Be ni Yesu yɔɔ shikpɔŋ lɛ nɔ lɛ, etsɔɔ akɛ famɔ ni nyiɛ sɛɛ nɛɛ he hiaa waa, no ji: “Okɛ woo ahã opapa kɛ omami.” (2Mo 20:12; Mat 15:4) Be ni Yesu ji gbekɛ lɛ, ‘etee nɔ ebo efɔlɔi atoi,’ ni no hewɔ enyɛ ekɛɛ mɛi akɛ amɛwo amɛfɔlɔi lɛ. (Luk 2:51, shn.) Be ni eda lɛ, eto gbɛjianɔ koni akwɛ emami yɛ egbele sɛɛ.​—Yoh 19:26, 27.

Ŋmɛnɛ hu lɛ, Kristofoi oblahii kɛ oblayei boɔ amɛfɔlɔi atoi, ni amɛkɛ amɛ wieɔ kɛ bulɛ. No hãa anaa akɛ amɛkɛ woo hãa amɛ. Anɔkwa, esa akɛ wɔkɛ woo ahã wɔfɔlɔi, ekɔɔɔ he eko afii abɔ ni wɔye. Kɛ́ wɔfɔlɔi gbɔlɔ po lɛ, esa akɛ wɔya nɔ wɔbo amɛnilee lɛ toi, ni no baatsɔɔ akɛ wɔkɛ woo hãa amɛ. (Abɛ 23:22) Kɛ́ wɔfee nibii ni baahã wɔfɔlɔi ni egbɔlɔ lɛ atsui anyɔ amɛmli, ni wɔye wɔbua amɛ yɛ shika gbɛfaŋ lɛ, no hu tsɔɔ akɛ wɔkɛ woo hãa amɛ. (1Ti 5:8) Kɛ́ wɔdara jio, wɔdarako jio lɛ, ehe miihia ni wɔkɛ wɔfɔlɔi agba sane. No ji nɔ kome ni baaye abua wɔ ni wɔkɛ woo ahã amɛ.

KWƐMƆ VIDIO NI JI, TE MAFEE TƐŊŊ MIKƐ MIFƆLƆI AGBA SANE? LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:

• Mɛni hewɔ bei komɛi lɛ ewaa kɛhãa bo akɛ okɛ ofɔlɔi baagba sane lɛ?

• Kɛ́ okɛ ofɔlɔi miigba sane lɛ, mɛni obaanyɛ ofee kɛtsɔɔ akɛ okɛ woo hãa amɛ?

• Mɛni hewɔ sɛɛnamɔ yɔɔ he akɛ okɛ ofɔlɔi baagba sane lɛ? (Abɛ 15:22)