Mida yɛ Montreal maŋtiase lɛ mli he ko ni nitsumɔ bɛ jɛmɛ tsɔ. Be ni miná nyɔji ekpaa lɛ, mipapa gbo, ni eshwɛ mimami pɛ ni baakwɛ shĩa lɛ. Afɔ wɔyi kpaanyɔ, ni miji naagbee mɔ.

Be ni midaa lɛ, mikɛ mihe wo tsofai ni akɛtsuɔ nii yɛ gbɛ ni ejaaa nɔ, asɔshwɛmɔ, kɛ yiwalɛ nifeemɔi amli be fɛɛ be, ni mikɛ awuiyelɔi hu bɔ. Be ni miye afii nyɔŋma lɛ, mibatsɔ abɔifonyo mihã ashawoi kɛ mɛi ni kɛ shika faa ni amɛheɔ hekpa fe nine. Mibatsɔ mɔ ni maleɔ waa, ni misumɔɔ akɛ matsɔ gbɛ fɛɛ gbɛ nɔ mashishiu mɛi. Enɛ feemɔ batsɔ tamɔ tsofa ni mikɔɔ.

Be ni mináa afii 14 lɛ, mihe esa waa kɛ mɛi shishiumɔ. Akɛ nɔkwɛmɔnɔ lɛ, miyaheɔ watsii, nineshinii, kɛ gai babaoo ní akɛ shika tsuru eha he, ni mikɛ kadimɔ nii ŋmaa yɛ he akɛ, shika tsuru ŋmiiŋmi (14-carat gold), ni miyahɔ̃ɔ yɛ gbɛjegbɛi ahe kɛ tsɔji amaamɔhei ni yɔɔ hei ni shwapoi yɔɔ. Misumɔɔ waa ni matsɔ gbɛ ni waaa nɔ maná shika. Be ko lɛ, miná dɔlai 10,000 yɛ gbi kome mli!

Be ni miye afii 15 lɛ, ashwie mi kɛje skul ni akɛ gbekɛbii fɔji yaa koni amɛtsake lɛ, ni mináaa he ko mahi. Miwɔ gbɛjegbɛi ahe, shwɛmɔhei, loo minanemɛi ashĩai.

Akɛni mishishiuɔ mɛi hewɔ lɛ, polisifoi fɔɔ midaŋ taa. Shi akɛni jeee juu nii mihɔ̃ɔ hewɔ lɛ, awooo mi tsuŋ. Kɛ̃lɛ, bei pii lɛ, agbeɔ mi shika gbele babaoo akɛni mishishiuɔ mɛi, mitswaa ojo, ni mihɔ̃ɔ nii ni mibɛ gbɛŋmɛɛ wolo lɛ hewɔ. Akɛni misheee mɔ ko mɔ ko gbeyei hewɔ lɛ, miyabiɔ nyɔmɔ mihãa mɛi ni kɛ shika faa ni amɛheɔ hekpa fe nine lɛ po. Nitsumɔ nɛɛ yɛ oshara waa, ni bei komɛi lɛ mihiɛɔ tu yɛ mihe. Bei komɛi po lɛ, mikɛ awuiyelɔi akuu tsuɔ nii.

Be klɛŋklɛŋ ni miná mile Biblia lɛ he sane lɛ, no mli lɛ miye afii 17 pɛ. No mli lɛ, mikɛ tsiɛyoo ko yɔɔ, ni Yehowa Odasefoi kɛ lɛ bɔi Biblia lɛ kasemɔ. Shi minu he akɛ nɔ ni Biblia lɛ wieɔ yɛ jeŋba  he lɛ yɛ kpɛŋŋ tsɔ, no hewɔ lɛ, mishi lɛ ni mikɛ tsiɛyoo kroko ní no mli lɛ mikɛ lɛ nyiɛ lɛ yahi shi.

Nibii bɔi tsakemɔ yɛ migbɛfaŋ be ni Odasefoi lɛ kɛ mitsiɛyoo ni ji enyɔ lɛ hu bɔi nikasemɔ lɛ! Efee tsakemɔi yɛ eshihilɛ mli, ni miná bɔ ni ebɔi etsui shi too, kɛ bɔ ni ehe bɔi jɔɔ lɛ he miishɛɛ waa. Afɔ̃ mi nine akɛ miba Yehowa Odasefoi akpee yɛ amɛ-Maŋtsɛyeli Asa lɛ nɔ, ni mitee. Mɛi ni yɔɔ jɛmɛ lɛ ahe tse ni amɛmli hi hu, ni amɛhere mi hiɛmɛɛ. Esoro amɛ kwraa yɛ mɛi ni mikɛsharaa lɛ ahe! Miwekumɛi ejieko suɔmɔ ni tamɔ nɛkɛ kpo amɛtsɔko mi pɛŋ; migbekɛbiiashi fɛɛ lɛ, ajieee suɔmɔ kɛ hedɔɔ kpo atsɔɔɔ mi. Suɔmɔ ni Yehowa Odasefoi lɛ jie kpo amɛtsɔɔ mi lɛ ji nɔ tuuntu ni mitao aahu. Be ni Odasefoi lɛ kɛɛ amɛkɛ mi baakase Biblia lɛ, mikɛ miishɛɛ kpɛlɛ nɔ.

