NƆ HEWƆ NI EHE HIAA: Kɛ́ Yehowa baakpɛlɛ wɔ-Biblia mli nikaselɔi lɛ anɔ lɛ, esa akɛ amɛjɔɔ amɛhe nɔ amɛhã lɛ, ní amɛhã abaptisi amɛ. (1Pe 3:21) Yehowa buɔ amɛteŋ mɛi ni hiɔ shi yɛ amɛhenɔjɔɔmɔ lɛ naa lɛ ahe. (La 91:1, 2) Kɛ́ Kristofonyo ko jɔɔ ehe nɔ lɛ, ejɔɔ ehe nɔ ehãa Yehowa—jeee adesa ko, nitsumɔ ko, loo gbɛjianɔtoo ko. No hewɔ lɛ, ehe miihia ni Biblia mli nikaselɔi lɛ aná suɔmɔ kɛ hiɛsɔɔ amɛhã Nyɔŋmɔ.—Ro 14:7, 8.

BƆ NI OBAAFEE LƐ OHÃ:

• Kɛ́ nyɛmiikase nii lɛ, nyɛsusua bɔ ni nɔ ni nyɛkaseɔ lɛ kɔɔ Yehowa he lɛ he. Maa nɔ mi ohã lɛ akɛ, esa akɛ ekane Biblia lɛ daa gbi, ni esɔle ehã Yehowa ‘daa ni ekafɔ̃ɔ.’—1Te 5:17; Yak 4:8

• Wo mɔ ni okɛkaseɔ nii lɛ hewalɛ ni ekɛ henɔjɔɔmɔ kɛ baptisimɔ afee emumɔŋ otii. Kɛfata he lɛ, ye obua lɛ ni ekɛ otii fioo komɛi amamɔ ehiɛ, tamɔ saji ahetoo hamɔ yɛ asafoŋ kpeei ashishi loo ekutsoŋbii kɛ mɛi ni ekɛtsuɔ nii lɛ ní ebaaye amɛ odase nɛkɛ. Kaimɔ akɛ Yehowa enyɛɛɛ mɔ ko nɔ ni esɔmɔ lɛ. Henɔjɔɔmɔ ji mɔ aŋkro yiŋkpɛɛ.—5Mo 30:19, 20

• Wo mɔ ni okɛkaseɔ nii lɛ hewalɛ ni efee tsakemɔi ni sa lɛ bɔ ni afee ni esa Yehowa hiɛ, koni enyɛ eshɛ baptisimɔ he. (Abɛ 27:11) Akɛni ekolɛ sui komɛi eka wɔ-Biblia mli nikaselɔ ko he hewɔ lɛ, ehe baahia ni wɔya nɔ wɔye wɔbua lɛ koni ejie subaŋ momo lɛ, ni ewo subaŋ hee lɛ. (Efe 4:22-24) Okɛ lɛ asusu saji ni baa yɛ Buu-Mɔɔ lɛ mli ni yitso ji, “Biblia lɛ Tsakeɔ Mɛi” lɛ ekomɛi ahe

• Gbaa lɛ miishɛɛ ni Yehowa ni osɔmɔɔ lɛ ehã oná.—Yes 48:17, 18