Mɛni hewɔ esa akɛ osaa ohe oto? Nɔ ko baanyɛ afee bo trukaa ni baabi ni akɛ bo aya helatsamɔhe. No hewɔ lɛ, feemɔ bɔ fɛɛ bɔ ni obaanyɛ kɛsaa ohe bianɛ oto, koni kɛ́ nɔ ko nakai ba lɛ anyɛ akwɛ bo jogbaŋŋ. Kɛ́ ofee nakai lɛ, no baatsɔɔ akɛ wala jara wa hã bo, ni oyeɔ Yehowa mla ni kɔɔ lá he lɛ nɔ.​—Bɔf 15:28, 29.

Mɛni obaanyɛ ofee kɛsaa ohe oto?

• Sɔlemɔ ni oto otsui shi oŋmala lá wolo (DPA) lɛ eko nɔ nii. a Shiɛlɔi ni abaptisi amɛ lɛ baanyɛ ayana sɔɔlɔ ni kwɛɔ woji anɔ lɛ koni ehã amɛ DPA kaadi lɛ eko, loo ni ehã amɛ Identity Card (ic) lɛ eko kɛhã amɛbii bibii

• Kɛ́ ohiɛ hɔ lɛ, bi osafoŋ onukpai lɛ ni amɛhã bo fɔm ni ji, Saji Ni Esa Akɛ Yei Ni Hiɛ Hɔ Lɛ Ale (S-401) lɛ eko. Saji ni yɔɔ fɔm nɛɛ nɔ lɛ baawa bo ni okpɛ yiŋ kpakpai yɛ helatsamɔ mli saji ahe be ni ohiɛ hɔ kɛ be ni ofɔɔ

• Kɛji akɛ helatsamɔ gbɛ ko baatsu nii yɛ ogbɛfaŋ, ni lá sane baanyɛ ate shi yɛ mli loo abaatsĩ onaa yɛ helatsamɔhe lɛ, hã osafoŋ onukpai lɛ ale kɛtsɔ hiɛ, ni ohã helatsamɔhe lɛ ale kɛtsɔ hiɛ akɛ obaasumɔ akɛ Yehowa Odasefoi abasara bo

Mɛni asafoŋ onukpai lɛ baanyɛ afee kɛwa bo? Amɛbaanyɛ amɛwa bo ni ofiili o-DPA kaadi lɛ. Shi asafoŋ onukpai lɛ ekpɛŋ yiŋ amɛhãŋ bo yɛ helatsamɔ mli saji ahe, ni amɛtsɔŋ bo amɛ diɛŋtsɛ amɛsusumɔi yɛ saji ni esa akɛ mɔ fɛɛ mɔ akpɛ eyiŋ yɛ he lɛ ahe. (Ro 14:12; Gal 6:5) Kɛ́ okɛɛ osafoŋ onukpai lɛ akɛ okɛ helatsamɔ mli sane ko ni lá sane baanyɛ ate shi yɛ mli lɛ ekpe lɛ, amɛbaawó Ajinafoi Akuu Ni Kɛ Helatsamɔhei Shãraa (HLC) lɛ toi nɔ oya nɔŋŋ amɛhã bo.

Mɛni HLC lɛ baanyɛ afee kɛwa bo? Atsɔse nyɛmimɛi hii ni sɔmɔɔ akɛ HLC lɛ mli bii lɛ ni amɛye amɛbua dɔkitafoi kɛ lɔyafoi koni amɛnu yiŋ ni damɔ Ŋmalɛ lɛ nɔ ni wɔkpɛ akɛ wɔheee lá ni wɔhãaa lá hu lɛ shishi jogbaŋŋ. Amɛbaanyɛ amɛkɛ dɔkitafoi awie helatsamɔ gbɛi komɛi ni ahãaa mɔ lá yɛ mli lɛ he. Kɛ́ ehe bahia lɛ, amɛbaanyɛ amɛtao dɔkitafonyo ni baanu bo shishi (koni ekwɛ bo loo obi) amɛhã bo.

KWƐMƆ VIDIO NI JI, BƆ NI OOOFEE OKPƐ OYIŊ YƐ HELATSAMƆ MLI SAJI NI KƆƆ LÁ HE LƐ AHE LƐ, KONI NO SƐƐ LƐ OHÃ SANEBIMƆ NI NYIƐ SƐƐ NƐƐ HETOO:

• Mɛni okase yɛ vidio nɛɛ mli ni baawa bo ni osaa ohe oto helatsamɔ mli sane ko ni lá sane baanyɛ ate shi yɛ mli lɛ he?

  Your answer