Datrɛfoi ni tsuɔ jwɛŋmɔ he nii lɛ kɛɔ akɛ kɛ́ gbɔmɛi baaná miishɛɛ diɛŋtsɛ lɛ, ebiɔ ni amɛná mumɔŋ hiamɔ nii. Wɔnaa anɔkwale ni enɛ ji lɛ yɛ bɔ ni mɛi sumɔɔ ni amɛshɛ oti ko he loo amɛsɔmɔ mɔ ko loo nɔ ko ni nɔ kwɔ kwraa fe amɛ lɛ. Bɔni afee ni amɛshɛ oti nɛɛ he lɛ, mɛi komɛi kɛ amɛhejɔɔmɔ be yakwɛɔ adebɔɔ nibii, amɛkɛtɛŋɔ nii, amɛkɛtswaa lalai, kɛ ekrokomɛi. Fɛɛ sɛɛ lɛ, mɛi kpotoo nuɔ he akɛ nifeemɔi nɛɛ nyɛɛɛ aha amɛtsui anyɔ amɛmli.

Efeee mɛi ni kaneɔ Biblia lɛ naakpɛɛ akɛ yɛ adebɔɔ naa lɛ, adesai shweɔ akɛ amɛná mumɔŋ yelikɛbuamɔ. Mose Klɛŋklɛŋ Wolo lɛ mli shishijee yitsei lɛ tsɔɔ akɛ, be ni Nyɔŋmɔ bɔ klɛŋklɛŋ adesai enyɔ lɛ sɛɛ lɛ, ekɛ amɛwieɔ yɛ be kɛ beaŋ, ni no ha amɛkɛ lɛ ná mumɔŋ wekukpaa ko. (1 Mose 3:8-10) Nyɔŋmɔ efeee adesai koni amɛtse amɛhe kɛjɛ ehe; efee amɛ koni amɛkɛ amɛ-Feelɔ lɛ aná sharamɔ. Biblia lɛ gbalaa jwɛŋmɔ kɛyaa nɛkɛ hiamɔ nii nɛɛ nɔ shii abɔ.

Akɛ nɔkwɛmɔnɔ lɛ, Yesu kɛɛ akɛ: “Mɛi ni le akɛ mumɔŋ nibii ahe miihia amɛ lɛ yɛ miishɛɛ.” (Mateo 5:3, NW) Wiemɔ nɛɛ hewɔ lɛ, wɔbaanyɛ wɔmu sane naa akɛ, nɔ titri ni haa wɔnáa miishɛɛ ni wɔtsui nyɔɔ wɔmli fe fɛɛ ji ni wɔbaaná nakai mumɔŋ hiamɔ nii lɛ. Mɛɛ gbɛ nɔ wɔbaatsɔ wɔfee enɛ? Yesu ha sanebimɔ nɛɛ hetoo beni ewie akɛ: “Jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.” (Mateo 4:4) Mɛɛ gbɛ nɔ Nyɔŋmɔ naa wiemɔi, kɛ́ wɔɔkɛɛ lɛ, Nyɔŋmɔ susumɔi kɛ gbɛtsɔɔmɔi ni yɔɔ Biblia lɛ mli lɛ, haa wɔtsui nyɔɔ wɔmli yɛ shihilɛ mli, ni wɔnáa miishɛɛ? Ha wɔsusu gbɛi titrii etɛ komɛi ahe wɔkwɛ.

Ŋmɛnɛ lɛ, mɛi babaoo yɛ ni amɛnitsumɔ ji amɛkɛ ŋaawoo ni kɔɔ nyiɛmɔ ni tsɔɔ gbalashihilɛ hiɛ, suɔmɔ, weku shihilɛ, bei saamɔ, miishɛɛ, kɛ nɔ hewɔ ni wɔyɔɔ shihilɛ mli lɛ he lɛ aha. Kɛlɛ, kɛ́ okwɛ lɛ namɔ ji mɔ ni sa jogbaŋŋ fe fɛɛ ni baanyɛ ekɛ nibii nɛɛ fɛɛ ahe gbɛtsɔɔmɔ ni mɔɔ shi jogbaŋŋ aha fe adesai a-Feelɔ, Yehowa Nyɔŋmɔ?

