NIBII NI AKƐ ONIAI NI OTSUƆ LƐ FEƆ
Aye Abua Mɛi Yɛ Hela Ni Gba Mɛi Pii Anaa Yɛ Je Lɛŋ Fɛɛ Lɛ Hewɔ
JULY 1, 2021
Be ni Jeŋ Hewalɛnamɔ Gbɛjianɔtoo lɛ wie yɛ March 2020 akɛ COVID-19 hela lɛ ji tsɛŋemɔ hela ni miitsɛŋe mɛi yɛ je lɛŋ hei pii lɛ, mɛi babaoo eyasusuuu akɛ, afi kɛ sɛɛ fɛɛ ni hela nɛɛ miimɔmɔ mɛi ni eeye awui. Hela nɛɛ egba mɛi akpekpei abɔ, ni Yehowa Odasefoi hu fata he lɛ anaa waa, yɛ hewalɛnamɔ, henumɔŋ, kɛ shika gbɛfaŋ fɛɛ. Mɛɛ gbɛ nɔ Yehowa Odasefoi to yelikɛbuamɔ nibii ahe gbɛjianɔ ni amɛjara amɛhã mɛi yɛ jaramɔ shihilɛ nɛɛ mli?
Aye Abua Mɛi Ni Ehia Amɛ Lɛ
Gbɛtsɔɔmɔ Kuu Lɛ Nɔkwɛlɔi Ajinafoi Akuu lɛ ehã ato Yelikɛbuamɔ Ajinafoi Akui loo DRC 950 kɛ sɛɛ yɛ je lɛŋ hei srɔtoi, koni akɛye abua mɛi ni COVID-19 hela lɛ esa amɛhe lɛ. Yɛ hei komɛi lɛ amɛto gbɛjianɔ ni nyɛmimɛi lɛ ye amɛbua amɛnyɛmimɛi Odasefoi lɛ, ni yɛ hei krokomɛi hu lɛ, Odasefoi lɛ ná yelikɛbuamɔi ni nɔyeli lɛ kɛhãa lɛ eko. DRC srɔtoi lɛ etsu yelikɛbuamɔ nitsumɔi babaoo hu.
Hã wɔsusu shihilɛ ko ni tee nɔ yɛ Paraguay lɛ he wɔkwɛ. Adafitswaa wolo ko bɔ amaniɛ akɛ, yɛ shika he naagbai ni COVID-19 hela lɛ kɛba lɛ hewɔ lɛ, “Paraguabii pii yɛ ni hɔmɔ miiye amɛ yɛ amɛshiai amli.” No mli lɛ, DRC ni yɔɔ Paraguay lɛ ebɔi nibii ajaramɔ kɛ nyɛmimɛi lɛ ahamɔ, nibii ni baanyɛ aye abua amɛ otsii enyɔ—niyenii, falefalefeemɔ nibii ni baashɛ wekui kɛ amɛmli bii ejwɛ. Nibii ni weku fɛɛ weku nine shɛ nɔ lɛ aaafee Amɛrika dɔlai 30.
Mɛɛ gbɛ nɔ yelikɛbuamɔ nitsulɔi nɛɛ bu amɛdiɛŋtsɛ kɛ mɛi krokomɛi ahe koni COVID-19 hela lɛ akamɔmɔ amɛ? Amɛbuɔ face mask ni amɛhãa gbɛ kamɔɔ amɛ kɛ mɛi krokomɛi ateŋ. Agbɛnɛ hu, amɛkwɛɔ kɛji nitsumɔhei ni toɔ niyenii lɛ ahe gbɛjianɔ lɛ anitsumɔhei lɛ yɛ falefale ni amɛkɛ shweshweeshwefeemɔ he mlai lɛ tsuɔ nii lo. Nyɛmimɛi lɛ kwɛɔ koni nitsumɔhei nɛɛ ahã amɛnitsulɔi lɛ awo nibii ni akɛbuɔ he kɛjeɔ hela lɛ he, amɛhã amɛtsɔji amli atse, amɛshi tsofai kɛgbe muawai ni yɔɔ mli lɛ, ni amɛkɛ tsofai atsumɔ hei ni akɛ nibii nɛɛ baamamɔ lɛ. Naagbee kwraa lɛ, mɛi ni kɛ yelikɛbuamɔ nibii nɛɛ yahãa wɔnyɛmimɛi lɛ, kwɛɔ koni gbɛ akã amɛ kɛ nyɛmimɛi lɛ ateŋ.
