HII SHI AKƐ KRISTOFONYO
Bɔ Ni Obaafee Oye Obua Kɛ́ Oshãra Ba
Sɛɛkpee nɛɛ, adebɔɔ naa oshãrai miifa waa. Kɛ́ oshãra ko ba lɛ, esa akɛ ato mɔdɛŋ ni abɔɔ koni awa mɛi ni oshãra lɛ enina amɛ lɛ he gbɛjianɔ jogbaŋŋ. No hewɔ lɛ, Gbɛtsɔɔmɔ Kuu lɛ eto gbɛjianɔ koni aná Disaster Relief Department yɛ nitsumɔhe nine fɛɛ nitsumɔhe nine.
Kɛ́ nyɛmimɛi ni yɔɔ department nɛɛ ná amɛle akɛ oshãra ko eba lɛ, amɛkɛ onukpai ni yɔɔ he ni eba yɛ lɛ shãraa oya nɔŋŋ koni amɛna yelikɛbuamɔ ni he baahia nyɛmimɛi lɛ. Kɛ́ efite nii bɔ ni nyɛmimɛi ni yɔɔ he ni eba yɛ lɛ kome too nyɛŋ atsu he nii lɛ, nitsumɔhe nine lɛ baahala nyɛmimɛi ni sa ni amɛyato yelikɛbuamɔ nitsumɔ lɛ he gbɛjianɔ. Amɛbaabi ni mɛi abatsu nii kɛye amɛbua, loo ni mɛi kɛ nibii pɔtɛi komɛi abawa, loo amɛbaahé nibii ni he baahia lɛ ni amɛjara.
Kɛ́ ato nibii ahe gbɛjianɔ yɛ nɛkɛ gbɛ nɔ lɛ, eyeɔ ebuaa yɛ gbɛi pii anɔ. Kɛ́ mɔ fɛɛ mɔ miifee nɔ ni esusuɔ akɛ ebaanyɛ efee kɛye ebua ni atooo he gbɛjianɔ lɛ, ehãa atsuɔ nitsumɔi komɛi ni he ehiaaa, mɛi ayiŋ futuɔ amɛ, ni afiteɔ shika kɛ nibii.
Nyɛmimɛi ni nitsumɔhe nine lɛ baahala lɛ baabu naa amɛkwɛ koni amɛna shika abɔ kɛ nitsulɔi abɔ ni he baahia kɛhã nitsumɔ lɛ. Amɛbaanyɛ amɛkɛ amralofoi lɛ hu ashãra koni wɔnyɛ wɔtsu wɔyelikɛbuamɔ nitsumɔ lɛ yɛ be naa. Hewɔ lɛ, esaaa akɛ wɔteŋ mɔ ko ŋɔɔ efɔ̃ɔ enɔ akɛ ebaahã mɛi atsu shika, ekɛ nibii baamaje, loo ebaaya he ni oshãra lɛ eba yɛ lɛ, ja abi lɛ ni efee nakai dã.
Fɛɛ sɛɛ lɛ, kɛ́ oshãra ba lɛ wɔsumɔɔ ni wɔye wɔbua. (Heb 13:16) Nɔ hewɔ lɛ ji akɛ, wɔsumɔɔ wɔnyɛmimɛi lɛ! Mɛni wɔbaanyɛ wɔfee? Nɔ ni he hiaa fe fɛɛ ni wɔbaanyɛ wɔfee ji, ni wɔsɔle wɔhã mɛi ni oshãra lɛ enina amɛ lɛ kɛ mɛi ni miiye amɛmiibua amɛ lɛ. Agbɛnɛ hu, wɔbaanyɛ wɔtsu onia kɛye wɔbua jeŋ muu fɛɛ nitsumɔ lɛ. Nitsumɔhe niji lɛ tsuɔ nii yɛ Gbɛtsɔɔmɔ Kuu lɛ shishi, ni no hewɔ lɛ, amɛle hei ni abaanyɛ akɛ oniai ni wɔtsuɔ lɛ atsu nii jogbaŋŋ yɛ. Kɛ́ wɔmiisumɔ ni wɔtsu yelikɛbuamɔ nitsumɔ lɛ eko lɛ, no lɛ, wɔbaanyɛ wɔfiili Local Design/Construction Volunteer Application (DC-50) fɔm lɛ eko.
KWƐMƆ VIDIO NI JI, NU AFUA KO NI FITE NII WAA YƐ BRAZIL LƐ, KONI NO SƐƐ LƐ OHÃ SANEBIMƆ NI NYIƐ SƐƐ NƐƐ HETOO:
Be ni nu afua lɛ ba yɛ Brazil yɛ afi 2020 mli lɛ, te nibii ni Yehowa Odasefoi fee kɛye amɛbua mɛi lɛ ateŋ nɔ ni ta otsuiŋ waa?
