Biblia lɛ Tsɔɔ wolo lɛ kɛ Wɔbaanyɛ Wɔkase wolo lɛ je amɛhe. Wɔkɛ woji enyɔ nɛɛ fɛɛ tsɔɔ mɛi anii, ni fɛɛ tsɔɔ anɔkwale kome too lɛ nɔŋŋ, ni ato yitsei lɛ fɛɛ anaa ekome. Shi akɛ wiemɔi ni shishinumɔ waa etsu nii yɛ Wɔbaanyɛ Wɔkase wolo lɛ mli. Ato he gbɛjianɔ kɛhã mɛi ni ekolɛ Biblia lɛ Tsɔɔ wolo lɛ shishinumɔ wa kɛhã amɛ lɛ. Saji krokomɛi ni fata he bɛ Wɔbaanyɛ Wɔkase wolo lɛ mli, moŋ lɛ, akɛ wiemɔi komɛi amligbalamɔ ewo mli ni gbalaa wiemɔi kɛ saji komɛi ni yɔɔ yitsei lɛ ashishi lɛ mli yɛ gbɛ ni waaa nɔ. Abɛ sanebimɔi ni akɛkpa saneyitsei lɛ ahiɛ, kɛ akrabatsa ni akɛtĩɔ nikasemɔ lɛ mli hu yɛ mli. Yɛ no najiaŋ lɛ, akɛ Biblia mli anɔkwalei ní agbala mli yɛ nikasemɔ lɛ mli lɛ mli otii ewo yitso lɛ naagbee. Taakɛ eji yɛ Biblia lɛ Tsɔɔ wolo lɛ gbɛfaŋ lɛ, abaanyɛ akɛ Wɔbaanyɛ Wɔkase wolo lɛ ahã be fɛɛ be, kɛ́ jeee no ji wolo ni akɛhãa yɛ nyɔɔŋ lɛ mli po. Mɛɛ gbɛ nɔ wɔbaanyɛ wɔkɛ Wɔbaanyɛ Wɔkase wolo lɛ fãi srɔtoi lɛ atsu nii kɛ́ wɔmiifee Biblia mli nikasemɔ?

EMLI OTII: Kɛ́ wɔkɛ mɛi miikase nii yɛ Biblia lɛ Tsɔɔ wolo lɛ mli lɛ, nɔ titri ni wɔfeɔ ji, wɔkaneɔ kuku lɛ mli, kɛkɛ lɛ no sɛɛ lɛ wɔbi sane lɛ, ni mɛi babaoo nyaa gbɛ nɛɛ he. Shi ŋɔɔ lɛ akɛ, nikaselɔ lɛ nuuu wiemɔ lɛ jogbaŋŋ loo enyɛɛɛ ekane nii jogbaŋŋ. Kɛ́ nakai ni lɛ, obaanyɛ okɛ lɛ akase Wɔbaanyɛ Wɔkase wolo lɛ. Okɛ emli otii ni yɔɔ yitso lɛ shishi lɛ atsu nii kɛfee nikasemɔ lɛ, ni owo nikaselɔ lɛ hewalɛ koni lɛ diɛŋtsɛ ekane yitso lɛ mli. Bei pii lɛ, abaanyɛ akɛ lɛ akase Biblia mli anɔkwa sane lɛ eko fɛɛ eko yɛ minitii 15 mli yɛ shitamɔ kome mli. Akɛni saji ni yɔɔ yitso lɛ mli lɛ babaoo bɛ emli otii lɛ mli hewɔ lɛ, esa akɛ tsɔɔlɔ lɛ asaa ehe jogbaŋŋ, ni ehã nikaselɔ lɛ ahi ejwɛŋmɔ mli be ni esaa ehe lɛ. Kɛ́ tsɔɔlɔ lɛ kɛ yitso lɛ diɛŋtsɛ fee nikasemɔ lɛ, no lɛ ebaanyɛ ekɛ emli otii lɛ atsu nii kɛtĩ nikasemɔ lɛ mli.

WIEMƆI KOMƐI AMLIGBALAMƆ: Ato saji ni yɔɔ fã nɛɛ shishi lɛ anaa yɛ bɔ ni amɛjeɔ kpo yɛ yitsei lɛ ashishi lɛ anaa. Tsɔɔlɔ lɛ baanyɛ ekɛ nikaselɔ lɛ asusu wiemɔi komɛi amligbalamɔ lɛ he be ni amɛkaseɔ nii lɛ loo ehã nikaselɔ lɛ diɛŋtsɛ akase.