Kɛ́ okɛ mɔ ko bɔɔ akɛni osumɔɔ esane loo obuɔ lɛ lɛ hewɔ lɛ, belɛ eji onaanyo. Akɛ nɔkwɛmɔnɔ lɛ, be ni David gbe Goliat lɛ sɛɛ lɛ, Yonatan kɛ lɛ bɔ naanyo ni mli wa waa. (1Sa 18:1) Amɛteŋ mɔ fɛɛ mɔ jie sui ni hã mɔ kroko lɛ sumɔ esane waa lɛ kpo. Hewɔ lɛ, kɛ́ mɛi le amɛhe jogbaŋŋ lɛ amɛnaanyobɔɔ lɛ mli waa. Ja mɔ ko ebɔ ehe mɔdɛŋ ni ená dekã ehã mɔ kroko dani ebaale lɛ jogbaŋŋ. Shi yɛ Intanɛt lɛ nɔ lɛ, mɛi tsɛɔ mɔ fɛɛ mɔ kɛkɛ akɛ amɛnaanyo. Yɛ Intanɛt lɛ nɔ lɛ, ewaaa akɛ mɛi kɛ mɛi ni amɛji diɛŋtsɛ lɛ baatee, ejaakɛ amɛjeɔ gbɛ amɛkɛ amɛhe saji kpakpai woɔ nɔ. Enɛ hewɔ lɛ, esa akɛ wɔkwɛ jogbaŋŋ yɛ mɛi ni wɔkɛbaabɔ naanyo yɛ Intanɛt lɛ nɔ lɛ he. Kɛ́ mɔ ko ni oleee kɛɛ eetao ekɛ bo abɔ naanyo yɛ Intanɛt lɛ nɔ lɛ, kaashe gbeyei akɛ kɛ́ okpɛlɛɛɛ nɔ lɛ ebaagba enaa. Akɛni oshãra yɛ naanyo ni akɛ mɛi bɔɔ yɛ Intanɛt lɛ nɔ lɛ he hewɔ lɛ, mɛi komɛi ekpɛ mli akɛ amɛkɛ social network saitii tsuŋ nii kwraa. Shi kɛ́ okpɛ mli akɛ okɛ saitii nɛɛ eko baatsu nii lɛ, mɛni esa akɛ ohã ehi ojwɛŋmɔŋ?

KWƐMƆ VIDIO NI JI, OHIƐ AKÃ SHI YƐ FESBUK KƐ EHENƆI LƐ KƐNITSUMƆ MLI LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:

• Mɛni he esa akɛ osusu dani okɛ saji kɛ fotoi awo Intanɛt lɛ nɔ?

• Mɛni hewɔ esa akɛ okwɛ jogbaŋŋ yɛ mɛi ni okɛbɔɔ naanyo yɛ Intanɛt lɛ nɔ lɛ he lɛ?

• Mɛni hewɔ esa akɛ ofo husu owo be ni oyeɔ yɛ social network ko nɔ lɛ he lɛ?​—Efe 5:15, 16