Ani oheɔ Biblia shiwoo akɛ abaatee gbohii ashi lɛ oyeɔ? * Kɛ́ wɔbaafo lɛ kuku lɛ, gbɛkpamɔ akɛ wɔkɛ wɔsuɔlɔi ni egboi lɛ baakpe ekoŋŋ lɛ ji miishɛɛ diɛŋtsɛ. Shi ani gbɛkpamɔ ni tamɔ nɛkɛ baaba mli lɛɛlɛŋ? Kɛha hetoo lɛ, ha wɔsusu Yesu Kristo kaselɔi lɛ anɔkwɛmɔnɔ lɛ he wɔkwɛ.

Kaselɔi lɛ ná hiɛnɔkamɔ ni mli wa yɛ gbohiiashitee lɛ mli. Mɛni hewɔ? Kɛ́ hooo lɛ, yɛ yiŋtoi enyɔ komɛi ahewɔ. Klɛŋklɛŋ lɛ, amɛhiɛnɔkamɔ lɛ damɔ yiŋtoo nɛɛ nɔ: Atee Yesu diɛŋtsɛ shi kɛjɛ gbohii ateŋ. Kaselɔi lɛ—kɛ “aaafee nyɛmimɛi 500 loo nɔ̃ shi kome”—na Yesu ni atee lɛ shi lɛ. (1 Korintobii 15:6) Kɛfata he lɛ, mɛi kpotoo ye Yesu shitee lɛ he odase ni amɛkpɛlɛ nɔ, taakɛ anaa yɛ Sanekpakpai ejwɛ lɛ amli lɛ.—Mateo 27:62–28:20; Marko 16:1-8; Luka 24:1-53; Yohane 20:1–21:25.

Nɔ ni ji enyɔ lɛ, kɛ́ kaselɔi lɛ enaaa fɛɛ po lɛ, amɛna ni Yesu tee gbohii etɛ ashi—klɛŋklɛŋ lɛ yɛ Nain, no sɛɛ lɛ Kapernaum, naagbee nɔ lɛ ba yɛ Betania. (Luka 7:11-17; 8:49-56; Yohane 11:1-44) Awie gbohiiashitee nɛɛ ateŋ naagbee nɔ lɛ he mra mli yɛ wolo nɛɛ mli, ni ekɔɔ weku ko ni Yesu kɛ amɛ bɔ kpaakpa lɛ he. Ha wɔtsale mli kɛkwɛ nɔ ni ba.

“Onyɛmi nuu lɛ baate shi.” Sane nɛɛ ji nɔ ni Yesu kɛɛ Marta, mɔ ni nyɛminuu, Lazaro egbo gbii ejwɛ sɔŋŋ lɛ. Shishijee lɛ Marta nuuu Yesu wiemɔ lɛ shishi. Marta to he ekɛɛ, “Mile akɛ ebaate shi,” shi eyasusu akɛ shitee lɛ baaba yɛ wɔsɛɛ be ko mli. Kwɛ bɔ ni Marta naa baakpɛ ehe eha sɛɛ mli beni enu ni Yesu kɛɛ, “Miji shitee lɛ kɛ wala lɛ,” ní ena ni Yesu tee enyɛminuu lɛ shi kɛjɛ gbohii ateŋ lɛ.—Yohane 11:23-25.

Nɛgbɛ Lazaro yɔɔ yɛ gbii ejwɛ ni nyiɛ egbele lɛ sɛɛ lɛ mli? Lazaro ewieee nɔ ko ni tsɔɔ akɛ no mli lɛ, eyɛ wala mli yɛ he ko yɛ nakai gbii ejwɛ lɛ mli. Lazaro bɛ susuma ko ni gbooo ni tee ŋwɛi. Shi ni Yesu tee Lazaro lɛ etsɔɔɔ akɛ Lazaro miiná ehewɔ miishɛɛ yɛ Nyɔŋmɔ masɛi yɛ ŋwɛi, kɛkɛ ni Yesu gbala lɛ kɛjɛ jɛmɛ kɛba shikpɔŋ lɛ nɔ. Kɛ́ nakai lɛ, nɛgbɛ Lazaro yɔɔ yɛ nakai gbii ejwɛ lɛ mli? No mli lɛ, anɔkwa, ewɔ yɛ gbonyobu mli.—Jajelɔ 9:5, 10.

