Biblia lɛ haa wɔleɔ akɛ, blema lɛ, akɛ aloe woɔ atadei kɛ saai amli ŋma. (Lala 45:9; Abɛi 7:17; Lalai amli Lala 4:14) Eeenyɛ efee akɛ yɛ Biblia beaŋ lɛ, akɛ tso ko ni atsɛɔ lɛ Agarwood lɛ ni feɔ aloe lɛ. Kɛ́ tso nɛɛ miikpɔtɔ lɛ, ama henɔ ko kɛ mu ni jeɔ ŋma jɛɔ mli. Awiɛɔ tso lɛ muɛmuɛ, ni no ji “aloe” ni ahɔɔ lɛ.

Biblia lɛ kɛɔ akɛ Israelbii lɛ abui lɛ tamɔ “aloe tsei ni Yehowa tɛo.” (4 Mose 24:5, 6) Ekolɛ bɔ ni Agarwood tso lɛ yɔɔ lɛ ji nɔ ni akɛtoɔ nii ahe yɛ biɛ lɛ. Tso nɛɛ baanyɛ akwɔ kɛyashɛ mitai 30, ni eniji lɛ amli lɛ́ɔ. Eyɛ mli akɛ tso nɛɛ eko bɛ Israel ŋmɛnɛ moŋ, shi wolo ko (A Dictionary of the Bible) tsɔɔ mli akɛ, “nɔ ko bɛ ni tsɔɔ akɛ aduuu tso nɛɛ kɛ tsei krokomɛi ni ŋmɛnɛ lɛ anaaa yɛ [jɛmɛ niiaŋ] lɛ yɛ Yordan Jɔɔ lɛ, ni no mli lɛ mɛi ayi fa yɛ jɛmɛ waa ni niiatsɛmɛi hu yɔɔ jɛmɛ lɛ.”

Nyɔŋmɔ Mla lɛ tsɔɔ akɛ esa akɛ afɔlei fɛɛ ni akɛhaa yɛ sɔlemɔwe lɛ afee nɔ ni hi fe fɛɛ. Afɔle ni kpa yɔɔ he lɛ esaŋ Nyɔŋmɔ hiɛ. (2 Mose 23:19; 3 Mose 22:21-24) Yudanyo woloŋmalɔ ko ni atsɛɔ lɛ Filo, ni hi shi yɛ klɛŋklɛŋ afii 100 Ŋ.B. lɛ, ŋma akɛ, yɛ ebeaŋ lɛ, osɔfoi lɛ kwɛɔ kooloi lɛ kɛjɛ “amɛyiteŋ kɛyashi amɛnajiashi” koni amɛkɛná nɔmimaa akɛ kooloi lɛ yɛ kpintiŋŋ ni “kpa ko loo tɔtɔmɔ ko kwraa bɛ amɛhe.”

Woloŋlelɔ E. P. Sanders tsɔɔ mli akɛ, eeenyɛ efee akɛ sɔlemɔwe onukpai lɛ “ha nihɔɔlɔi komɛi ni yeɔ anɔkwa ni hɔɔ kooloi ni akɛshãa afɔle lɛ hegbɛ ni amɛhɔɔ kooloi kɛ loofɔji ni osɔfoi lɛ etsɔ hiɛ ekwɛ lɛ pɛ. Yɛ gbɛjianɔtoo nɛɛ naa lɛ, esa akɛ nihɔɔlɔ lɛ aha mɔ ni ebahe nii lɛ nɔ ko ni tsɔɔ akɛ kpa ko kpa ko bɛ kooloo ni ehɔɔ eha lɛ lɛ he.”

Yɛ afi 2011 mli lɛ, mɛi ni tsaa shi amɛtaoɔ blema nibii lɛ yana naasɔomɔnɔ ko ni dalɛ tamɔ kaplɛ ni eye aaafee afii 2000 yɛ sɔlemɔwe lɛ kpokpaa lɛ nɔ. Naasɔomɔnɔ ni tamɔ nɛkɛ ji nɔ ni akɛhaa mɛi ni baheɔ kooloi lɛ. Atsɔɔ Aram wiemɔi enyɔ ni yɔɔ nɔ lɛ ashishi akɛ “Krɔŋŋ kɛha Nyɔŋmɔ.” Mɛi komɛi susuɔ akɛ sɔlemɔwe onukpai lɛ kɛ naasɔomɔnii nɛɛ tsotsoro nibii ni akɛtsuɔ nii yɛ jamɔŋ loo kooloi ni akɛyaashã afɔlei lɛ ahe.