Nɔ ko ni sa kadimɔ tee nɔ yɛ naagbee Hehoo ni Yesu ye lɛ shishi. Akɛni etsɛŋ abaagbe lɛ hewɔ lɛ, eto gbɛjianɔ koni ekɛ ebɔfoi lɛ aye Hehoo lɛ, ni eto gbi jurɔ ko ni abaaye daa afi lɛ shishi, no ji, Nuŋtsɔ Lɛ Gbɛkɛ Niyeli lɛ. Etsu Petro kɛ Yohane koni amɛyasaa tsũ ni amɛbaaye Hehoo lɛ yɛ mli lɛ mli amɛto. (Luk 22:7-13; kwɛmɔ mfoniri ni yɔɔ wolo lɛ hiɛ lɛ.) Wɔ hu esa akɛ wɔsaa wɔhe wɔto Kaimɔ ni abaaye March 27 lɛ. Ekolɛ asafoi lɛ ehala wielɔ kɛ mɛi ni baakwɛ blodo kɛ wain lɛ nɔ momo, ni amɛto nibii krokomɛi hu ahe gbɛjianɔ. Shi mɛni wɔbaanyɛ wɔfee kɛsaa wɔhe wɔto Kaimɔ lɛ?

Feemɔ nɔ ni baahã ohiɛ asɔ kpɔmɔnɔ lɛ waa. Kanemɔ Kaimɔ lɛ he ŋmalɛi lɛ, ni ojwɛŋ nɔ. Obaana ŋmalɛi nɛɛ yɛ Ŋmalɛi Lɛ Amli Ni Wɔɔkwɛ Daa lɛ mli. Obaana ŋmalɛi lɛ fɛɛ yɛ Saji Krokomɛi B12, ni yɔɔ Jeŋ Hee Shishitsɔɔmɔ lɛ mli lɛ mli. (Eko hu yɛ April 2020 Wɔshiɛmɔ Kɛ Wɔshihilɛ Kpee Nifeemɔ Wolo lɛ mli.) Kpɔmɔnɔ lɛ he saji ni he hiaa waa yɛ Watch Tower Publications Index loo Niiamlitaomɔ Wolo Kɛhã Yehowa Odasefoi lɛ mli, ni wekui baanyɛ ana saji ni amɛbaanyɛ amɛkɛfee weku jamɔ yɛ mli.

Fɔ̃ɔ mɛi nine. Okɛ ohe awo ninefɔɔ tafãa lɛ mli waa. Tsɔ hiɛ osusu mɛi ni obaanyɛ ofɔ̃ amɛ nine lɛ he; mɛi ni obaaya amɛŋɔɔ ekoŋŋ, mɛi ni okɛkase Biblia lɛ pɛŋ, mɛi ni ole, kɛ owekumɛi. Esa akɛ asafoŋ onukpai lɛ akwɛ ni amɛfɔ̃ mɛi ni ekpa shiɛmɔyaa lɛ nine. Kɛ́ mɔ ko ni ofɔ̃ lɛ nine lɛ bɛ he ni oyɔɔ lɛ, obaanyɛ ona be kɛ he ni abaafee Kaimɔ lɛ yɛ, yɛ he ni mɔ lɛ yɔɔ lɛ yɛ jw.org lɛ nɔ; kɛ́ ogbele jw.org lɛ, klikimɔ WƆHE SAJI, ni no sɛɛ lɛ, okliki “Kaimɔ Lɛ.”

Mɛni hu wɔbaanyɛ wɔfee kɛsaa wɔhe wɔto?