Ŋmɛnɛ lɛ, Yehowa Odasefoi anine shɛɔ mumɔŋ niyenii babaoo ni akɛtsɔɔ ilɛtrɔnik tsɔji anɔ lɛ anɔ fe bei fɛɛ ni eho. Shi akɛni intanɛt jara wa yɛ je lɛŋ hei babaoo hewɔ lɛ, wɔnyɛmimɛi lɛ ekomɛi nyɛɛɛ akɔnɛti intanɛt lɛ. Amɛteŋ mɛi komɛi hu yɛ hei ni afɔɔ lait kɔmɔ waa, intanɛt lɛ tsuuu nii jogbaŋŋ, loo intanɛt bɛ jɛmɛ kwraa po.

 Naagbai nɛɛ fɛɛ sɛɛ lɛ, wɔnyɛmimɛi lɛ nyɛɔ amɛdaunlodiɔ vidioi, woji, kɛ nibii kɛ́ amɛkɔnɛtiko intanɛt po! Mɛɛ gbɛ nɔ amɛtsɔɔ amɛfeɔ enɛ?

 Afee tsɔne bibioo ko ni atsɛɔ lɛ JW Box, akɛ enɛ hãa asafoi ni yɔɔ hei ni ewa akɛ amɛbaanyɛ amɛkɔnɛti intanɛt lɛ. Nibii ni yɔɔ mli ji router ko ni asafo lɛ he yɛ kɔmpani ko dɛŋ, sɔftwɛɛ ko ni asafo lɛ Computer Department ni yɔɔ Betel lɛ fee, kɛ woji, vidioi, kɛ nibii krokomɛi ni yɔɔ jw.org lɛ nɔ lɛ. JW Box lɛ ekome jara aaafee Amerika dɔlai 75.

 Akɛ JW Box lɛ maa Maŋtsɛyeli Asa lɛ nɔ koni ekɔɔɔ he eko he ni nyɛmimɛi lɛ yɔɔ yɛ Asa lɛ nɔ lɛ, amɛnyɛ amɛkɛ amɛtablɛt kɛ ehenɔi lɛ akɔnɛti JW Box nɛɛ koni amɛdaunlodi woji kɛ nibii kɛ vidioi. Mɛi ni hiɛ fon, shi jeee smatfon ni po lɛ baanyɛ akɔnɛti. Shi kɛ́ asafo ko bɛ intanɛt kɔnɛshiŋ lɛ, te amɛfeɔ tɛŋŋ amɛnáa nibii hei ni eba lɛ yɛ JW Box lɛ nɔ lɛ? Yɛ be kɛ beiaŋ lɛ, nitsumɔhe nine lɛ kɛ nibii hei ni eba yɛ jw.org lɛ nɔ lɛ woɔ USB keys loo pɛndraiv nɔ kɛmajeɔ asafoi lɛ; USB keys lɛ ekome jara aaafee amerika dɔlai 4.

 Mɛɛ gbɛ nɔ JW Box lɛ eye ebua nyɛmimɛi lɛ? Nyɛminuu ko ni eji tsɛ ni atsɛɔ lɛ Nathan Adruandra, ni jɛ Democratic Republic of Congo lɛ tsɔɔ mli akɛ: “Mikɛ bei kplaŋŋ ka shii abɔ akɛ madaunlodi vidioi ni ji ‘Yehowa, . . . Bo Onɔ Mihiɛ Kã’ kɛ Nyɛkaia Lot Ŋa Lɛ. Shi eyayeee omanye, hewɔ lɛ minijiaŋ je wui waa. Shi amrɔ nɛɛ minyɛɔ midaunlodiɔ vidioi nɛɛ miwoɔ mifon lɛ nɔ, ni ákɛ fɔlɔi lɛ, eyeɔ ebuaa wɔ ni wɔnyɛɔ wɔtsɔɔ wɔbii lɛ nii jogbaŋŋ.”

 Nyɛmi ko ni yeɔ ebuaa asafoi ni yɔɔ Nigeria koni amɛto JW Box lɛ he gbɛjianɔ lɛ wie akɛ: “Nyɛmimɛi lɛ naa JW Box lɛ akɛ nikeenii krɛdɛɛ ko ni jɛ Yehowa ŋɔɔ. Eŋɔɔ amɛnaa akɛ amrɔ nɛɛ amɛnyɛɔ amɛdaunlodiɔ woji kɛ vidioi ni yɔɔ Nitsɔɔmɔ Dɛŋdadei Titrii lɛ mli ni etɔɔɔ amɛ kwraa.”

 Akɛ JW Box ekomekomei 1,700 kɛ sɛɛ emaje wɔnyɛmimɛi ni yɔɔ Afrika, Oceania, kɛ South Amerika, ni aaato gbɛjianɔ koni akɛ eko amaje asafoi babaoo krokomɛi hu. Nɛgbɛ anáa shika yɛ kɛwoɔ JW Box lɛ kɛ ehe gbɛjianɔtoo krokomɛi lɛ ahe nyɔmɔ? Oniai ni atsuɔ kɛhã jeŋ muu fɛɛ nitsumɔ lɛ, ni mɛi babaoo tsɔɔ donate.pr418.com lɛ nɔ amɛtsuɔ lɛ ji nɔ ni akɛwoɔ he nyɔmɔ. Oyiwaladɔŋŋ akɛ ojɛɔ otsui muu fɛɛ mli ofiɔ nitsumɔi nɛɛ asɛɛ.