Gbele tamɔ wɔ ni awɔɔ kɛ shishinumɔ akɛ gbohii lɛ leee nɔ ko kwraa ni yaa nɔ, ni amɛnyɛŋ nɔ ko amɛfee. Kɛlɛ, mɔ ni Bɔ wala lɛ baanyɛ ekɛ gbohii lɛ aba wala mli ekoŋŋ kɛtsɔ gbohiiashitee nɔ. Nyɔŋmɔ ha Yesu tee gbohii komɛi ashi kɛba wala mli kɛma enɛ nɔ mi.—Kanemɔ Jajelɔ 9:5; Yohane 11:11, 43, 44.

Nyɔŋmɔ ewo shi akɛ ebaatee gbohii ni yɔɔ ekaimɔ mli lɛ ashi kɛba wala mli yɛ jalɛ jeŋ hee lɛ mli. Mɛi ni abaatee amɛshi lɛ nyɛŋ aba wala mli kɛyashi Nyɔŋmɔ baaha amɛ wala ekoŋŋ. Ekã Nyɔŋmɔ Ofe lɛ tsui nɔ waa akɛ ekɛ ehewalɛ baatsu nii kɛtee gbohii lɛ ashi kɛba wala mli ekoŋŋ.—Kanemɔ Hiob 14:14, 15.

Kɛ́ Nyɔŋmɔ tee gbohii lɛ ashi lɛ, amɛbaanyɛ amɛyɔse amɛhe, amɛnanemɛi, kɛ amɛwekui. Eyɛ mli akɛ gbɔmɔtso lɛ kpɔtɔɔ moŋ, shi Nyɔŋmɔ baanyɛ atee nakai mɔ lɛ nɔŋŋ shi kɛ gbɔmɔtso hee.—Kanemɔ 1 Korintobii 15:35, 38.

Aŋkroaŋkroi fioo komɛi pɛ ateɔ amɛ shi kɛyaa ŋwɛi. (Kpojiemɔ 20:6) Mɛi ni ateɔ amɛ shi lɛ ateŋ kpotoo baasaa ahi wala mli yɛ shikpɔŋ ni afee lɛ Paradeiso ekoŋŋ lɛ nɔ. Abaaha mɛi nɛɛ aje wala shishi ekoŋŋ kɛ gbɛkpamɔ akɛ amɛbaahi shi kɛya naanɔ.—Kanemɔ Lala 37:29; Bɔfoi lɛ Asaji 24:15.