Kaimɔ akɛ, Yesu kɛ gbele to wɔ ni awɔ he, nɔ mli ni abaatsĩɛ mɔ lɛ hiɛ kɛtsɔ gbohiiashitee nɔ. Amaniɛbɔɔ lɛ kaneɔ akɛ: “Wɔshieŋtsɛ Lazaro  ewɔ; shi miiya ni mayatsĩɛ lɛ yɛ wɔ lɛ mli. Kɛkɛ ni ekaselɔi lɛ kɛɛ: Nuŋtsɔ, kɛ́ wɔ ewɔ lɛ, no lɛ ehe baawa lɛ mɔ. Shi egbele he Yesu wie lɛ; shi amɛ lɛ amɛsusu akɛ wɔ kpakpa hewɔ ewie. Agbɛnɛ Yesu kɛɛ amɛ faŋŋ akɛ: Lazaro egbo.” (Yohane 11:11-14) Shi ni Yesu tee Lazaro lɛ tsɔɔ akɛ, ekɛ Lazaro wala ku sɛɛ eha lɛ, ni Lazaro na ewekumɛi ekoŋŋ. Mɛɛ nikeenii ni nɔ bɛ po Yesu kɛha nakai weku lɛ nɛkɛ!

Gbohii ashi ni Yesu tee beni eyɔɔ shikpɔŋ lɛ nɔ lɛ fee nɔ ni ebaafee wɔsɛɛ akɛ Nyɔŋmɔ Maŋtsɛyeli lɛ nɔ Maŋtsɛ lɛ he mfoniri. * Be mli ni Yesu ni yɔɔ ŋwɛi lɛ yeɔ shikpɔŋ lɛ nɔ Maŋtsɛ lɛ, ekɛ adesai ni ewɔ yɛ gbohii abui amli lɛ baaba wala mli ekoŋŋ. No hewɔ ni ekɛɛ akɛ: “Miji shitee lɛ.” Feemɔ miishɛɛ ni obaana kɛ́ ona osuɔlɔi lɛ ekoŋŋ lɛ he mfoniri okwɛ! Agbɛnɛ hu susumɔ miishɛɛ ni mɛi ni atee amɛ shi lɛ baana lɛ he okwɛ!—Luka 8:56.

Yesu kɛɛ Marta akɛ: “Mɔ ni heɔ minɔ eyeɔ lɛ, kɛji egbo tete lɛ, ehiɛ aaakã; ni mɔ fɛɛ mɔ ni hiɛ kã ni eheɔ minɔ eyeɔ lɛ, egboŋ gbi ko gbi ko kɛaatee naanɔ.” (Yohane 11:25, 26) Mɛi ni Yesu baatee amɛ shi yɛ e-afii akpe nɔyeli be lɛ mli lɛ baana hegbɛ akɛ amɛbaahi shi kɛya naanɔ—bei abɔ ni amɛjieɔ hemɔkɛyeli diɛŋtsɛ kpo yɛ emli lɛ.

Beni Yesu wie nakai saji ni sa kadimɔ waa yɛ gbohiiashitee lɛ he sɛɛ lɛ, ebi Marta sane ko ni haa mɔ susuɔ nii ahe jogbaŋŋ akɛ: “Oheɔ enɛ oyeɔ lo?” Marta ha lɛ hetoo ekɛɛ: ‘Hɛɛ, Nuŋtsɔ; miheɔ miyeɔ akɛ bo ji Kristo, Nyɔŋmɔ bi lɛ.’ (Yohane 11:26, 27) Ni bo hu—ani obaasumɔ ni oná hemɔkɛyeli ni Marta ná yɛ gbohiiashitee he hiɛnɔkamɔ lɛ mli lɛ eko? Nɔ klɛŋklɛŋ ni ebiɔ ni ofee ji oná Nyɔŋmɔ yiŋtoo kɛha adesai lɛ he nilee. (Yohane 17:3; 1 Timoteo 2:4) Nilee ni tamɔ nɛkɛ lɛ baaha oná hemɔkɛyeli. Mɛni hewɔ ni obiii Yehowa Odasefoi koni amɛtsɔɔ bo nɔ ni Biblia lɛ tsɔɔ yɛ sane nɛɛ he? Amɛbaaná he miishɛɛ akɛ amɛkɛ bo baasusu gbohiiashitee hiɛnɔkamɔ ni yɔɔ miishɛɛ lɛ he.