Ani oye afii 23 kɛmiimɔ 65 ni oji be fɛɛ sɔɔlɔ? Ani oyɛ gbɔmɔtsoŋ hewalɛ kpakpa, ni obaanyɛ osɔmɔ yɛ he fɛɛ he ni hiamɔ lɛ da yɛ? Kɛ́ ohã sanebimɔi nɛɛ hetoo akɛ ‘Hɛɛ’ lɛ, ani osusu Skul Kɛhã Maŋtsɛyeli Sane Kpakpa Jajelɔi lɛ eko ni obaaya lɛ he? Kɛjɛ be ni aje shishi nɛɛ, gbalashihilɛ mli bii, nyɛmimɛi hii oshijafoi, kɛ nyɛmimɛi yei oshijafoi akpei abɔ etee eko. Shi wɔmiitao ni nyɛmimɛi hii oshijafoi babaoo aba skul lɛ eko. Bi Yehowa ni ehã shwelɛ ni oyɔɔ akɛ obaasa lɛ kɛ e-Bi lɛ hiɛ lɛ mli awa. (La 40:8; Mat 20:28; Heb 10:7) No sɛɛ lɛ, kwɛmɔ akɛ obaanyɛ ogbɔ oheloonaa nitsumɔ loo nibii komɛi ni ofeɔ lɛ anɔ lo, koni onyɛ oya skul lɛ eko.

Mɛɛ sɔɔmɔ hegbɛi akɛwo mɛi ni egbe skul nɛɛ naa lɛ ekomɛi adɛŋ? Ahã mɛi komɛi eyasɔmɔ yɛ hei ni awieɔ wiemɔ kroko yɛ, ni mɛi komɛi hu kɛ amɛhe ewo maŋtiasei wuji amli odaseyeli krɛdɛɛ nitsumɔ lɛ mli. Mɛi komɛi sɔmɔɔ sɛɛ mli akɛ kpokpaa nɔkwɛlɔi ayelikɛbualɔi, kpokpaa nɔkwɛlɔi, loo maŋsɛɛ sɔɔlɔi. Be ni osusuɔ nibii ni obaanyɛ otsu yɛ Yehowa sɔɔmɔ lɛ mli lɛ he lɛ, feemɔ onii tamɔ gbalɔ Yesaia, ni bo hu okɛɛ akɛ: “Naa mi! Tsu mi!”​—Yes 6:8.

KWƐMƆ VIDIO NI JI, MAŊSƐƐ SƆƆLƆI​—NITSULƆI YƐ NIKPAMƆ NITSUMƆ LƐ MLI LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• Mɛɛ gbɛ nɔ atsɔɔ ahalaa maŋsɛɛ sɔɔlɔi?

• Mɛɛ nitsumɔi kpakpai maŋsɛɛ sɔɔlɔi tsuɔ?

• Mɛni kɛ mɛni hãa maŋsɛɛ sɔɔlɔi atsui nyɔɔ amɛmli?