Aaafee afii 3,000 ni eho nɛ lɛ, lala wiemɔ ŋmalɔ ko ŋma akɛ: “Bɔ ni atsɔ afee mi lɛ yɛ gbeyei kɛ naakpɛɛ.” (Lala 139:14) Kɛ́ osusu bɔ ni walayibii kuli kome daa ni ebatsɔɔ abifao lɛ he lɛ, ani efeee bo naakpɛɛ? Mɛi babaoo kɛɔ akɛ Bɔlɔ ko ji mɔ ni bɔ nibii fɛɛ ni wala yɔɔ mli lɛ.—Kanemɔ Lala 139:13-17; Hebribii 3:4.

Mɔ ni bɔ jeŋ muu lɛ fɛɛ, ni eto shikpɔŋ lɛ he gbɛjianɔ bɔ ni abaanyɛ ahi nɔ lɛ bɔ wala hu. (Lala 36:10) Ehã adesai ele ehe saji babaoo.—Kanemɔ Yesaia 45:18.

Wɔgbɔmɔtsei lɛ je kooloi anɔ yɛ gbɛi babaoo nɔ. Shi nɔ hewɔ ni eyɔɔ nakai ji akɛ, Bɔlɔ lɛ bɔ gbɔmɛi kɛ kooloi fɛɛ ni amɛhi shikpɔŋ lɛ nɔ. Ebɔ klɛŋklɛŋ adesa lɛ kɛjɛ su mli, shi jeee kooloo ko mli.—Kanemɔ 1 Mose 1:24; 2:7.

Esoro adesai yɛ kooloi ahe yɛ gbɛi titrii enyɔ komɛi anɔ. Klɛŋklɛŋ lɛ, adesai nyɛɔ amɛleɔ nii, amɛjieɔ suɔmɔ kpo, ni amɛbuɔ Bɔlɔ lɛ. Nɔ ni ji enyɔ lɛ, abɔ adesai ni amɛhi shi kɛya naanɔ, shi abɔɔɔ kooloi ni amɛhi shi kɛya naanɔ. Shi amrɔ nɛɛ, mɛi fɛɛ gboiɔ ejaakɛ klɛŋklɛŋ gbɔmɔ lɛ kpoo gbɛtsɔɔmɔ ni Bɔlɔ lɛ kɛhã lɛ lɛ.—Kanemɔ 1 Mose 1:27; 2:15-17.