NƆ HEWƆ NI EHE HIAA: Esa akɛ mɛi abo atsɛ Yehowa gbɛ́i lɛ koni ahere amɛyiwala. (Ro 10:13, 14) Shi jeee mɔ fɛɛ mɔ ni kpɛlɛɔ nɔ akɛ akɛ lɛ akase Biblia lɛ ni sumɔɔ akɛ ehi shi yɛ Yehowa shishitoo mlai lɛ anaa. Kɛ́ wɔye wɔbua mɛi ni miisumɔ ni amɛfee tsakemɔi lɛɛlɛŋ yɛ amɛshihilɛ mli ni amɛsa Yehowa hiɛ lɛ, etsɔɔ akɛ wɔkɛ wɔbe miitsu nii jogbaŋŋ yɛ shiɛmɔ nitsumɔ lɛ mli. Kɛ́ wɔkɛ mɔ ko kase nii shii abɔ, shi loloolo lɛ eyaaa ehiɛ lɛ, nilee yɛ mli akɛ wɔkɛ lɛ baakpa nikasemɔ lɛ, ni wɔyaye wɔbua mɛi ni Yehowa miigbala amɛ kɛmiiba eŋɔɔ, kɛ esafo lɛ mli lɛ moŋ. (Yoh 6:44) Shi kɛji sɛɛ mli lɛ, mɔ lɛ fee tsakemɔi yɛ eshihilɛ mli kɛtsɔɔ akɛ ‘eyɛ anɔkwale lɛ ni baanyɛ ahã ená naanɔ wala lɛ he tsui kpakpa lɛ,’ wɔkɛ lɛ baabɔi nikasemɔ ekoŋŋ.​—Bɔf 13:48.

BƆ NI OBAAFEE LƐ OHÃ:

• Jiemɔ Biblia mli nikaselɔ lɛ yi yɛ nilee krɔŋŋ ni etaoɔ ená lɛ hewɔ.​—1Ti 2:4

• Hã ena akɛ, kɛ́ ekɛ nibii ni ekaseɔ lɛ tsu nii lɛ, ebaaná he sɛɛ.​—Luk 6:46-49

• Okɛ lɛ asusu Yesu nɔkwɛmɔnɔ ni kɔɔ nidulɔ lɛ he lɛ he, ni okɛɛ lɛ ni esusu nɔ hewɔ ni enyɛɛɛ eya ehiɛ lɛ he.​—Mat 13:18-23

• Okɛ hiɛshikamɔ atsu nii ni ohã ele nɔ hewɔ ni okɛ lɛ baakpa nikasemɔ lɛ

• Hã ele akɛ obaaba eŋɔɔ yɛ be kɛ beiaŋ ni obawo lɛ hewalɛ, ni kɛji efee tsakemɔi lɛ, nyɛbaaje nikasemɔ lɛ shishi ekoŋŋ

KWƐMƆ VIDIO LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:

• Mɛni ona yɛ sanegbaa lɛ mli ni tsɔɔ akɛ, nikaselɔ lɛ eyaaa ehiɛ yɛ mumɔŋ?

• Mɛɛ gbɛ nɔ shiɛlɔ lɛ ye ebua nikaselɔ lɛ ni ena akɛ, esa akɛ efee tsakemɔi?

• Mɛni shiɛlɔ lɛ fee ni hã nikaselɔ lɛ na akɛ, wɔsɛɛ lɛ amɛbaanyɛ amɛtsa nikasemɔ lɛ nɔ?