Paul ni yɔɔ ŋa kɛ bii enyɔ lɛ wie akɛ: “Be ni shika he bawa waa yɛ wɔmaŋ lɛ mli lɛ, niyenii jara tee ŋwɛi waa, ni eshɛ he ko po ni anaaa niyenii. Wɔtoɔ sɛrɛnɛɛ yɛ niyenii he ŋmɛlɛtswai abɔ, shi bei pii lɛ, be ni ebaakɛɛ eshɛɔ wɔnɔ lɛ, niyenii lɛ etã. Hɔmɔ hã mɛi tãra loo gbeyeigbeyei, ni nɔ nyɔnyɔɔ mɛi komɛi anɔ yɛ gbɛjegbɛi anɔ po. Nibii bibii po ajara yashɛ akpekpei abɔ, ni sɛɛ mli lɛ etee akpekpe toi akpei po. Naagbee lɛ, maŋ lɛ shika lɛ gbee shi kwraa. Mishika ni yɔɔ shikatoohe, mi-ŋshuɔransi, kɛ mipɛnshɛŋ shika fɛɛ ŋmɛɛ mi.”

Paul le akɛ, kɛ́ eweku lɛ baanyɛ atsɔ shihilɛ nɛɛ mli lɛ, esa akɛ ekɛ “ŋaawoo ni hi, [loo hiɛshikamɔ, NW]” atsu nii. (Abɛi 3:21) Ewie akɛ: “No mli Iɛ, ilɛtrishɛŋ ji mi, shi mitsu nitsumɔ fɛɛ ni minine baashɛ nɔ, eyɛ mli akɛ nyɔmɔwoo lɛ faaa kwraa. Mɛi komɛi kɛ niyenii loo nibii krokomɛi woɔ mi nyɔmɔ. Kɛ́ akɛ samla tsei ejwɛ wo mi nyɔmɔ lɛ, mikɔɔ enyɔ ni mihɔ̃ɔ enyɔ. Fee sɛɛ lɛ, mibaná wuɔbii 40. Be ni amɛdara lɛ, mihɔ̃ɔ ni misaa mihe wuɔbii 300. Sɛɛ mli lɛ, mikɛ wuɔbii 50 yatsake ablemamu kotokui enyɔ, ni ekome tsiimɔ ji kilogram 50. Enɛ mikɛkwɛ miweku lɛ kɛ wekui krokomɛi hu bei babaoo.”

Paul le hu akɛ gbɛ ni hi fe fɛɛ ni mɔ ko baanyɛ akɔ ji, ni ekɛ ehiɛ baafɔ Nyɔŋmɔ nɔ. Nyɔŋmɔ yeɔ ebuaa wɔ kɛ́ wɔfee nɔ ni efãa wɔ akɛ wɔfee lɛ. Yesu wie kɛkɔ shihilɛ mli hiamɔ nibii ataomɔ he akɛ: “Nyɛkpaa yeyeeyefeemɔ tuutu; ejaakɛ . . . nyɛ-Tsɛ lɛ le akɛ nibii nɛɛ ahe miihia nyɛ.”—Luka 12:29-31.

Dɔlɛ sane ji akɛ, Satan, ni ji Nyɔŋmɔ henyɛlɔ ni fe fɛɛ lɛ ehã mɛi babaoo kɛ amɛjwɛŋmɔ fɛɛ ema shihilɛ mli nibii anɔ. Mɛi feɔ yeyeeye yɛ amɛhiamɔ nibii—nɔ ni he hiaa amɛ diɛŋtsɛ, kɛ nɔ ni amɛsusuɔ akɛ ehe baahia lɛ—ahe, ni amɛgboɔ deŋme babaoo kɛtaoɔ nibii ní yɛ anɔkwale mli ehe ehiaŋ amɛ po lɛ. Mɛi babaoo mɔɔ nyɔmɔ, ni be ni amɛhɛleɔ shi akɛ  “mɔ ni yafaa nii lɛ tsɔɔ nyɔŋ ehãa mɔ ni fa lɛ nii lɛ,” no mli ekpe sɛɛ tsɔ.—Abɛi 22:7, Ga Biblia hee.

Mɛi komɛi kpɛɔ yiŋ komɛi ni bafeɔ oshara kɛhãa amɛ. Paul wie akɛ: “Mikutsoŋbii lɛ babaoo shi amɛwekui kɛ amɛnanemɛi ni amɛtee maŋsɛɛ koni amɛyatao ‘shika.’ Amɛteŋ mɛi komɛi tee ni amɛhiɛɛɛ gbɛfãa he woji ni sa, no hewɔ lɛ amɛnáaa nitsumɔ. Bei pii lɛ amɛteɔ amɛhe koni polisifoi lɛ akamɔ amɛ, ni amɛwɔɔ gbɛjegbɛi ahe. Amɛhãaa Nyɔŋmɔ hegbɛ ni eye ebua amɛ. Shi mi kɛ miweku lɛ tswa wɔfai shi akɛ wɔbaafee ekome kɛkpee shihilɛ lɛ naa, ní wɔhã Nyɔŋmɔ aye abua wɔ.”

