii anane shishi tu kɛtee yiwalɛ nsarai amli akɛni amɛji Kristofoi ni fiii afã ko sɛɛ lɛ hewɔ. Mipapa yi ná wala. Yɛ afi 1947 beni Jeŋ Ta ni ji enyɔ lɛ ba naagbee lɛ, eku esɛɛ kɛba shĩa ní ekotosɛɛ wu lɛ eko eku. Eyɛ mli akɛ no mli lɛ ebɛ gbɔmɔtsoŋ hewalɛ kwraa moŋ, shi efi shi shiŋŋ yɛ ehemɔkɛyeli lɛ mli.

Beni miye afii nɛɛhu lɛ, atswa wɔweku lɛ kɛ Moldova Odasefoi ohai komɛi anane shishi tu kɛtee Siberia. Yɛ July 6, afi 1949 lɛ, abua wɔnaa awo tsina lɔlei amli kɛtee. Wɔkɛ gbii 12 fo gbɛ jɛkɛmɔ ni fe kilomitai 6,400 sɔŋŋ dani wɔwa yɛ Lebyazhe oketeke shidaamɔ he lɛ. No mli lɛ, jɛmɛ maŋ onukpai lɛ efee klalo kɛmiimɛ wɔ. Ajara wɔ awo kui bibii amli, ni amrɔ nɔŋŋ lɛ agbɛ wɔ ashwa jɛi niiaŋ fɛɛ. Skultsu bibioo ko ni kã shi eflo lɛ batsɔ wɔkuu lɛ shihilɛhe. No mli lɛ, etɔ wɔ bliboo ni wɔwerɛ eho wɔhe waa diɛŋtsɛ. Yoo onukpa ko ni fata wɔhe lɛ shi esɛŋ kɛlá lala ko ni Odasefoi fo beni Jeŋ Ta ni ji enyɔ lɛ yaa nɔ lɛ. Etsɛɛɛ kɛkɛ ni wɔ fɛɛ wɔhere lala lɛ nɔ kɛlá emli wiemɔi lɛ:

“Atswa nyɛmimɛi babaoo ananeshi tu kɛtee he ko shɔŋŋ.

Akɛ amɛ tee kooyigbɛ kɛ bokagbɛ fɛɛ.

Nyɔŋmɔ nitsumɔ ni amɛtsuɔ lɛ hewɔ lɛ, akɛ yiwaa gbala amɛtoi, ni beni amɛyɔɔ jɛmɛ lɛ amɛnyɛ amɛdamɔ kai ni baanyɛ agbe amɛ lɛ po anaa.”

Beni be shwie mli lɛ, kɛ́ shɛ daa Hɔgbaa lɛ wɔyakaseɔ Biblia lɛ yɛ he ko ni kɛ wɔshĩa lɛ jɛkɛmɔ aaafee kilomitai 13. No beaŋ lɛ, efɔɔ kaa akɛ fɛ̃i beaŋ lɛ, wɔshiɔ shĩa hiɛ futɛfutɛ mli ni wɔnyiɛɔ kɛtsɔɔ snoo ni enɔkwɔlɛ shɛɔ wɔhɛ tɔ̃ɔ lɛ mli kɛyaa; be nɛɛ mli lɛ jeŋ jɔɔ tsɔ fe nine (ejɔɔ kɛshɛɔ -40°C). Wɔyi 50 loo nɔ ni fe nakai buaa wɔhe naa yɛ tsu bibioo ko mli. Wɔláa lala kome loo enyɔ loo etɛ kɛjeɔ shishi. Ajɛɔ tsuiŋ asɔleɔ, kɛkɛ lɛ abɔi Biblia sanebimɔi komɛi ahe susumɔ. Enɛ yaa nɔ aaafee ŋmɛlɛtswaa kome loo nɔ̃. No sɛɛ lɛ, wɔláa lalai krokomɛi hu kɛkɛ lɛ wɔsusu Biblia sanebimɔi krokomɛi hu ahe. Kwɛ bɔ ni nakai be lɛ waje wɔhemɔkɛyeli eha!

