Obaakpa gbɛ akɛ esa akɛ Nyɔŋmɔ Wiemɔ lɛ afee wolo ko ni yɔɔ srɔto kwraa yɛ woji krokomɛi ahe, ni nakai pɛpɛɛpɛ Biblia lɛ ji. Akala Biblia lɛ akpekpe toi akpei abɔ yɛ wiemɔi ohai abɔ amli. Nilee ni yɔɔ Biblia lɛ mli lɛ yɛ hewalɛ ni ekɛaatsake mɛi ni eha amɛshihilɛ ahi.—Kanemɔ 1 Tesalonikabii 2:13; 2 Timoteo 3:16.

Wɔle akɛ Biblia lɛ jɛ Nyɔŋmɔ ŋɔɔ, ejaakɛ nɔ fɛɛ nɔ ni ekɛɔ yɛ wɔsɛɛ he lɛ baa mli pɛpɛɛpɛ. Adesa ko kwraa bɛ hewalɛ ni ekɛaafee nakai. Akɛ nɔkwɛmɔnɔ lɛ, susumɔ Yesaia wolo lɛ he okwɛ. Ana wolo nɛɛ eko yɛ tɛkplo ko ni bɛŋkɛ Ŋshɔ ni Egbo lɛ mli. Aŋma wolo ni ayana nɛɛ nɔ ni fe afii 100 dani afɔ Yesu. Ekɛɔ akɛ Babilon maŋtiase lɛ baatsɔ amaŋfɔ̃. Nakai wiemɔ lɛ ba mli klɛŋklɛŋ kwraa yɛ Yesu shikpɔŋ nɔ sɔɔmɔ lɛ sɛɛ afii babaoo.—Kanemɔ Yesaia 13:19, 20; 2 Petro 1:20, 21.

Akɛ aaafee afii 1,600 ni ŋma Biblia lɛ. Mɛi aaafee 40 ni ŋma Biblia lɛ fɛɛ wie sane kome he, ni woji ni amɛŋmala lɛ eko eteee shi ewooo eko. Te fee tɛŋŋ ni amɛnyɛ amɛfee nakai lɛ? Nyɔŋmɔ ji mɔ ni kudɔ amɛ.—Kanemɔ 2 Samuel 23:2.

Nyɔŋmɔ kɛ mɛi ni ŋma Biblia lɛ wie kɛtsɔ bɔfoi, ninai, loo lamɔi anɔ. Shi bei pii lɛ, Nyɔŋmɔ kɛ esusumɔ lɛ woɔ amɛjwɛŋmɔŋ koni amɛ diɛŋtsɛ amɛhala wiemɔi ni amɛkɛbaatsu nii kɛŋma sane ni ekɛha amɛ lɛ.—Kanemɔ Kpojiemɔ 1:1; 21:3-5.