Akɛ Oniai Ni Nine Shɛɔ Nɔ Lɛ Tsuɔ Nii Yɛ Hiɛshikãmɔ Mli
Kɛbashi January 2021 lɛ, no mli lɛ, shika ni Nɔkwɛlɔi Ajinafoi Akuu lɛ ekpɛlɛ nɔ ni akɛye abua nyɛmimɛi ni COVID-19 hela lɛ egba amɛnaa lɛ fa fe Amɛrika dɔlai million 25. Nitsumɔhe niji kɛ DRC srɔtoi lɛ kɛ shika ni amɛnine shɛɔ nɔ lɛ tsuɔ nii yɛ hiɛshikamɔ mli ni amɛbɔɔ mɔdɛŋ amɛyeɔ nibii ni ehe hiaa ni ahe lɛ anaa jogbaŋŋ ni amɛnaa lɛ jara ni sa. Akɛ nɔkwɛmɔnɔ lɛ, yɛ Chile lɛ, nyɛmimɛi ni miito nibii ni akɛyaaye abua lɛ he gbɛjianɔ lɛ kpɛ mli akɛ, amɛbaahe akwɛ̃ii (lentils) ni ji yɔɔ henɔ ko; amɛbaahe efalɛ ni tsiimɔ aaafee kilogram 750. Shi yɛ nyɔŋ kome pɛ mli lɛ, akwɛ̃ii lɛ jara lɛ eku ebɔ he toi enyɔ! Be ni amɛkpɛ mli akɛ amɛbaahe lɛ bɔ ni ejara ewa lɛ, ŋmɛlɛtswai enyɔ sɛɛ lɛ, mɔ ni hɔɔ lɛ tswa amɛ ni ehã amɛle akɛ, mɔ ko ni bahe eko lɛ, kɛku esɛɛ kɛba. No hewɔ lɛ, yɛ nɔ najiaŋ ni mɔ ni hɔɔ lɛ baahɔɔ lɛ yɛ jara ni wa ni akpɛlɛ nɔ lɛ naa lɛ, etse nɔ ehɔɔ ehã wɔnyɛmimɛi lɛ bɔ ni ahɔɔ lɛ tsutsu lɛ!
Shi be ni wɔnyɛmimɛi lɛ tee ni amɛyaahole akwɛ̃ii lɛ, mɔ ni hɔɔ lɛ tsake ejwɛŋmɔ ni ekɛɛ ehɔɔɔ ehãaa amɛ dɔŋŋ, efɔlɔ amɛnaa akɛ amɛkɛ hiɛaŋkwɛmɔ miitsu nii yɛ niyenii lɛ jaa mli, tamɔ kui komɛi feɔ lɛ. Wɔnyɛmimɛi hii lɛ ateŋ mɔ kome sɔle yɛ eyitsoŋ, no sɛɛ lɛ egbala mli etsɔɔ mɔ ni hɔɔ nii lɛ akɛ, asusu asafoi lɛ eko fɛɛ eko he, ni ana mɛi ni nibii lɛ ahe miihia amɛ diɛŋtsɛ. Nyɛmimɛi lɛ tee nɔ amɛgbala mli akɛ, akɛni mɛi ni akɛ nibii lɛ baahã lɛ jɛ maji srɔtoi anɔ hewɔ lɛ, ato nibii nɛɛ ahe gbɛjianɔ yɛ weku fɛɛ weku hiamɔ nii lɛ anaa. Naagbee mli lɛ, amɛma nɔ mi amɛhã mɔ ni hɔɔ nii lɛ akɛ, mɛi ni tsuɔ nii amɛhãa Yehowa Odasefoi lɛ kɛ amɛhe eshã afɔle, ni shika ni akɛtsuɔ nibii ahe nii lɛ hu lɛ, mɛi jɛ amɛsuɔmɔ mli amɛhã. Ehiɛ sɔ waa. Ekpɛlɛ nɔ akɛ ebaatse akwɛ̃ii lɛ nɔ ehã amɛ, ni ekɛfata he akɛ, bei kroko ni amɛbaaba amɛbahe eko lɛ, ebaake amɛ kilogram 400 kɛfata he.
“Odaseyeli Ni Tsɔɔ Akɛ Amɛsumɔɔ Amɛhe Lɛɛlɛŋ”
Yoo onukpa okulafo ko ni atsɛɔ lɛ Lusu, ni yɔɔ Liberia lɛ, kɛ eweku lɛ mli bii enumɔ ni yɔɔ. Gbi ko leebi ni amɛmiiye nii ni amɛmiisusu daa gbi ŋmalɛ lɛ he lɛ, Lusu nabi nuu ni eye afii kpawo lɛ yɔse akɛ amɛniyenii ni amɛyɔɔ yɛ shĩa lɛ eta. Ebi akɛ, “Te wɔbaafee tɛŋŋ wɔná niyenii wɔye lɛ?” Lusu kɛɛ lɛ akɛ, ekashe gbeyei ejaakɛ esɔle ebi Yehowa koni eye ebua amɛ ni eyɛ nɔmimaa akɛ, Yehowa baahã amɛ amɛhiamɔ nii. Nakai gbi lɛ shwane nɔŋŋ lɛ, Lusu asafoŋ onukpai lɛ tswa lɛ ni amɛkɛɛ lɛ akɛ, ato niyenii kɛ nibii ahe gbɛjianɔ, no hewɔ lɛ, eba ni ebahe enