AJIE KƐJƐ WƆNITOOHE LƐ
Wɔmiitsɔɔ Mɛi Nikanemɔ Kɛ Niŋmaa Yɛ Je Lɛŋ Fɛɛ
Nuu ko ni atsɛɔ lɛ Agostinho ni yɔɔ Brazil lɛ kɛɛ akɛ, “Atsɔse mi yɛ akrowa ko, ni wɔshĩa lɛ yɛ ŋmɔɔ lɛ mli. “Wɔye ohia futaa. No hewɔ lɛ, ehe bahia ni makpa skul ni matsu nii kɛye mabua kɛkwɛ miweku lɛ.” Agostinho ye afii 33 dani ekase nikanemɔ kɛ niŋmaa. Ewie akɛ, “Ni mikase nikanemɔ kɛ niŋmaa lɛ, ehã abuɔ mi fe tsutsu lɛ.”
Agostinho fata mɛi 250,000 kɛ sɛɛ ni Yehowa Odasefoi etsɔɔ amɛ nikanemɔ kɛ niŋmaa yɛ afii 70 ni eho lɛ mli lɛ ahe. Mɛni hewɔ Yehowa Odasefoi tsɔɔ mɛi nikanemɔ kɛ niŋmaa lɛ? Te mɛi ená gbɛjianɔ ni ato nɛɛ he sɛɛ amɛhã tɛŋŋ?
Kɛ́ Mɔ Ko Leee Nikanemɔ Kɛ Niŋmaa Lɛ, Enáaa Lɛ Mlɛo Akɛ Ebaakase Nibii
Be ni shɛɔ afi 1935 lɛ, Yehowa Odasefoi miishiɛ yɛ shikpɔji 115 nɔ. Bɔ ni afee ni maŋsɛɛ sɔɔlɔi lɛ anyɛ ashiɛ ahã mɛi ni wieɔ wiemɔi srɔtoisrɔtoi lɛ, amɛtswaa wiemɔi ni ajɛ Biblia lɛ mli ahã, ni atsɔɔ shishi kɛtee mɛi nɛɛ awiemɔ mli lɛ amɛhãa amɛ, ni mɛi komɛi hu lɛ, ahãa amɛ woji ni afee yɛ amɛmaŋ wiemɔ mli. Eyɛ mli akɛ mɛi babaoo nya Biblia lɛ he moŋ nɛ, shi akɛni amɛleee nikanemɔ kɛ niŋmaa hewɔ lɛ, nikasemɔ bawa kɛhã amɛ.
Akɛni mɛi komɛi leee nikanemɔ hewɔ lɛ, ebawa kɛhã amɛ akɛ amɛbaakane Biblia lɛ ni amɛkɛ emli shishitoo mlai lɛ atsu nii. (Yoshua 1:8; Lala 1:2, 3) Ebawa kɛhã amɛ hu akɛ amɛbaatsu sɔ̃i ni ka amɛnɔ akɛ Kristofoi lɛ ahe nii. Akɛ nɔkwɛmɔnɔ lɛ, kɛ́ fɔlɔi leee nikanemɔ lɛ, amɛnáŋ lɛ mlɛo akɛ amɛbaatsɔɔ amɛbii lɛ nibii ni Biblia lɛ kɛɛ amɛfee. (5 Mose 6:6, 7) Ni mɛi nɛɛ ateŋ mɛi ni ebatsɔmɔ Odasefoi kpaako lɛ hu náŋ lɛ mlɛo akɛ amɛbaajɛ Biblia lɛ mli amɛtsɔɔ mɛi nii jogbaŋŋ.
Afã Nikanemɔ Kɛ Niŋmaa He Ta
Yɛ afi 1940 afii lɛ amli kɛ afi 1950 afii lɛ amli lɛ, Nathan H. Knorr kɛ Milton G. Henschel ni fata mɛi ni kwɛɔ Yehowa Odasefoi lɛ ashiɛmɔ nitsumɔ lɛ nɔ lɛ ahe lɛ, fã gbɛ kɛtee maji srɔtoi anɔ koni amɛyaye abua kɛto shiɛmɔ nitsumɔ lɛ he gbɛjianɔ yɛ jɛmɛ. Kɛ́ amɛshɛ hei ni mɛi ni leee nikanemɔ kɛ niŋmaa fa yɛ jɛmɛ lɛ, amɛwoɔ nitsumɔhe nine lɛ hewalɛ koni amɛhã ato gbɛjianɔ kɛtsɔɔ mɛi nikanemɔ kɛ niŋmaa yɛ asafoi lɛ amli.
Ajie wolo ko kpo ni akɛbaatsɔɔ Cinyanja wiemɔ lɛ kanemɔ kɛ eŋmaa yɛ kpee ko ni afee yɛ Chingola, ni yɔɔ Zambia lɛ yɛ afi 1954 lɛ shishi
Nitsumɔhe niji lɛ kɛ bɔ ni abaafee ato nikanemɔ kɛ niŋmaa he gbɛtsɔɔmɔi maje asafoi lɛ. No mli lɛ, yɛ maji komɛi anɔ lɛ, amralo lɛ eto nikanemɔ kɛ niŋmaa he gbɛjianɔ, ni amɛyɛ woji komɛi hu ni Yehowa Odasefoi baanyɛ amɛkɛtsɔɔ nii. Akɛ nɔkwɛmɔnɔ lɛ, yɛ Brazil lɛ, nɔyeli lɛ kɛ woji kɛ nibii kɛhã nikanemɔ kɛ niŋmaa maje nitsumɔhe nine lɛ, ni nitsumɔhe nine lɛ hu kɛmaje asafoi lɛ. Yɛ maji komɛi anɔ hu lɛ, ehe bahia ni Odasefoi lɛ diɛŋtsɛ ato amɛnikanemɔ kɛ niŋmaa nibii ahe gbɛjianɔ.
Ato nikanemɔ kɛ niŋmaa he gbɛjianɔ ahã hii kɛ yei, gbekɛbii kɛ onukpai fɛɛ. Oti lɛ ji ni atsɔɔ amɛ ni amɛle amɛmaŋ wiemɔ lɛ kanemɔ kɛ eŋmaa, kɛ́ enɛ baabi ni atsɔɔ wiemɔi srɔtoi yɛ asafo kome mli po.
Eji Gbɛjianɔtoo Ni Yeɔ Ebuaa Mɛi
Te mɛi ená gbɛjianɔ ni ato kɛhã nikanemɔ kɛ niŋmaa nɛɛ he sɛɛ amɛhã tɛŋŋ? Yoo ko ni eji Yehowa Odasefonyo ni jɛ Mexico lɛ wie akɛ: “Agbɛnɛ minyɛɔ mikaneɔ Biblia lɛ, etaa mitsuiŋ waa, ni minuɔ shishi. Akɛni mibale nikanemɔ hewɔ lɛ, mináa lɛ mlɛo akɛ mikɛ mikutsoŋbii lɛ baagba sane, ni ehã minyɛɔ mishiɛɔ Biblia mli anɔkwalei lɛ mitsɔɔ mɛi babaoo.”
Gbɛjianɔ ni ato kɛtsɔɔ mɛi nikanemɔ kɛ niŋmaa nɛɛ eye ebua mɛi waa ni amɛnu Biblia lɛ shishi. Shi jeee no pɛ kɛkɛ. Nuu ko ni atsɛɔ lɛ Isaac ni jɛ Burundi lɛ wie akɛ: “Nikanemɔ kɛ niŋmaa ni mikase lɛ eye ebua mi ni mikase tsumaa he ŋai. No ji nitsumɔ ni mitsuɔ bianɛ, ni amrɔ nɛɛ mikwɛɔ mɛi anɔ ni amɛmamɔɔ tsũi.”
Aatsɔɔ mɛi Chichewa wiemɔ lɛ kanemɔ kɛ eŋmaa yɛ Maŋtsɛyeli Asa ko ni yɔɔ Lilongwe yɛ Malawi lɛ nɔ, yɛ afi 2014
Yoo ko ni tsɛɔ lɛ Jesusa ni jɛ Peru lɛ kɛ ehe wo nikanemɔ kɛ niŋmaa gbɛjianɔtoo lɛ mli be ni eye afii 49. Ewie akɛ: “Akɛ yoogbayoo ni miyayeɔ jara kɛhãa shĩa lɛ, esa akɛ male nibii lɛ ajara ni aŋmala kɛ nibii lɛ hu agbɛ́i. Be ko ni eho lɛ, enɛ waa kɛhãa mi waa ejaakɛ mileee nikanemɔ. Shi amrɔ nɛɛ kɛ́ miiyaye jara kɛhã weku lɛ, miyaa kɛ ekãa kɛ miishɛɛ ejaakɛ nikanemɔ kɛ niŋmaa he gbɛjianɔ ni ato lɛ eye ebua mi ni mile nikanemɔ.”
Yɛ afii ni eho lɛ amli fɛɛ lɛ, maji anɔ onukpai etee nɔ ejie Yehowa Odasefoi lɛ ayi waa yɛ mɔdɛŋ ni amɛbɔɔ kɛtsɔɔ mɛi nikanemɔ kɛ niŋmaa lɛ hewɔ. Ŋmɛnɛ lɛ, Yehowa Odasefoi kã he amɛmiitsɔɔ mɛi nikanemɔ kɛ niŋmaa, amɛtee hiɛ waa yɛ gbɛjianɔ srɔtoi ni amɛtoɔ kɛ nibii ni amɛkɛtsuɔ nii kɛtsɔɔ mɛi nii lɛ mli. Amɛfee woji ni akɛtsɔɔ mɛi nikanemɔ kɛ niŋmaa, ni akɛtsɔɔ mɛi ni skulyaa faaa lɛ hu nii. Akala woji nɛɛ aaafee miliɔn 224 yɛ wiemɔi 720 amli. *
^ kk. 11 Akɛ nɔkwɛmɔnɔ lɛ, afee broshuɔ ni ji Kasemɔ Nikanemɔ kɛ Niŋmaa lɛ yɛ wiemɔi 123 amli, ni afee wolo ni ji Bo Nyɔŋmɔ Toi lɛ hu yɛ wiemɔi 610 amli.