 Susumɔ nɔkwɛmɔnɔ nɛɛ he okwɛ: Kɛ́ oyahe nɔ ko hee, tamɔ kamera loo kɔmpiuta nɛkɛ lɛ, okpaa gbɛ ákɛ akɛ ehe gbɛtsɔɔmɔi loo wolo ni mɔ ni fee lɛ eŋmala, ni tsɔɔ bɔ ni obaafee oná he sɛɛ jogbaŋŋ ni otsui anyɔ omli lɛ baafata he. Abaanyɛ akɛ Biblia lɛ ato nakai wolo lɛ he. Eji adesa shihilɛ he wolo ni Nyɔŋmɔ, mɔ ni kɛ́ wɔɔkɛɛ lɛ, lɛ efee adesai lɛ kɛha wɔ koni wɔkɛtsu nii. Nakai “gbɛtsɔɔmɔ wolo” lɛ tsɔɔ nɔ ni afee kamera loo kɔmpiuta lɛ koni etsu, kɛ bɔ ni esa akɛ akɛtsu nii aha koni aná he sɛɛ jogbaŋŋ.

Bɔ ni gbɛtsɔɔmɔ wolo ni aŋma lɛ jogbaŋŋ lɛ haa mɔ ni kaneɔ lɛ leɔ nibii ni kɛ́ efee lɛ, tsɔne ni eyahe lɛ baafite ni enyɛŋ etsu nii jogbaŋŋ lɛ, nakai nɔŋŋ Biblia lɛ haa ekanelɔi lɛ leɔ nibii ni kɛ́ amɛfee lɛ, amɛkɛ amɛwala baawo oshara mli. Bei komɛi lɛ, wɔbaasusu akɛ ŋaawoi kɛ gbɛtsɔɔmɔi ni yɔɔ kuku ni mɛi kɛhaa wɔ lɛ hi jogbaŋŋ, shi aso nilee bɛ mli akɛ wɔbaajwɛŋ nii ahe ni wɔna akɛ, kɛ́ wɔkɛ wɔ-Feelɔ lɛ gbɛtsɔɔmɔi tsu nii lɛ, wɔbaaná he sɛɛ jogbaŋŋ ni wɔbaakwa naagbai ni kulɛ ebaaba lɛ?

Yehowa Nyɔŋmɔ kɛ gbɛtsɔɔmɔi kɛ ŋaawoi haa moŋ, shi enyɛɛɛ wɔnɔ akɛ wɔkɛtsu nii. Moŋ lɛ, akɛni esumɔɔ wɔ ni eesumɔ akɛ eye ebua wɔ hewɔ lɛ, ejɛɔ mlihilɛ mli ekɛɔ wɔ akɛ: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ. Eji obo mikitai lɛ atoi kulɛ, ohejɔlɛ aaatamɔ faa, ni ojalɛ hu aaatamɔ ŋshɔkei.” (Yesaia 48:17, 18) Nɔ ni enɛ tsɔɔ nɔŋŋ ji akɛ, kɛ́ wɔkɛ Nyɔŋmɔ gbɛtsɔɔmɔ tsu nii lɛ, wɔbaahi shi jogbaŋŋ. Wɔbaanyɛ wɔwie lɛ nɛkɛ, kɛ́ wɔmiisumɔ ni wɔhi shi jogbaŋŋ ni wɔmii ashɛ wɔhe lɛ, esa akɛ wɔtao Nyɔŋmɔ sɛɛgbɛ.

Mɛi komɛi nuɔ he akɛ Nyɔŋmɔ he ehiaaa amɛ, ejaakɛ amɛkɛ shihilɛi komɛi kpeɔ ni haaa amɛyiŋ atɛ̃ amɛ akɛ esumɔɔ wɔ. Akɛ nɔkwɛmɔnɔ lɛ, ekolɛ amɛbaabi akɛ: ‘Mɛni hewɔ esa akɛ gbɔmɛi kpakpai ana nɔ?’ ‘Mɛni hewɔ afɔɔ abifabii ni efeko nɔ ko lɛ akɛ kpajelɔi?’ ‘Mɛni hewɔ ni jalɛsaneyeli bɛ jeŋ?’ Sanebimɔi ni he hiaa waa nɛ, ni kɛ́ wɔná hetoi ni haa mɔ tsui nyɔɔ emli lɛ, ebaanyɛ ená wɔshihilɛ nɔ hewalɛ kpakpa. Shi yɛ nɔ najiaŋ ni ohe baafee oya kɛshwa Nyɔŋmɔ yɛ naagbai nɛɛ ahewɔ lɛ, ha wɔkwɛ bɔ ni Nyɔŋmɔ Wiemɔ ni ji Biblia lɛ baanyɛ aye abua wɔ kɛna sane nɛɛ naa.

Yɛ 1 Mose yitso etɛ lɛ mli lɛ, wɔnaa sane ko ni kɔɔ Satan, mɔ ni kɛtsɔ onufu ko nɔ lɛ, ebɔ mɔdɛŋ akɛ eha klɛŋklɛŋ adesai enyɔ lɛ agbo Yehowa Nyɔŋmɔ famɔ akɛ amɛkaye ekpakpa kɛ efɔŋ lee tso lɛ nɔ yibii lɛ eko lɛ nɔ toi lɛ. Satan kɛɛ Hawa akɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.”—1 Mose 2:16, 17; 3:4, 5.

