HII SHI AKƐ KRISTOFONYO
Okɛ Oyi Aná Wala Kɛya Naanɔ! Wolo Lɛ Awa Mɛi Ni Amɛná Hemɔkɛyeli Ni Mli Wa
Ja Biblia mli nikaselɔi ená hemɔkɛyeli ni mli wa dani amɛbaanyɛ amɛsa Nyɔŋmɔ hiɛ. (Heb 11:6) Wɔbaanyɛ wɔkɛ Oyi Aná Wala Kɛya Naanɔ! wolo lɛ atsu nii kɛwa amɛ. Ŋmalɛi ni he hiaa waa, niiahesusumɔ ni mli kã shi, sanebimɔi ni mɔɔ shi, vidioi ni kanyaa mɔ, kɛ mfonirii fɛfɛji yɛ mli. Kɛ́ wɔwa amɛ ni amɛná sui kpakpai, ni amɛkɛ Nyɔŋmɔ bɔ naanyo lɛ, belɛ, wɔkɛ nibii ni la nyɛŋ ashã miitswa amɛhemɔkɛyeli lɛ wɔmiima shi.—1Ko 3:12-15.
Ewa kɛhã mɛi komɛi akɛ amɛkɛ Nyɔŋmɔ ni amɛnaaa lɛ lɛ baabɔ naanyo. No hewɔ lɛ, esa akɛ wɔwa amɛ ni amɛle Yehowa, ni amɛhe lɛ amɛye hu.
KWƐMƆ VIDIO NI JI, OKƐ “OYI ANÁ WALA KƐYA NAANƆ!” WOLO LƐ AWA MƐI NI AMƐNÁ HEMƆKƐYELI NI MLI WA YƐ YEHOWA MLI LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:
-
Mɛni hãa wɔnaa akɛ, nyɛmi yoo lɛ saa ehe jogbaŋŋ kɛhã nikasemɔ lɛ?
-
Be ni amɛsusuɔ Yesaia 41:10, 13 lɛ he lɛ, mɛɛ gbɛ nɔ ekɛ sanebimɔi krokomɛi tsu nii koni nikaselɔ lɛ ajie nɔ ni yɔɔ etsui mli lɛ kpo?
-
Te vidio lɛ kɛ ŋmalɛi lɛ ná nikaselɔ lɛ nɔ hewalɛ ehã tɛŋŋ?
Mɛi pii nuuu kpɔmɔnɔ lɛ shishi, loo amɛnaaa lɛ akɛ amɛ tuuntu amɛhewɔ Nyɔŋmɔ hã Yesu kɛ ehe bashã afɔle lɛ. (Gal 2:20) No hewɔ lɛ, esa akɛ wɔwa amɛ ni amɛná hemɔkɛyeli yɛ kpɔmɔnɔ lɛ mli.
KWƐMƆ VIDIO NI JI, OKƐ “OYI ANÁ WALA KƐYA NAANƆ!” WOLO LƐ AWA MƐI NI AMƐNÁ HEMƆKƐYELI NI MLI WA YƐ YESU MLI LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:
-
Mɛni hãa wɔnaa akɛ, nyɛmi nuu lɛ saa ehe jogbaŋŋ kɛhã nikasemɔ lɛ?
-
Mɛɛ gbɛ nɔ ekɛ sane ko ni yɔɔ fã ni ji “Ehe Saji Krokomɛi” lɛ shishi lɛ wa nikaselɔ lɛ?
-
Mɛni hewɔ esa akɛ tsɔɔlɔ lɛ asɔle ehã nikaselɔ lɛ, ni nikaselɔ lɛ diɛŋtsɛ hu asɔle lɛ?