Eeenyɛ efee akɛ nɔ ni mikaseɔ kɛjɛɔ Biblia lɛ mli lɛ here miyiwala. Mikɛ webii enyɔ komɛi kpaŋ akɛ wɔbaayaju, bɔ ni afee ni maná shika kɛwo nyɔmɔ ni mimɔ yɛ asɔshwɛmɔ mli, ní fa fe dɔlai 50,000 lɛ. Shi eŋɔɔ minaa waa akɛ mikɛ amɛ eyaaa! Miwebii enyɔ lɛ tee amɛyaju. Amɔ mɔ kome, ni agbe mɔ kroko lɛ.

Mitee nɔ mikase Biblia lɛ, ni mibana akɛ ehe miihia ni mafee tsakemɔi babaoo. Akɛ nɔkwɛmɔnɔ lɛ, mibana nɔ ni Biblia lɛ wieɔ yɛ 1 Korintobii 6:10 lɛ; jɛmɛ kɛɔ akɛ: “Julɔi, amimyelɔi, dãatɔlɔi, mɛi ajɛlɔi, kɛ ojotswalɔi anine shɛŋ Nyɔŋmɔ Maŋtsɛyeli lɛ nɔ.” Be ni mikane nakai ŋmalɛ lɛ, mifo, ejaakɛ mina akɛ shihilɛ ni miyɔɔ mli lɛ yɛ hiɛdɔɔ waa. Mibayɔse akɛ, ehe miihia ni matsake mishihilɛ kwraa. (Romabii 12:2) No mli lɛ, miyitsoŋ wa waa, mihiɛ yɛ laŋlaŋ, ni mimaleɔ waa.

Shi mikase kɛjɛ Biblia lɛ mli hu akɛ, Yehowa naa mɔbɔ, ni ekɛ eshai faa. (Yesaia 1:18) Misɔle waa mikpa Yehowa fai koni eye ebua mi ní matsi mihe kɛje mitsutsu shihilɛ lɛ he. Eye ebua mi, ni fiofio lɛ minyɛ mitsake mijeŋba. Tsakemɔ ko ni he hiaa waa ni mifee ji, mi kɛ mitsiɛyoo lɛ kɛ wɔgbãlã lɛ yawo mla shishi.

Nakai beiaŋ lɛ miye afii 24, ni miyɛ ŋa kɛ bii etɛ. Agbɛnɛ, esa akɛ maná nitsumɔ ni mla ŋmɛɔ gbɛ matsu. Shi miskulyaa faaa, ni mibɛ mɔ ko hu ni baajie miyi kɛhã nitsumɔ taomɔ. Shi kome ekoŋŋ lɛ, misɔle waa mihã Yehowa. Kɛkɛ ni miyi mli koni miyatao nitsumɔ. Mikɛɛ nitsumɔtsɛmɛi lɛ akɛ miisumɔ ni matsake mijeŋba, ní mikɛ anɔkwayeli atsu nii. Bei komɛi lɛ, mikɛɔ amɛ akɛ miikase Biblia lɛ, ni miitao matsɔ maŋnyo kpakpa. Miyana nitsumɔtsɛmɛi pii, shi amɛheee mi. Naagbee lɛ, mitee he kroko hu, ni be ni abibiɔ mi saji lɛ, miwie mitsutsu shihilɛ lɛ he faŋŋ. Kɛkɛ ni mɔ ni biɔ mi saji lɛ wie akɛ: “Mileee nɔ hewɔ, shi nɔ ko miikɛɛ mi akɛ mihe bo.” Mina akɛ, misɔlemɔ lɛ hetoo nɛ. Sɛɛ mli lɛ, abaptisi mi kɛ miŋa fɛɛ akɛ Yehowa Odasefoi.

Ŋmɛnɛ lɛ, miyɛ wala mli akɛni mikɛ Biblia mli shishitoo mlai tsuɔ nii, ní mibaa mijeŋ akɛ Kristofonyo lɛ hewɔ. Miyɛ weku ni yɛ miishɛɛ waa. Akɛni mile akɛ Yehowa kɛ mihe eshai lɛ efa mi hewɔ lɛ, mihenilee eyiii mi.

Afii 14 nɛ lɛ, mikɛ ŋmɛlɛtswai 70 shiɛɔ daa nyɔɔŋ nɔ, ni miiwa mɛi koni amɛkase Biblia lɛ, ni nyɛsɛɛ nɛɛ, miŋa hu ebafata mihe yɛ nitsumɔ nɛɛ mli. Eŋɔɔ minaa waa akɛ yɛ afii 30 ni eho lɛ mli lɛ, miye mibua mɛi ni mikɛtsuɔ nii lɛ ateŋ mɛi 22 ni amɛbɔi Yehowa sɔɔmɔ. Miyaa shwapoi anaa lolo—shi jeee ni miyashishiu mɛi taakɛ mifeɔ tsutsu lɛ. Amrɔ nɛɛ, kɛ́ mitee jɛmɛ lɛ, bei pii lɛ, mikɛ mɛi gbaa mihemɔkɛyeli lɛ he sane. Miisumɔ ni mahã amɛ nɔ ko, no ji: hiɛnɔkamɔ akɛ wɔsɛɛ lɛ, amɛbaanyɛ amɛhi shi yɛ jeŋ ko ni shishiulɔi bɛ mli lɛ mli.—Lala 37:10, 11.