Satan kɛ ewiemɔi nɛɛ tsɔɔ akɛ, jeee akɛ Nyɔŋmɔ miimale kɛkɛ shi moŋ akɛ gbɛ ni Nyɔŋmɔ tsɔɔ nɔ eyeɔ nɔ lɛ ejaaa. Abonsam ma nɔ mi akɛ kɛji adesai bo lɛ toi lɛ, nibii baaya lɛ jogbaŋŋ aha amɛ. Mɛɛ gbɛ nɔ abaatsɔ atsu saji nɛɛ ahe nii? Yehowa kpɛ mli akɛ ebaaha be ashwie mli bɔni afee ni mɛi fɛɛ ana kɛji naafolɔmɔi ni akɛshwie enɔ lɛ ji anɔkwale loo amale. Nyɔŋmɔ ŋmɛ Satan kɛ mɛi fɛɛ ni fiɔ Satan sɛɛ lɛ gbɛ koni amɛtsɔɔ  kɛji adesai baanyɛ aye omanye yɛ shihilɛ mli ni Nyɔŋmɔ he ehiaaa amɛ.

Te obaaha naafolɔmɔi ni Satan tee lɛ shi nɛɛ hetoo oha tɛŋŋ? Aso adesai baanyɛ ahi shi shweshweeshwe ni amɛkudɔ amɛ diɛŋtsɛ amɛshihilɛ ni Nyɔŋmɔ he ehiaaa amɛ? Nɔnai, jalɛsane ni ayeee, helai, kɛ agbɛnɛ hu gbelei kɛ juu kɛ fɔ̃, jeŋba sha, tai, weku shishibulemɔ, kɛ nibii gbohii krokomɛi ni eye adesai awui afii ohai abɔ nɛ lɛ ji odaseyeli ni yɔɔ faŋŋ akɛ mɔdɛŋ ni adesai bɔɔ akɛ amɛbaatse amɛhe kɛjɛ Nyɔŋmɔ he ni amɛye amɛ diɛŋtsɛ amɛhe nɔ lɛ yeko omanye kwraa. Biblia lɛ etsɔɔɔ akɛ Nyɔŋmɔ ji mɔ ni hɔ adesai anaagbai lɛ asɛɛ lɛ, moŋ lɛ, etsɔɔ nɔ titri ni kɛ naagbai lɛ baa, ekɛɛ akɛ: “Gbɔmɔ yeɔ enaanyo gbɔmɔ nɔ ni ekɛyeɔ ehe awui.”—Jajelɔ 8:9.

Yɛ sane nɛɛ naa lɛ, aso ebɛ faŋŋ akɛ esa akɛ wɔtsi wɔbɛŋkɛ Nyɔŋmɔ, kɛha saji ni gbaa wɔnaa lɛ ahetoi kɛ wɔnaagbai lɛ hu anaa tsabaa? Mɛni Nyɔŋmɔ baafee mɔ?

Gbɔmɛi ejɛ jeeŋmɔ beebe amɛshwe koni amɛye amɛhe kɛjɛ hela, gbɔlɛ kɛ gbele dɛŋ. Amɛkɛ amɛbe, amɛdeŋme, kɛ amɛheloonaa nibii babaoo etiu sɛɛ, shi nɔ ko kpakpa ko jɛko mli kɛbako. Mɛi komɛi kpa gbɛ akɛ kɛ́ amɛnu tsofai ni asusuɔ akɛ ehaa wala sɛɛ tsɛɔ, amɛnu nu pɔtɛɛ ko, loo amɛhi he ko pɔtɛɛ ko lɛ, amɛgbɔlɔŋ. Gbɛkpamɔi nɛɛ eko kwraa yeko omanye.

Nyɔŋmɔ miisumɔ ni adesai ahi shi jogbaŋŋ ni amɛmii ashɛ amɛhe. No ji yiŋtoo hewɔ ni ebɔ adesai, ni ehiɛ kpako nɔ kɔkɔɔkɔ. (1 Mose 1:27, 28; Yesaia 45:18) Yehowa Nyɔŋmɔ ewo shi akɛ, nɔ fɛɛ nɔ ni eto eyiŋ akɛ ebaafee lɛ baaba mli kɛ̃. (Yesaia 55:10, 11) Biblia lɛ kɛɔ wɔ akɛ Nyɔŋmɔ ewo shi akɛ ekɛ Paradeiso shihilɛ ni ŋmɛɛ Adam kɛ Hawa lɛ baaku sɛɛ aba ekoŋŋ. Wɔnaa wiemɔi nɛɛ yɛ Biblia mli naagbee wolo lɛ mli: “Ni [Yehowa] Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:4) Te Nyɔŋmɔ baafee tɛŋŋ ekɛ shihilɛi kpakpai nɛɛ aba lɛ, ni mɛɛ gbɛ nɔ wɔbaatsɔ wɔná he sɛɛ?