Paul tsa nɔ akɛ: “Yesu kɛɛ akɛ: ‘Nyɛkafea yeyeeye yɛ wɔ́ he kɔkɔɔkɔ, ejaakɛ wɔ́ hu kɛ lɛ diɛŋtsɛ eyeyeeyefeemɔi baaba. Gbi fɛɛ gbi kɛ emli naagbai.’ No hewɔ lɛ sɔlemɔ ni misɔleɔ daa kɛkɛ ji, ni Nyɔŋmɔ ‘ahã wɔ aboloo ni he hiaa wɔ kɛhã ŋmɛnɛ gbi nɛɛ,’ koni wɔnyɛ wɔhi wala mli. Ni eye ebua wɔ hu, taakɛ Yesu wo shi lɛ. Jeee be fɛɛ be wɔnáa nɔ ni wɔsumɔɔ. Be ko lɛ, miyato lain yɛ niyenii ko he ni milé nɔ ni ahɔ̃ɔ. Be ni eshɛ minɔ lɛ, mina akɛ yogɔt ni. Misumɔɔɔ yogɔt. Shi eji niyenii, no hewɔ lɛ no ji nɔ ni wɔye nakai gbɛkɛ lɛ. Midaa Nyɔŋmɔ shi akɛ yɛ nakai be lɛ mli fɛɛ lɛ, miweku lɛ kɛ hɔmɔ wɔɔɔ.” *

“Amrɔ nɛɛ, wɔbɛ shika he naagba tsɔ. Shi shihilɛ ni wɔtsɔ mli lɛ ehã wɔkase akɛ, nɔ ni fe fɛɛ ni wɔbaanyɛ wɔfee kɛkpee yeyeeyefeemɔ naa ji, ni wɔkɛ wɔhiɛ baafɔ̃ Nyɔŋmɔ nɔ. Kɛ́ wɔtee nɔ wɔfee Yehowa * suɔmɔnaa nii lɛ, ebaaye ebua wɔ be fɛɛ be. Wɔna bɔ ni Lala 34:9 lɛ ji anɔkwale hã. Jɛmɛ kɛɔ akɛ: ‘Nyɛsaa nyɛnaa nyɛkwɛa, ni nyɛaana akɛ Yehowa hi; ajɔɔ gbɔmɔ ni baa lɛ abo lɛ.’ Enɛ hewɔ lɛ, wɔsheee ohia shihilɛ ko ni baanyɛ aba wɔsɛɛ lɛ gbeyei.

“Amrɔ nɛɛ wɔbanu shishi faŋŋ akɛ, jeee nitsumɔ loo shika ji nɔ ni hãa gbɔmɔ hiɔ wala mli, shi moŋ niyenii. Wɔkɛ miishɛɛ miikpa be ni Nyɔŋmɔ shiwoo akɛ, ‘shikpɔŋ lɛ nɔ aaaba abele babaoo kɛyashwie gɔji lɛ ayiteaŋ’ lɛ baaba mli lɛ gbɛ. Kɛyashi nakai be lɛ baashɛ lɛ, ‘kɛ́ wɔyɛ niyenii kɛ atade lɛ, wɔmii baashɛ he.’ Biblia mli wiemɔi ni nyiɛ sɛɛ nɛɛ woɔ wɔ hewalɛ waa, akɛ: ‘Shikasuɔmɔ akaba nyɛshihilɛ mli, ni nyɛmii ashɛa nibii ni yɔɔ amrɔ nɛɛ he. Ejaakɛ ekɛɛ: “Mishiŋ bo, ni mikwaŋ bo kɔkɔɔkɔ.” Koni wɔná ekãa babaoo ni wɔkɛɛ: “Yehowa ji miyelikɛbualɔ; misheŋ gbeyei.”’” *

Dani wɔbaanyɛ wɔkɛ ‘Nyɔŋmɔ anyiɛ’ taakɛ Paul kɛ eweku lɛ fee lɛ, ebiɔ ni wɔná anɔkwa hemɔkɛyeli. (1 Mose 6:9) Kɛ́ wɔkɛ shika he naagba miikpe amrɔ nɛɛ jio, wɔkɛ eko baakpe wɔsɛɛ jio lɛ, wɔbaanyɛ wɔkase nɔ ko kpele kɛjɛ Paul hemɔkɛyeli lɛ, kɛ hiɛshikamɔ ni ekɛtsu nii lɛ mli.

Shi kɛ́ weku mli naagbai ehã ofee yeyeeye hu?