Yɛ blema lɛ, Nyɔŋmɔ kɛ kojolɔi tsu nii bɔ ni afee ni akaye ewebii lɛ sane ni ejaaa. (Kojolɔi 2:18) Biblia lɛ tsɔɔ akɛ, Kojomɔ Gbi ni baaba wɔsɛɛ lɛ baafee miishɛɛ be, ejaakɛ Yehowa, ni ji jeŋ muu fɛɛ Kojolɔ lɛ baahere adesai fɛɛ kɛjɛ jalɛsane ni ayeee lɛ mli.—Kanemɔ Lala 96:12, 13; Yesaia 26:9.

Nyɔŋmɔ ehala Yesu koni ekojo hiɛkalɔi kɛ gbohii fɛɛ yɛ jalɛ naa. (Bɔfoi 10:42; 17:31) Mɛi babaoo gboi ní amɛnaaa amɛle Nyɔŋmɔ he nɔ ko. Yɛ Kojomɔ Gbi lɛ nɔ lɛ, Yesu baatee mɛi nɛɛ ashi kɛba wala mli koni amɛnyɛ amɛbale anɔkwa Nyɔŋmɔ lɛ ni amɛsumɔ lɛ.—Kanemɔ Bɔfoi 24:15.

Abaatee gbohii lɛ ashi yɛ afii akpe lɛ mli. (Kpojiemɔ 20:4, 12) Ehe baahia ni amɛná be kɛkase Nyɔŋmɔ he nii, ni amɛbo lɛ toi. Nɔ ni tamɔɔɔ susumɔi ni mɛi hiɛ yɛ gbohiiashitee lɛ he ŋmɛnɛ lɛ, Biblia lɛ tsɔɔ akɛ, abaadamɔ nibii ni mɛi baafee be ni atee amɛshi sɛɛ lɛ nɔ akojo amɛ.—Kanemɔ Romabii 6:7.

Biblia lɛ wieɔ kojomɔ gbi ko ni baaba trukaa dani afii akpe lɛ baaje shishi lɛ hu he. Atsɛɔ nakai gbi lɛ hu akɛ naagbee lɛ, taakɛ awie he yɛ wolo nɛɛ shishijee saji lɛ amli lɛ. Nyɔŋmɔ baakpata mɛi fɔji kɛ mɛi ni yi wa lɛ fɛɛ ahiɛ yɛ nakai gbi lɛ nɔ. (2 Petro 3:7) No hewɔ lɛ, esa akɛ wɔbɔ mɔdɛŋ wɔfee nibii ni baatsɔɔ akɛ wɔsumɔɔ Nyɔŋmɔ.—Kanemɔ 2 Petro 3:9, 13.