Mɛɛ nikeenii nɛkɛ baaha onu he akɛ asusuɔ ohe waa? Ŋwanejee ko kwraa bɛ he akɛ nikeenii ni wɔteŋ mɛi pii baaná he miishɛɛ waa ji nɔ ni nikelɔ loo nihalɔ lɛ baajɛ suɔmɔŋ ekɛha wɔ, shi jeee nɔ ni ebaanu he akɛ esa akɛ ekɛha wɔ hewɔ ni ekɛha wɔ lɛ. Kɛ́ ebalɛ nihamɔ loo nikee lɛ, yiŋtoo ni yɔɔ sɛɛ lɛ he hiaa. Ehe hiaa wɔ waa diɛŋtsɛ. Nɔ ni fe fɛɛ lɛ, ehe hiaa Nyɔŋmɔ. Bo lɛ susumɔ sane ni akɛ mumɔ tsirɛ bɔfo Paulo ni eŋma yɛ 2 Korintobii 9:7 lɛ he okwɛ.

Mɛni hewɔ Paulo ŋma nakai wiemɔi lɛ? No mli lɛ, eetao ewo Korinto Kristofoi lɛ hewalɛ koni amɛfata he ni aye abua nyɛmimɛi ni yɔɔ Yudea lɛ. Aso ebɔ mɔdɛŋ akɛ enyɛ Korintobii lɛ anɔ koni amɛha nɔ ko? Kɔkɔɔkɔ! No najiaŋ lɛ, eŋma akɛ: “Mɔ fɛɛ mɔ aha bɔ ni ekpɛ mli momo, ni ekajɛ ŋkɔmɔyeli aloo fimɔ mli: ejaakɛ tsuijurɔnaa halɔ Nyɔŋmɔ sumɔɔ.” Ha wɔpɛi ŋaawoo nɛɛ mli jogbaŋŋ wɔkwɛ.

“Bɔ ni ekpɛ mli momo yɛ etsui mli.” Nɔ ni Paulo tsɔɔ ji akɛ, anɔkwa Kristofonyo keɔ nii akɛni ekpɛ mli “yɛ etsui mli” lɛ hewɔ. Nakai beaŋ nɔŋŋ lɛ, Kristofonyo heɔ be kɛsusuɔ nyɛmimɛi krokomɛi ahiamɔnii ahe jogbaŋŋ. Woloŋlelɔ kpanaa ko wie akɛ, wiemɔ ni atsɔɔ shishi akɛ “kpɛ mli” lɛ “hiɛ shishinumɔ akɛ atsɔ hiɛ asusu he momo.” No hewɔ lɛ, Kristofonyo jwɛŋɔ nyɛmimɛi Kristofoi lɛ ahiamɔnii anɔ jogbaŋŋ, ni ebiɔ ehe nɔ ni ebaanyɛ efee kɛtsu nakai hiamɔnii lɛ ahe nii.—1 Yohane 3:17.

“Ekajɛ ŋkɔmɔyeli aloo fimɔ mli.” Paulo kadi nibii enyɔ komɛi ni esaaa akɛ Kristofonyo feɔ kɛ́ eeha nii loo eyaake nii, no ji ekagbigbili emli ni ekaha anyɛ enɔ. Wolo ko tsɔɔ mli akɛ, mɔ ni jɛɔ ŋkɔmɔyeli loo mligbigbilimɔ mli ekeɔ nii lɛ, “kɛ́ eeke nii tamɔ shika nɛkɛ lɛ, edɔɔ lɛ akɛ nii lɛ miije edɛŋ.” Mɔ ni akɛɔ lɛ akɛ eke nɔ ko dani ekeɔ lɛ nuɔ he akɛ aanyɛ enɔ koni eke nii. Wɔteŋ namɔ baasumɔ koni ená nikeenii kɛjɛ mligbigbililɔ loo mɔ ko ni anyɛɔ enɔ dani ekeɔ nii lɛ dɛŋ?

“Tsuijurɔnaa halɔ Nyɔŋmɔ sumɔɔ.” Paulo wie akɛ, shii abɔ ni Kristofonyo ko ekpɛ mli akɛ ebaaha nɔ ko lɛ, esa akɛ ekɛ tsuijurɔ loo miishɛɛ afee. Anɔkwa, kɛ́ ajɛ jwɛŋmɔ ni ja mli ake nii lɛ, miishɛɛ ji nɔ ni jɛɔ mli kɛbaa. (Bɔfoi lɛ Asaji 20:35) Tsuijurɔnaa halɔ lɛ miishɛɛ lɛ bafeɔ faŋŋ kɛhaa mɛi krokomɛi. Anɔkwa, wiemɔ ni ji “tsuijurɔnaa” lɛ hu baanyɛ adamɔ shi kɛha bɔ ni nihalɔ lɛ nuɔ he ehaa yɛ mligbɛ kɛ kponɔgbɛ fɛɛ. Tsuijurɔnaa halɔ haa wɔtsui tɔɔ kɛ miishɛɛ. Ehaa Nyɔŋmɔ hu tsui nyɔɔ emli naakpa. Biblia shishitsɔɔmɔ kroko hu kɛba lɛ nɛkɛ: “Nyɔŋmɔ sumɔɔ mɛi ni haa mɔ nɔ.”—Contemporary English Version.

Wiemɔ ni akɛ mumɔ tsirɛ bɔfo Paulo ni eŋma nɛɛ bafeɔ shishitoo mla ni kudɔɔ Kristofoi yɛ nihamɔ loo nikee mli. Kɛ́ wɔbe wɔkɛhaa jio, wɔhewalɛ jio, wɔheloonaanii jio lɛ, esa akɛ wɔjɛ wɔtsuiŋ wɔkɛha, ni esa akɛ wɔfee nakai akɛni kɛ́ wɔfee mɛi ejurɔ, titri lɛ mɛi ni efĩ amɛ lɛ ejurɔ lɛ, wɔtsui nyɔɔ wɔ mli lɛ hewɔ. Jeee akɛ nihamɔ ni tamɔ nakai lɛ baaha wɔmii ashɛ wɔhe kɛkɛ, shi ehaa Nyɔŋmɔ náa wɔhe miishɛɛ hu, ejaakɛ “tsuijurɔnaa halɔ Nyɔŋmɔ sumɔɔ.”