Ani osɔleɔ daa? Mɛi pii sɔleɔ daa, ni mɛi ni heee yeee akɛ Nyɔŋmɔ yɛ lɛ po sɔleɔ. Shi mɛni hewɔ asɔleɔ? Niiamlitaomɔ ko ni afee yɛ France lɛ tsɔɔ akɛ, kɛ́ aja Francebii lɛ amli enyɔ lɛ, fã kome sɔleɔ loo amɛjwɛŋɔ nii anɔ bei komɛi koni “amɛhe ajɔ amɛ kɛkɛ.” Amɛsɔleee ni amɛkɛja Nyɔŋmɔ, ni nakai eji yɛ Yuropabii krokomɛi hu agbɛfaŋ. Moŋ lɛ, amɛsɔleɔ koni “amɛtsui anyɔ amɛmli.” Yɛ mɛi ni heɔ Nyɔŋmɔ nɔ amɛyeɔ lɛ ateŋ mɛi komɛi agbɛfaŋ lɛ, ja amɛhe efĩ amɛ dani amɛsɔleɔ, kɛ gbɛkpamɔ akɛ Nyɔŋmɔ baatsu amɛnibimɔi lɛ ahe nii amrɔ nɔŋŋ.—Yesaia 26:16.

Ni bo hu? Ani onaa sɔlemɔ akɛ nɔ ko ni yeɔ ebuaa wɔ ni wɔjwɛŋmɔŋ akã wɔ shi kɛkɛ? Kɛ́ oheɔ Nyɔŋmɔ nɔ oyeɔ lɛ, ani onaa akɛ sɔlemɔ tsuɔ nɔ ko yɛ oshihilɛ mli? Aloo onuɔ he akɛ ebooo osɔlemɔi atoi? Biblia lɛ baanyɛ aye abua bo ni ona akɛ sɔlemɔ jeee nɔ ko ni hãa mɔ he jɔɔ lɛ kɛkɛ, shi moŋ eji gbɛ ni nɔ bɛ ni atsɔɔ nɔ abɛŋkɛɔ Nyɔŋmɔ.