Kɛ́ wɔkɛ mumɔŋ otii mamɔ wɔhiɛ lɛ, no baahã wɔkɛ wɔhewalɛ atsu nii jogbaŋŋ. (1Ko 9:26) Akɛni etsɛŋ je nɛɛ baaba naagbee hewɔ lɛ, kɛ́ wɔkɛ otii mamɔ wɔhiɛ lɛ, no baahã wɔkɛ wɔbe atsu nii jogbaŋŋ. (Efe 5:15, 16) Kɛ́ nyɛmiifee weku jamɔ lɛ, nyɛbaanyɛ nyɛsusu otii ni nyɛbaasumɔ ni nyɛkɛmamɔ nyɛhiɛ kɛhã sɔɔmɔ afi hee lɛ he. Otii srɔtoi ni obaanyɛ okɛmamɔ ohiɛ lɛ ahe saji yɛ kpee nifeemɔ wolo nɛɛ mli, ni obaanyɛ osusu he ni osɔle yɛ he.​—Yak 1:5.

Akɛ nɔkwɛmɔnɔ lɛ, ani nyɛweku lɛ mli bii lɛ fɛɛ baanyɛ awa nyɛteŋ mɔ kome ni esɔmɔ akɛ daa gbɛgbalɔ? Kɛ́ osusuɔ akɛ onyɛŋ oshɛ ŋmɛlɛtswai ni ataoɔ lɛ he lɛ, obaanyɛ okɛ gbɛgbalɔi ni shihilɛ tamɔ onɔ lɛ agba he sane. (Abɛ 15:22) Nyɛbaanyɛ nyɛfɔ̃ gbɛgbalɔ ko nine kɛba nyɛweku jamɔ lɛ shishi ni nyɛbibii lɛ saji. No sɛɛ lɛ, ŋmalamɔ be he gbɛjianɔtoi srɔtoi ni obaanyɛ onyiɛ sɛɛ kɛtsu gbɛgbamɔ nitsumɔ lɛ. Kɛ́ otsu eko pɛŋ lɛ, kwɛmɔ akɛ amrɔ nɛɛ oshihilɛ baaŋmɛ bo gbɛ ni onyɛ otsu ekoŋŋ lo.

Ani oweku lɛ mli bii lɛ ateŋ mɛi komɛi baanyɛ asɔmɔ akɛ gbɛgbalɔi awalɔi nyɔɔŋ kome loo nɔ ni fe nakai? Kɛ́ obɛ gbɔmɔtsoŋ hewalɛ lɛ, obaanyɛ okɛ be fioo ashiɛ daa gbi koni onyɛ osɔmɔ. Kɛ́ onyɛɛɛ oya shiɛmɔ yɛ otsi lɛ teŋ akɛni okɛ obe fɛɛ tsuɔ nii, loo akɛni oyaa skul hewɔ lɛ, obaanyɛ ohala nyɔɔŋ ko ni hejɔɔmɔ gbi yɔɔ mli loo otsii anaagbei enumɔ yɔɔ mli. Kadimɔ nyɔɔŋ loo nyɔji ni oto akɛ okɛbaatsu gbɛgbalɔi awamɔ nitsumɔ lɛ yɛ kalanda nɔ, ni okadi gbii ni oto akɛ okɛbaatsu lɛ hu yɛ nɔ.​—Abɛ 21:5.

KWƐMƆ VIDIO NI JI, FEEMƆ EKÃA KƐ́ OJI . . . GBƐGBALƆ LƐ, KONI NO SƐƐ LƐ OHÃ SANEBIMƆ NƐƐ HETOO:

• Mɛɛ gbɛ nɔ Nyɛmiyoo Aamand niiashikpamɔ lɛ hãa wɔnaa akɛ Yehowa sumɔɔ mɛi ni kɛ nibii shãa afɔle koni amɛtsu gbɛgbamɔ nitsumɔ lɛ, ni ekwɛɔ amɛ hu?