KƐ́ ATSĨ tumo tã lɛ, mɛni baa ojwɛŋmɔ mli? Ekolɛ nɔ ni baa ojwɛŋmɔ mli nɔŋŋ ji, jwɛi kɛ fũ. No hewɔ lɛ ebaawa akɛ obaasusu akɛ abaana nɔ ko ni jara wa yɛ jɛmɛ, aahu po ni abaana jwetri.

Kɛ̃lɛ, afii 100 ni eho nɛ lɛ, ana nɔ ko tamɔ nakai yɛ tumo ko nɔ. Nɔ ni ana lɛ jeee jwetri diɛŋtsɛ, shi eji nɔ ko ni jara wa waa. Mɛni tuuntu ana lɛ? Mɛni hewɔ ehe yɔɔ sɛɛnamɔ kɛhã wɔ ŋmɛnɛ lɛ?

Yɛ afi 1900 afii lɛ shishijee gbɛ lɛ, Bernard P. Grenfell kɛ Arthur S. Hunt, ni ji woloŋlelɔi kpanai yɛ Oxford University lɛ tee Ejipt. Be ni amɛyɔɔ jɛmɛ lɛ, amɛna woji bibii komɛi ni akɛ niji ŋmala yɛ tumo ko ni yɔɔ Nilo Jɔɔ lɛ mli lɛ nɔ. Sɛɛ mli yɛ afi 1920 be ni amɛtoɔ woji ni amɛyana lɛ he gbɛjianɔ lɛ, Grenfell hé woji bibii krokomɛi ni atsa shi ana yɛ Ejipt lɛ efata he. Ehé ehã John Rylands Library ni yɔɔ Manchester, yɛ England lɛ. Shi hii enyɔ nɛɛ fɛɛ gboi dani agbe woji bibii nɛɛ ahe gbɛjianɔtoo lɛ naa.

Colin H. Roberts, ni ji woloŋlelɔ kpanaa kroko ni yɔɔ Oxford University lɛ, gbe nitsumɔ lɛ naa. Be ni ehalaa woji bibii lɛ amli lɛ, ena eko ni etsɛrɛ fioo, ni ekɛlɛ ji sɛntimitai 9 kɛ elɛɛmɔ sɛntimitai 6. Ena ni aŋma nɔ ko yɛ Hela mli yɛ nɔ, ni eji wiemɔi ni ele, ni no hã enaa kpɛ ehe waa. Aŋma wiemɔi ni yɔɔ Yohane 18:31-33 lɛ yɛ ehiɛgbɛ. Ni aŋma Yohane 18:37, 38 lɛ mli wiemɔi lɛ ekomɛi hu yɛ esɛɛgbɛ. Roberts yɔse akɛ eto jwetri ko ni jara wa waa ahu.

Roberts na akɛ etamɔ nɔ ni wolo bibioo ni ehiɛ lɛ etsɛ waa. Shi afii enyiɛ nɛkɛ eye? Bɔ ni afee ni ele be mli ni aŋma lɛ, ekɛ enɔ niŋmai lɛ to blema nɔ krokomɛi ni akɛ niji ŋmala lɛ ahe—atsɛɔ nifeemɔ nɛɛ paleography. Kɛtsɔ nɛkɛ gbɛ nɔ lɛ, enyɛ eka eyiŋ yɛ be mli ni aŋma lɛ he. Shi eetao ená nɔmimaa yɛ be lɛ he. No hewɔ lɛ, eshá wolo lɛ mfoniri ni ekɛ eko yahã mɛi etɛ komɛi ni tsuɔ woji ni tamɔ nakai lɛ ahe nii, koni amɛ hu amɛtsɔɔ afii abɔ ni eye. Mɛni mɛi nɛɛ na?

Be ni mɛi etɛ lɛ fɛɛ kwɛ niŋmai lɛ jogbaŋŋ lɛ, amɛ fɛɛ amɛmu sane naa akɛ aŋma aaafee afi 125 Ŋ.B.—bɔfo Yohane gbele sɛɛ afii nyɔŋmai fioo komɛi! Shi gbɛ ni amɛtsɔ nɔ amɛtsɔɔ be ni aŋma lɛ jeee gbɛ ni ja kɛmɔ shi ni hãa anaa be ni akɛŋmala blema woji ni akɛ niji ŋmala lɛ, no hewɔ lɛ woloŋlelɔ kroko hu tsɔɔ akɛ, eeenyɛ efee akɛ aŋma yɛ afi 100 Ŋ.B. afii lɛ amli. Kɛ̃lɛ, wolo bibioo ni akɛ nine ŋma nɛɛ ji Kristofoi a-Hela Ŋmalɛi lɛ fã ko ni etsɛ fe fɛɛ ni ana ni yɔɔ ŋmɛnɛ.