Beni shɛɔ afi 1960 mli lɛ, aha Odasefoi ni atswa amɛnane shishi tu lɛ heyeli babaoo. Tsɛ ohiafoi ji wɔ yɛ no beaŋ moŋ, shi minyɛ miyasara Moldova, ni jɛmɛ mikɛ Nina, ní efɔlɔi kɛ enii kɛ enaa fɛɛ hu ji Odasefoi lɛ kpe yɛ. Etsɛɛɛ kɛkɛ ni wɔbote gbalashihilɛ mli ni wɔku sɛɛ kɛtee Siberia, jɛmɛ wɔfɔ wɔbiyoo Dina yɛ afi 1964 mli, ni sɛɛ mli yɛ afi 1966 lɛ wɔfɔ wɔbinuu Viktor. Afii enyɔ sɛɛ lɛ, wɔfã kɛtee Ukraine  ni wɔyahi shĩa bibioo ko mli yɛ Dzhankoy, maŋ ko ni kɛ Yalta ni yɔɔ Crimea ŋshɔnine lɛ nɔ lɛ jɛkɛmɔ aaafee kilomitai 160 lɛŋ.

No mli lɛ, agu Yehowa Odasefoi anitsumɔ lɛ yɛ Crimea, taakɛ eji yɛ Soviet Union niiaŋ fɛɛ lɛ. Shi shihilɛ lɛ bɛ kpɛŋŋ tsɔ, ni wɔkɛ yiwaa tsɔ ko hu ekpeee. Enɛ ha Odasefoi komɛi gbɔjɔ ekãa ni amɛkɛtsuɔ sɔɔmɔ nitsumɔ lɛ mli. Amɛsusu akɛ, akɛni amɛna nɔ waa yɛ Siberia hewɔ lɛ, kɛ́ amɛtɛje amɛhe kɛtsu nii kɛná amɛheloonaa nibii ni baaha amɛná shihilɛ lɛ ogbɔjɔ lɛ, tɔmɔ ko kwraa bɛ he.

Akpɛlɛ ni wɔkɛ wɔshiɛmɔ nitsumɔ ni yɔɔ no beaŋ Soviet Union maji lɛ fɛɛ nɔ lɛ wo mla shishi yɛ March 27, afi 1991. Oya nɔŋŋ ni ato gbii 2 kpeei krɛdɛɛ ekomekomei kpawo ahe gbɛjianɔ yɛ maji lɛ fɛɛ anɔ. Ato akɛ wɔbaaya wɔkpee lɛ yɛ Odessa, ni yɔɔ Ukraine ni baaje shishi yɛ August 24 lɛ. Miyashɛ jɛmɛ nyɔɔŋ kome dani kpee lɛ baaje shishi bɔni afee ni mawa kɛsaa stediɔm wulu ni ato akɛ abaafee kpee lɛ yɛ lɛ.

Wɔtsuɔ nii ŋmɛlɛtswai babaoo, ni bei komɛi lɛ wɔkãmɔɔ stediɔm sɛi lɛ ekomɛi anɔ wɔwɔɔ. Odasefoi yei kui kui toɔ naa kɛsaa stediɔm lɛ hewɔ fɛɛ. Abua jwɛi ni shɛɔ ton 70 anaa ayashɛrɛ ashwie. Nyɛmimɛi ni kwɛɔ koni aná wɔɔhei lɛ yakpa maŋ lɛŋ fɛɛ kɛtao tsũi kɛha mɛi 15,000 ni aakpa gbɛ akɛ amɛbaaba kpee lɛ. Kɛkɛ ni trukaa lɛ, amaniɛbɔɔ ko ni wɔnu lɛ ha wɔtsui kumɔ!

