Yehowa buɔ gbalashihilɛ kitã ni akãa lɛ akɛ hiɛdɔɔ sane. Ekɛɛ esa akɛ wu kɛ ŋa akpɛtɛ amɛhe. (Mat 19:5, 6) Nyɔŋmɔ webii pii yɛ ni amɛgbãla esɔ. Shi, gbãla ko bɛ ni naagba bɛ mli kwraa. Naagbai baa. Mɛi pii susuɔ akɛ kɛ́ amɛkɛ naagbai miikpe lɛ esa akɛ amɛtse amɛhe kɛje amɛhefatalɔi lɛ ahe, loo amɛtse gbãla, shi esaaa akɛ wɔnáa susumɔ ni tamɔ nakai. Mɛni Kristofoi ni ebote gbãla mli lɛ baanyɛ afee kɛbu he?

Naa nibii enumɔ komɛi ni he hiaa.

1. Buu otsui he; okɛ mɔ kroko akashwɛ suɔmɔ shwɛmɔi, ni okɛ jeŋba sha he nɔ ko akajie ohiɛtserɛ, ejaakɛ ebaanyɛ efite ogbãla lɛ.​—Mat 5:28; 2Pe 2:14.

2. Wajemɔ okɛ Nyɔŋmɔ teŋ naanyobɔɔ lɛ, ni otswa ofai shi akɛ obaasa ehiɛ yɛ ogbãla lɛ mli.​—La 97:10.

3. Yaa nɔ owo subaŋ hee lɛ, ni ofee nibii bibiibibii ni baahã ohefatalɔ lɛ he ajɔ lɛ.​—Kol 3:8-10, 12-14.

4. Nyɛyaa nɔ nyɛgbaa sane jogbaŋŋ yɛ bulɛ mli.​—Kol 4:6.

5. Hã ohefatalɔ lɛ tsui anyɔ emli yɛ bɔlɛnamɔ gbɛfaŋ, ni feemɔ nakai kɛ suɔmɔ.​—1Ko 7:3, 4; 10:24.

Kɛ́ Kristofoi wo amɛgbãla hiɛ nyam lɛ, belɛ, amɛmiiwo Yehowa, gbãla Shishitolɔ lɛ, hu hiɛ nyam.

KWƐMƆ VIDIO NI JI, ESA AKƐ WƆKƐ “SHIFIMƆ ADA FOI” LƐ​—OKƐ FOIDAMƆ LƐ MLI MLAI ATSU NII LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• Eyɛ mli akɛ miishɛɛ baanyɛ ahi gbãla ko mli yɛ shishijee mli moŋ, shi mɛɛ naagbai baanyɛ aba?

• Mɛɛ gbɛ nɔ Biblia lɛ baanyɛ awa mɛi ni nuɔ he akɛ suɔmɔ etã yɛ amɛgbãla lɛ mli lɛ?

• Mɛɛ gbɛtsɔɔmɔi Yehowa kɛhã yɛ gbãla he?

• Mɛni esa akɛ wu kɛ ŋa fɛɛ afee koni amɛgbãla lɛ asɔ?