HII SHI AKƐ KRISTOFONYO
‘Nyɛjiea Maŋsɛɛ Nyɔŋmɔi Lɛ Nyɛshɛrɛa Nyɛshwiea’
Eyɛ mli akɛ no mli lɛ Nyɔŋmɔ woko mla ko yɛ amagajamɔ he moŋ, shi Yakob le akɛ esa akɛ ajá Yehowa kome too pɛ. (2Mo 20:3-5) No hewɔ lɛ, be ni Yehowa kɛɛ Yakob akɛ eku esɛɛ kɛya Betel lɛ, Yakob fã mɛi fɛɛ ni fata ehe lɛ akɛ amɛjie amɛmagai lɛ amɛshɛrɛ amɛshwie. Kɛkɛ ni Yakob fu amagai lɛ, ní toiiaŋnii fata he lɛ; ekolɛ, amɛwo toiiaŋnii lɛ akɛ sɛbɛ. (1Mo 35:1-4) Ŋwanejee ko bɛ he akɛ, Yehowa hiɛ sɔ nɔ ni Yakob fee lɛ.
Ŋmɛnɛ lɛ, mɛni wɔbaanyɛ wɔfee kɛtsɔɔ akɛ wɔjáa Yehowa kome too pɛ? Klɛŋklɛŋ lɛ, esa akɛ wɔtsi wɔhe kɛje nɔ fɛɛ nɔ ni kɛ amagajamɔ, loo mumɔi kɛshãramɔ yɔɔ tsakpaa lɛ he. Enɛ baabi ni wɔshɛrɛ nibii fɛɛ ni baahã wɔkɛ mumui fɔji ashãra lɛ wɔshwie, ni wɔpɛi nibii ni wɔkɛjieɔ wɔhiɛtserɛ lɛ amli jogbaŋŋ. Akɛ nɔkwɛmɔnɔ lɛ, bi ohe akɛ: ‘Ani mumɔi fɔji, ayɛi, loo sisai ahe saji yɛ woji ni mikaneɔ, loo sinii ni mikwɛɔ kɛjieɔ mihiɛtserɛ lɛ amli? Ani ahãa efeɔ tamɔ nɔ ni tɔmɔ ko bɛ majikfeemɔ, tsofatsumɔ, loo loomɔ he yɛ nibii ni mikɛjieɔ mihiɛtserɛ lɛ amli?’ Esa akɛ wɔtsi wɔhe kwraa kɛje nɔ fɛɛ nɔ ni Yehowa nyɛɔ lɛ he.—La 97:10.
KWƐMƆ VIDIO NI JI, ‘TSĨI ABONSAM GBƐ’ LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:
-
Mɛɛ naagba Biblia mli nikaselɔ ko ni atsɛɔ lɛ Palesa lɛ kɛkpe?
-
Kɛ́ oyɛ mumɔi kɛsharamɔ he naagba lɛ, mɛni hewɔ nilee yɔɔ mli akɛ obaahã asafoŋ onukpai lɛ aye abua bo lɛ?
-
Tsĩi Abonsam gbɛ, ni otsi obɛŋkɛ Nyɔŋmɔ.—Yak 4:7, 8
Kɛ́ wɔmiisumɔ ni Yehowa abu wɔhe lɛ, mɛɛ nibii esa akɛ wɔtsi wɔhe kwraa kɛje he?
-
Mɛni Palesa fee amrɔ nɔŋŋ yɛ sane lɛ he?
-
Mɛɛ nibii komɛi obaanyɛ ofee yɛ he ni oyɔɔ lɛ, koni onyɛ otsi ohe kɛje nibii ni baahã okɛ daimonioi lɛ ashãra lɛ ahe?