Yɛ August 19, beni eshwɛ gbii enumɔ pɛ ni kpee lɛ baaje shishi lɛ, amɔ no beaŋ USSR nɔyelɔ Mikhail Gorbachev, beni etee eejɔɔ ehe fioo yɛ he ko ni bɛŋkɛ Yalta lɛ. Aha wɔle akɛ, aŋmɛŋ wɔ gbɛ koni wɔfee kpee lɛ yɛ stediɔm lɛ dɔŋŋ. Enɛ ha nyɛmimɛi ni baaba kpeei lɛ bɔi nyɛmimɛi ni toɔ kpeei lɛ he gbɛjianɔ lɛ tɛlifoŋtswaa kɛbibii akɛ, “No hewɔ lɛ, mɛni wɔbaafee bɔs kɛ oketekei ni wɔyahai lɛ?” Beni nyɛmimɛi ni toɔ kpee lɛ he gbɛjianɔ lɛ esɔle yɛ sane lɛ he saŋŋ lɛ, amɛto he akɛ, “Bo lɛ, nyɛbaa!”

Akpaaa sɔlemɔ kɛ nibii ahe gbɛjianɔ too kɔkɔɔkɔ. Nyɛmimɛi ni toɔ tsɔji ahe gbɛjianɔ lɛ tee amɛyakpee nyɛmimɛi ni jɛ Soviet Union maji krokomɛi anɔ amɛbaa kpee lɛ, ni amɛkɛ mɛi nɛɛ tee amɛwɔɔhei lɛ. Daa leebi lɛ, Kpee Ajinafoi Akuu lɛ yanaa maŋ onukpai lɛ. Daa gbɛkɛ kɛ́ amɛku amɛsɛɛ lɛ, amɛkɛ sanekpakpa ko baaa.

Yɛ Soo August 22, beni eshwɛ gbi enyɔ ni kpee be lɛ baaje shishi lɛ, Kpee Ajinafoi Akuu lɛ ku amɛsɛɛ amɛba kɛ miishɛɛ sane akɛ: Akpɛlɛ nɔ akɛ wɔfee kpee lɛ agbɛnɛ! Beni wɔlá shishijee lala ni wɔfee ekome kɛsɔle lɛ, wɔmiishɛɛ yi obɔ kɛteke nɔ. Beni akpa Hɔɔ kpee lɛ, wɔhi kpee lɛ shishi kɛyashi jenamɔ tɔ̃ɔ, wɔkɛ wɔhe gbagbaa sane ni wɔná nanemɛi hei. Náa Kristofoi ni hemɔkɛyeli mli wa aahu akɛ amɛnyɛ amɛdamɔ kai ni mli wawai anaa!

Kɛjɛ beni afee kpee nɛɛ, afii 22 kɛ sɛɛ eho, ni wɔná mumɔŋ shweremɔi babaoo diɛŋtsɛ. Amamɔ Maŋtsɛyeli Asai yɛ Ukraine niiaŋ fɛɛ, ni Maŋtsɛyeli lɛ he shiɛlɔi ayibɔ etee hiɛ kɛjɛ shiɛlɔi 25,000 yɛ afi 1991 kɛbashɛ shiɛlɔi ni fa fe 150,000 amrɔ nɛɛ!

Wɔweku lɛ yɛ nakai shĩa lɛ nɔŋŋ ni yɔɔ Dzhankoy lɛ mli lolo, amrɔ nɛɛ ebatsɔ maŋ wulu kɛ emli bii aaafee 40,000. Eyɛ mli akɛ beni wɔjɛ Siberia wɔbashɛ biɛ yɛ afi 1968 lɛ, Odasefoi fioo pɛ wɔbanina moŋ, shi amrɔ nɛɛ asafoi ekpaa sɔŋŋ yɔɔ biɛ, yɛ Dzhankoy.

Miweku lɛ hu eda. Amrɔ nɛɛ mina yinɔi ejwɛ yɛ miweku lɛ mli ni miisɔmɔ Yehowa—mi kɛ miŋa, wɔbii lɛ, amɛbii, kɛ amɛbii abii.