Kɛ́ akɛɛ juu kɛ fɔ̃ miiya nɔ yɛ nɔyeli ko mli lɛ, etsɔɔ akɛ hiɛnyiɛlɔi lɛ kɛ hegbɛ ni amɛyɔɔ lɛ tsuɔ nii yɛ gbɛ ni amɛ pɛ amɛbaaná he sɛɛ lɛ nɔ. Jeee ŋmɛnɛ kwraa nifeemɔ nɛɛ je shishi. Akɛ nɔkwɛmɔnɔ lɛ, mlai ni akɛhã yɛ Biblia lɛ mli lɛ eko tsɔɔ akɛ, esaaa akɛ aheɔ nyɔɔŋnii yɛ saneyeli mli, ni tsɔɔ akɛ juu kɛ fɔ̃ ehi shi nɔ ni fe afii 3,500. (2 Mose 23:8) Yɛ anɔkwale mli lɛ, kɛ́ aawie juu kɛ fɔ̃ he lɛ, jeee nyɔɔŋnihemɔ pɛ he ekɔɔ. Bei komɛi lɛ, maŋ onukpai ni yeee anɔkwa lɛ juɔ nibii, amɛkɛ hegbɛ ni amɛyɔɔ lɛ tsuɔ nii koni amɛná nibii komɛi ni ejeee amɛgbɛnaa, aloo amɛjuɔ maŋ shika po. Bei komɛi po lɛ amɛkɛ hegbɛ ni amɛyɔɔ lɛ tsuɔ nii koni amɛnanemɛi kɛ amɛwekumɛi pɛ aná he sɛɛ.

Eyɛ mli akɛ juu kɛ fɔ̃ baanyɛ aya nɔ yɛ adesai agbɛjianɔtoi fɛɛ amli moŋ, shi etamɔ nɔ ni juu kɛ fɔ̃ ni yaa nɔ yɛ nɔyelii amli lɛ ehiii kwraa. Wolo ko (Global Corruption Barometer) ni Transparency International lɛ kala yɛ afi 2013 lɛ tsɔɔ mli akɛ, mɛi ni yɔɔ je lɛŋ hei srɔtoi fɛɛ lɛ susuɔ akɛ gbɛjianɔtoi enumɔ ni juu kɛ fɔ̃ ehe shi waa yɛ mli ji, maŋkwramɔŋ kui, polisifoi, maŋ onukpai, maŋ mlawolɔi, kɛ maŋ akuashɔŋ. Susumɔ amaniɛbɔi fioo komɛi ni tsɔɔ nakai lɛ ahe okwɛ.

• AFRIKA: Yɛ afi 2013 lɛ, atsɔɔ akɛ maŋ onukpai aaafee 22,000 ni yɔɔ South Africa lɛ kɛ amɛhe wo juu kɛ fɔ̃ mli.

• SOUTH AMERICA: Yɛ afi 2012 lɛ, abu mɛi 25 fɔ yɛ Brazil akɛ amɛju maŋ lɛ shika kɛyatsu amɛmaŋkwramɔŋ kuu lɛ saji ahe nii. Ni tsutsu mɔ ni kwɛɔ maŋ lɛ nɔ kɛ́ nɔyelɔ lɛ bɛ lɛ fata mɛi ni abu amɛ fɔ lɛ he.

• ASIA: Yɛ afi 1995 yɛ Seoul ni yɔɔ South Korea lɛ, mɛi 502 gboi yɛ tsu wulu ko ni shwapoi srɔtoi yɔɔ mli ni kumɔ lɛ mli. Be ni abote saji amli lɛ, ana akɛ tsumalɔi lɛ yahã maŋ onukpai ni kwɛɔ tsumaa nɔ lɛ nyɔɔŋ nii, ni aŋmɛ amɛgbɛ ni amɛkɛ nibii ni ehiii ma tsu lɛ.

• YUROPA: Cecilia Malmström, ni ji European Commission Home Affairs lɛ onukpa lɛ wie akɛ: “Bɔ ni [juu kɛ fɔ̃ etee hiɛ yɛ Yuropa] lɛ yɛ gbeyei waa diɛŋtsɛ.” Ekɛfata he akɛ, “etamɔ nɔ ni maŋkwralɔi lɛ nyɛɛɛ atsu amɛsɔ̃ akɛ amɛhã juu kɛ fɔ̃ sɛɛ afo lɛ he nii.”

Ewa waa akɛ adesai baafo juu kɛ fɔ̃ ni yaa nɔ yɛ maŋkwramɔŋ gbɛjianɔtoi amli lɛ sɛɛ. Woloŋlelɔ kpanaa ko ni atsɛɔ lɛ Susan Rose-Ackerman, ni ekase bɔ ni akuɔ juu kɛ fɔ̃ naa lɛ ŋma akɛ, dani abaanyɛ atsu naagba nɛɛ he nii lɛ, ebaabi ni afee “tsakemɔi yɛ bɔ ni nɔyeli lɛ toɔ enitsumɔi ahe gbɛjianɔ ehãa lɛ mli.” Eyɛ mli akɛ shihilɛ lɛ efee tamɔ nɔ ni hiɛnɔkamɔ ko kwraa bɛ moŋ, shi Biblia lɛ hãa wɔnáa nɔmimaa akɛ tsakemɔi wuji baaba lɛɛlɛŋ.