Mɛni hewɔ Yohane Sanekpakpa lɛ fã ko ni ana nɛɛ he hiaa mɛi ni sumɔɔ Biblia lɛ ŋmɛnɛ lɛ waa lɛ? Kɛ́ hooo kwraa lɛ yɛ yiŋtoi enyɔ komɛi ahewɔ. Klɛŋklɛŋ lɛ, bɔ ni wolo bibioo lɛ yɔɔ lɛ hãa wɔnaa bɔ ni mra be mli Kristofoi lɛ nya Ŋmalɛi lɛ ahe.

Yɛ afi 100 Ŋ.B. afii lɛ amli lɛ, abɔi niŋmaa yɛ wolokpoi kɛ kodɛs anɔ. Adaa (papyrus) loo kooloi ahewoji ni akpɛ kɛtsara kakadaŋŋ ji nɔ ni  akɛfee wolokpoi. Abaanyɛ akota loo agbele mli. Bei pii lɛ, aŋmaa nii yɛ wolokpoi lɛ ahiɛgbɛ pɛ.

Shi yɛ wolo bibioo ni Roberts na lɛ gbɛfaŋ lɛ, aŋma nii yɛ ehiɛ kɛ esɛɛ fɛɛ. Enɛ tsɔɔ akɛ, ebaanyɛ efee akɛ eji kodɛs ko fã, shi jeee wolokpo ko fã. Kooloi ahewoji loo adaa ni akpɛ kɛtsara ní akota lɛ tamɔ wolo ni agbeleɔ ji nɔ ni akɛfee kodɛs.

Mɛɛ gbɛi anɔ abaanyɛ akɛɛ akɛ kodɛs lɛ hi fe wolokpoi lɛ? Mra be mli Kristofoi lɛ ji sane kpakpa jajelɔi. (Mateo 24:14; 28:19, 20) Amɛshiɛ Biblia mli sane lɛ yɛ he fɛɛ he ni amɛna mɛi yɛ—shĩai amli, jaji anɔ, kɛ gbɛjegbɛi ahe hu. (Bɔfoi 5:42; 17:17; 20:20) No hewɔ lɛ, Ŋmalɛi lɛ ni afee lɛ ekome tamɔ wolo ni amɛnine shɛ nɔ lɛ ye ebua amɛ waa.

Asafoi kɛ aŋkroaŋkroi kwɛ kodɛs lɛ nɔ amɛŋmala Ŋmalɛi lɛ ekomɛi amɛhã amɛhe. No hewɔ lɛ, mɛi ŋmala Sanekpakpai lɛ shii abɔ, ni ekã shi faŋŋ akɛ no hã Kristojamɔ shwere.

Yiŋtoo kroko hewɔ ni wolo bibioo ni ana ni akɛtee Rylands Library lɛ he hiaa ŋmɛnɛ lɛ ji, ehãa anaa akɛ nɔ ni akwɛ blema Biblia lɛ nɔ aŋmala lɛ ja. Eyɛ mli akɛ Yohane Sanekpakpa lɛ mli kukuji fioo komɛi pɛ yɔɔ wolo bibioo lɛ ni ana lɛ nɔ moŋ, shi nɔ ni aŋmala yɛ nɔ lɛ kɛ nɔ ni yɔɔ Biblia ni wɔkaneɔ ŋmɛnɛ lɛ mli lɛ kpãa gbee. Belɛ, wolo bibioo ni ana ni akɛtee Rylands Library lɛ tsɔɔ akɛ, nibii ni yɔɔ Biblia lɛ mli lɛ tsakeko, eyɛ mli akɛ akwɛ nɔ aŋmala shii abɔ.

Anɔkwa, Yohane Sanekpakpa lɛ fã ko ni ana ni akɛtee Rylands Library lɛ ji odaseyeli kome ni maa nɔ mi akɛ, Biblia srɔtoi ni akwɛ blema nɔ lɛ nɔ aŋmala lɛ ja, ni ana woji bibii akpekpei abɔ krokomɛi hu ni maa nɔ mi nakai. Yɛ wolo ko (The Bible as History) ni Werner Keller ŋma lɛ mli lɛ, emu sane naa akɛ: “Nɛkɛ Blema [woji ni akɛ niji ŋmala] nɛɛ ji nɔ titri ni hãa anaa akɛ, nibii ni yɔɔ Biblia ni wɔkɛtsuɔ nii ŋmɛnɛ lɛ mli lɛ ja, ni abaanyɛ akɛ he afɔ̃ nɔ.”

Anɔkwale sane ji akɛ, Kristofoi lɛ ahemɔkɛyeli lɛ damɔɔɔ nibii ni atsa shi ana lɛ nɔ. Amɛheɔ amɛyeɔ akɛ, “Ŋmalɛ lɛ fɛɛ jɛ Nyɔŋmɔ mumɔ lɛŋ.” (2 Timoteo 3:16) Fɛɛ sɛɛ lɛ, wɔnáa miishɛɛ waa kɛ́ blema jwetrii tamɔ nɛkɛ lɛ ma nɔ ni Biblia lɛ ewie jeeŋmɔ akɛ: “Yehowa wiemɔ lɛ hiɔ shi kɛyaa naanɔ” lɛ nɔ mi lɛ!—1 Petro 1:25.