Akɛ sɔlemɔwe lɛ onia adekai lɛ mamɔɔ Yei Akpo lɛ nɔ. Wolo ko (The Temple—Its Ministry and Services) tsɔɔ mli akɛ: “Ablanaa yɛ sɔlemɔwe lɛ hewɔ fɛɛ, ni akɛ onia adekai loo ‘tɛtɛrɛmantɛrɛi’ nyɔŋma kɛ etɛ emamɔ egbogboi lɛ ahe yɛ ablanaa lɛ nɔ, ni nomɛi amli atsuɔ oniai awoɔ.”

Atsɛɔ adekai lɛ tɛtɛrɛmantɛrɛi ejaakɛ amɛŋwɛigbɛ yɛ bloblo ni amɛshishigbɛ lɛɛ. Akadi adekai lɛ eko fɛɛ eko he kɛha oniai pɔtɛɛ ko, ni akɛ shika ni anáa yɛ eko fɛɛ eko mli lɛ tsuɔ yiŋtoo pɔtɛɛ komɛi ahe nii. Yei Akpo lɛ nɔ Yesu yɔɔ beni ena mɛi babaoo, ní yoo okulafo ohiafo ko hu fata he miitsu onia lɛ.—Luka 21:1, 2.

Adekai enyɔ yɛ kɛha sɔlemɔwe lɛ he too—ekome yɛ kɛha afi ni ayɔɔ mli lɛ kɛ ekome hu kɛha afi ni ho lɛ. Akɛ shika ni kulɛ akɛbaahe kosɛɛ-okpoi, shĩa-okpoi, lai, tsofa-kɛ-ŋma, kɛ shika kpuji lɛ woɔ adekai 3 kɛyashi 7 nɔ lɛ mli. Kɛ́ mɔ ni eba afɔleshãa lɛ shika lɛ fa fe afɔle ni ebaa ebashã lɛ, no lɛ ekɛ shika ni shwɛɔ lɛ woɔ adekai krokomɛi lɛ amli. Akɛ esha afɔle shika ni shwɛɔ lɛ woɔ adeka ni ji 8 lɛ mli. Akɛ shika ni shwɛɔ yɛ sɔ̃ afɔle, okpoi afɔlei, Nazirmɛi afɔlei, kɛ kpitiyelɔi afɔlei lɛ asɛɛ lɛ woɔ adekai ni ji 9 kɛyashi 12 lɛ amli. Adeka ni ji 13 nɔ lɛ yɛ kɛha onia ni ajɛɔ suɔmɔ mli atsuɔ.

Luka ji mɔ ni ŋma Sanekpakpa ni egbɛi kã nɔ lɛ, ni lɛ nɔŋŋ eŋma Bɔfoi lɛ Asaji lɛ. Luka kɛɛ akɛ ‘etao nibii fɛɛ anaa fitsofitso kɛjɛ shishijee,’ shi woloŋlelɔi komɛi kɛɛ amɛyiŋ etɛɛɛ amɛ yɛ nibii ni ebɔ he amaniɛ lɛ ahe. (Luka 1:3) No hewɔ lɛ, ani eniŋmai lɛ ja?

Luka wie yinɔsane mli anɔkwalei komɛi ni abaanyɛ ana lɛ ahe. Akɛ nɔkwɛmɔnɔ lɛ, ekɛ gbɛnaa gbɛ́i srɔtoi ni akɛfɔɔɔ nitsumɔ, tamɔ asafoiatsɛmɛi, maŋ lɛŋ onukpai, kɛ lumɛi tsɛ Roma maŋ hiɛnyiɛlɔi yɛ hei tamɔ Filipi, Tesalonika, kɛ Efeso. (Bɔfoi lɛ Asaji 16:20; 17:6; 19:31) Luka tsɛ Herode Antipa akɛ tetrarke, loo lumɔ ni etsɛ Sergio Paulo hu akɛ Kipro amralo.—Bɔfoi lɛ Asaji 13:1, 7.

Bɔ ni Luka kɛ gbɛnaa gbɛ́i tsu nii jogbaŋŋ lɛ sa kadimɔ waa, ejaakɛ kɛ́ Roma kpokpaa ko shikamɔ tsake lɛ, enɔkwɛlɔ lɛ hu gbɛnaa gbɛ́i lɛ tsakeɔ. Kɛlɛ, Biblia he nilelɔ Bruce Metzger kɛɛ akɛ: “Be babaoo lɛ, kɛ́ okwɛ be ni akɛwie saji ni atsɛ yisɛɛ yɛ Bɔfoi lɛ Asaji lɛ mli lɛ kɛ hei ni eba yɛ lɛ, onaa akɛ eja jogbaŋŋ.” Nilelɔ William Ramsay tsɛ Luka akɛ “yinɔsaneŋmalɔ ni nɔ bɛ kwraa.”