KASEMƆ BƆ NI ASHIƐƆ JOGBAŊŊ
Ná Hesai Pii yɛ Shiɛmɔ Nitsumɔ lɛ Mli
NƆ HEWƆ NI EHE HIAA: Eyɛ mli akɛ shiɛmɔ wiemɔ ni akɛwo kpee nifeemɔ wolo lɛ mli lɛ yeɔ ebuaa wɔ ní wɔna bɔ ni wɔɔfee wɔkɛ magazin srɔtoi lɛ ahã moŋ, shi eji nɔkwɛmɔnɔ kɛkɛ. Esa akɛ okɛ bo diɛŋtsɛ owiemɔi atsu nii. Ekolɛ obaasumɔ ni otsɔ gbɛ kroko nɔ okɛ magazin lɛ ahã aloo ekolɛ obaasumɔ ni okɛ sane kroko ni mɛi ni yɔɔ oshikpɔŋkuku lɛ mli lɛ baanya he lɛ atsu nii. Kɛ́ nakai ni lɛ, no lɛ kɛ́ okane magazin lɛ ogbe naa, osusu shiɛmɔ wiemɔi lɛ ahe, ni okwɛ vidio ni akɛfee nɔkwɛmɔnɔ lɛ, obaanyɛ okɛ ŋaawoi ni nyiɛ sɛɛ lɛ atsu nii kɛto bo diɛŋtsɛ oshiɛmɔ wiemɔ he gbɛjianɔ.
BƆ NI OBAAFEE LƐ OHÃ:
Bi ohe akɛ, ‘Ani masumɔ ni mikɛ shiɛmɔ wiemɔi ni akɛhã lɛ eko atsu nii?’
HƐƐ
-
Too ohiɛkpamɔ wiemɔ lɛ he gbɛjianɔ. Be ni oŋa mɔ lɛ sɛɛ lɛ, tsɔɔmɔ lɛ yiŋtoo hewɔ ni oba. (Akɛ nɔkwɛmɔnɔ lɛ, obaanyɛ okɛɛ: “Miba koni . . . ”)
-
Susumɔ sane ni obaabi, ŋmalɛ ni obaakane, kɛ sane ni okɛbaahã lɛ he, ni okwɛ bɔ ni obaato naa ohã. (Akɛ nɔkwɛmɔnɔ lɛ: Kɛ́ ootao okane ŋmalɛ ko lɛ, obaanyɛ okɛɛ, “Akɛ nakai sanebimɔ lɛ hetoo ni hãa mɔ tsui nyɔɔ emli ehã yɛ biɛ.”)
DABI
-
Halamɔ sane ko ni ŋɔɔ onaa yɛ magazin lɛ mli ní mɛi ni yɔɔ oshikpɔŋkuku lɛ mli lɛ baanya he
-
Halamɔ sanebimɔ ní baahã shiatsɛ lɛ ashwie eyiŋ ní baagbele gbɛ kɛhã sanegbaa, shi jeee nɔ ni baawo lɛ hiɛgbele. (Tamɔ: Sanebimɔi ni yɔɔ magazin lɛ baafa 2 lɛ nɛkɛ.)
-
Halamɔ ŋmalɛ ni obaakane. (Kɛ́ okɛ Awake! miihã lɛ, ejeee doo akɛ okane ŋmalɛ, akɛni ato magazin nɛɛ he gbɛjianɔ kɛhã mɛi ni lé nɔ ko tsɔ yɛ Biblia lɛ he, ni ekolɛ amɛkɛ jamɔ bɛ sane ko po lɛ hewɔ.)
-
Wiemɔ nɔ ko fioo ni baahã shiatsɛ lɛ ana bɔ ni ebaaná sane lɛ he sɛɛ kɛ́ ekane
YƐ EKO FƐƐ EKO MLI LƐ
-
Too sanebimɔ ko ni obaayahã hetoo kɛ́ oku osɛɛ lɛ he gbɛjianɔ
-
Ŋmalamɔ otii komɛi ni baahã okai nɔ ni obaawie kɛ́ otee eŋɔɔ ekoŋŋ lɛ oshwie shi
