Kɛ́ ootsɔɔ mɔ ko nii ni okɛ mfonirii kɛ amɛhenɔi lɛ tsu nii lɛ, emɔɔ ejwɛŋmɔ, enuɔ nii lɛ shishi, ni ekaiɔ hu. Yehowa, wɔ-Tsɔɔlɔ Ni Fe Fɛɛ lɛ, kɛ mfonirii kɛ amɛhenɔi lɛ tsu nii kɛtsɔɔ nibii ni he hiaa. (1Mo 15:5; Yer 18:1-6) Yesu, ni ji Tsɔɔlɔ Kpele lɛ, hu kɛ ekomɛi tsu nii. (Mat 18:2-6; 22:19-21) Nɔ ko ni akɛtsɔɔ nii ni eye ebua mɛi waa nyɛsɛɛ nɛɛ ji vidio. Ani okɛ vidioi tsuɔ nii jogbaŋŋ kɛ́ ootsɔɔ o-Biblia mli nikaselɔi lɛ nii?

Afee vidioi nyɔŋma ni baawa wɔ koni wɔtsɔɔ mɛi anɔkwalei ni yɔɔ Sane Kpakpa Ni Jɛ Nyɔŋmɔ Ŋɔɔ! broshuɔ lɛ mli lɛ. Bei pii lɛ, sanebimɔi ni adiki mli ni yɔɔ broshuɔ lɛ mli lɛ ateŋ ekome ji vidio lɛ yitso. Akɛ link srɔtoi ewo broshuɔ nɛɛ henɔ ni yɔɔ jw.org lɛ nɔ lɛ mli koni ekai wɔ hei ni esa akɛ wɔjie vidioi nɛɛ ateŋ eko fɛɛ eko yɛ. Agbɛnɛ hu, obaanyɛ ojie vidioi krokomɛi kɛ́ okɛ mɛi miikase woji srɔtoi ni yɔɔ Nibii Ni Wɔkɛtsuɔ Nii Kɛtsɔɔ Mɛi Nii lɛ mli lɛ.

Ani okɛ o-Biblia mli nikaselɔ lɛ miisusu Biblia mli sane ko ni shishinumɔ wa kɛhã lɛ lɛ he? Ani ekɛ shihilɛ pɔtɛɛ ko ni mli wa miikpe? Taomɔ vidioi ni yɔɔ jw.org® lɛ loo JW Broadcasting® lɛ nɔ lɛ ateŋ nɔ ni baaye abua lɛ. Obaanyɛ okɛ lɛ fɛɛ akwɛ eko ni nyɛsusu he.

Daa nyɔɔŋ nɔ lɛ, ajieɔ vidioi hei kpo. Kɛ́ ookwɛ vidioi nɛɛ eko lɛ, susumɔ bɔ ni obaafee okɛye obua mɛi krokomɛi lɛ he.