Nyɔŋmɔ Bi, Yesu Kristo tsɔɔ esɛɛnyiɛlɔi lɛ akɛ amɛsɔle koni afee Nyɔŋmɔ suɔmɔnaa nii. Mɛi babaoo le sɔlemɔ nɛɛ loo amɛkɛɔ nakai sɔlemɔ ní mɛi komɛi tsɛɔ lɛ akɛ Nuŋtsɔ lɛ Sɔlemɔ lɛ shii abɔ. Eyaa lɛ nɛkɛ: “Wɔtsɛ ni yɔɔ ŋwɛi, ogbɛi lɛ he atse; omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:9, 10) Hɛɛ, Nyɔŋmɔ Maŋtsɛyeli lɛ nɔ Yehowa Nyɔŋmɔ baatsɔ ejie nɔnai ni adesa nɔyeli kɛba lɛ kɛya, ni ekɛ jalɛ jeŋ hee ni ewo he shi lɛ aba. * (Daniel 2:44; 2 Petro 3:13) Mɛni esa akɛ wɔfee koni wɔná Nyɔŋmɔ shiwoo lɛ he sɛɛ?

Yesu Kristo tsɔɔ gbɛ ni waaa kwraa ni esa akɛ wɔtsɔ nɔ wɔfee nakai, ekɛɛ akɛ: “Shi enɛ ji naanɔ  wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Hɛɛ, kɛtsɔ Nyɔŋmɔ yelikɛbuamɔ nɔ lɛ, abaanyɛ aná wala ni sɛɛ efooo yɛ jeŋ hee ni awo he shi lɛ mli. Nakai gbɛkpamɔ lɛ baaha ona yiŋtoo kroko hewɔ ni okɛ nɔmimaa baaha sanebimɔ ni ji, “Aso Nyɔŋmɔ he ehiaaa wɔ?” lɛ hetoo akɛ ehe miihia wɔ.

Afii 2000 ni eho nɛ beni bɔfo Paulo kɛ Atenebii lɛ wieɔ yɛ Areopago loo Mars Hill yɛ Atene lɛ, ewie yɛ Nyɔŋmɔ he akɛ: “Lɛ moŋ edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ; Ejaakɛ emli nɔŋŋ wɔhiɛ kamɔ ni wɔtsiɔ wɔhe ni wɔyɔɔ yɛ; tamɔ bɔ ni nyɛ diɛŋtsɛ nyɛlalatsɛmɛi lɛ ekomɛi hu ekɛɛ lɛ akɛ: shi lɛ nɔŋŋ eshwiei ji wɔ hu.”—Bɔfoi lɛ Asaji 17:25, 28.

Nɔ ni Paulo gbala Atenebii lɛ ajwɛŋmɔ kɛtee nɔ lɛ kã he eji anɔkwale. Wɔ-Bɔlɔ lɛ ji mɔ ni haa wɔ kɔɔyɔɔ ni wɔmuɔ, niyenii ni wɔyeɔ, kɛ nu ni wɔnuɔ lɛ fɛɛ. Kɛ́ jeee nibii kpakpai nɛɛ ni Yehowa haa wɔ kɛbaa wɔyi kulɛ, wɔnyɛŋ wɔhi wala mli. Shi mɛni hewɔ Nyɔŋmɔ yaa nɔ ekɛ nibii nɛɛ haa mɛi ni susuɔ ehe kɛ mɛi ni susuuu ehe fɛɛ lɛ? Paulo kɛɛ akɛ “koni amɛtao Nyɔŋmɔ sɛɛgbɛ, akɛ aleenɔ kɛ́ amɛgbugbuu shi lɛ, amɛaana lɛ lo; tsɛbelɛ ekɛ wɔteŋ mɔ fɛɛ mɔ teŋ jekɛɛɛ.”—Bɔfoi lɛ Asaji 17:27.

Ani obaasumɔ ni ole Nyɔŋmɔ jogbaŋŋ, no ji, ní okase eyiŋtoi kɛ eŋaawoi ni baaha ohi shi jogbaŋŋ amrɔ nɛɛ kɛ agbɛnɛ kɛmiiya naanɔ lɛ ahe nibii krokomɛi? Kɛ́ nakai lɛ, wɔmiiwo bo hewalɛ koni okɛ mɔ ni kɛ wolo nɛɛ baha bo lɛ awie loo naa mɛi ni kala lɛ. Amɛbaaná he miishɛɛ waa akɛ amɛbaaye amɛbua bo.