Ŋɔɔ lɛ akɛ oyɛ Galilea be ni Yesu yɔɔ shikpɔŋ lɛ nɔ lɛ. Ofã gbɛ kɛtee Yerusalem koni oyaye Agbai Agbi Jurɔ lɛ. Nyɔŋmɔ jálɔi pii ejɛ shɔŋŋ amɛba maŋ lɛ mli. Ootao oyashã afɔle ohã Yehowa. No hewɔ lɛ, ohiɛ too ni onyiɛ maŋ lɛ mli gbɛjegbɛi lɛ anɔ kɛmiiya sɔlemɔ shĩa lɛ, ni gbɛjegbɛi nɛɛ anɔ eyi kɛ gbɔmɛi. Be ni oyashɛ sɔlemɔ shĩa lɛ, ona akɛ jɛmɛ eyi kɛ mɛi krokomɛi hu ni miiba amɛbashã afɔle. Kɛkɛ ni ebashɛ onɔ ni okɛ otoo lɛ baahã osɔfoi lɛ. Nɔŋŋ kɛkɛ ni okai akɛ onyɛmi ko kɛ bo yɛ sane, ni ekolɛ eyɛ mɛi lɛ ateŋ loo maŋ lɛ mli he ko. Yesu tsɔɔ nɔ ni esa akɛ ofee. (Kanemɔ Mateo 5:24.) Te bo kɛ onyɛmi lɛ fɛɛ baafee tɛŋŋ atiu toiŋjɔlɛ sɛɛ tamɔ bɔ ni Yesu tsɔɔ lɛ? Okɛ pɛn loo pɛnsil akadi otii ni nyiɛ sɛɛ nɛɛ ateŋ nɔ ni ja.

ESA AKƐ . . .

• okɛ onyɛmi lɛ ayawie, shi kɛ́ onaaa nɔ hewɔ ni esa akɛ emli afu lɛ, no lɛ, ehe ehiaaa ni oya

• obɔ mɔdɛŋ ni ojaje onyɛmi lɛ susumɔ kɛ́ onuɔ he akɛ sane dɔɔ lɛ tsɔ, aloo lɛ hu naagba lɛ eko jɛ lɛ

• obo onyɛmi lɛ toi jogbaŋŋ be ni ewieɔ lɛ, ni kɛ́ onuuu lɛ shishi po lɛ, jɛɛ otsuiŋ okpa lɛ fai yɛ bɔ ni sane lɛ edɔ lɛ, loo bɔ ni onifeemɔ lɛ egba enaa ehã lɛ hewɔ

ESA AKƐ ONYƐMI LƐ . . .

• ayabɔ asafo lɛ mli bii krokomɛi nɔ ni ofee lɛ lɛ, koni amɛye amɛbua lɛ

• akã ohiɛ, ekoli nɔ ni ofee lɛ mli ekoŋŋ, ni enyɛ onɔ ni okpɛlɛ otɔmɔ lɛ nɔ

• hiɛ asɔ ohe shi ni oba kɛ ekãa ni oná ni okɛ lɛ bawie lɛ, ní ejɛ etsuiŋ ekɛke bo kwraa

Eyɛ mli akɛ ŋmɛnɛ lɛ, wɔkɛ kooloi eshãaa afɔle moŋ, shi yɛ nɔ ni Yesu tsɔɔ lɛ naa lɛ, kɛ́ wɔhã toiŋjɔlɛ hi wɔ kɛ wɔnyɛmimɛi ateŋ lɛ, mɛɛ gbɛ nɔ ebaasa jamɔ ni wɔkɛhãa Nyɔŋmɔ lɛ he?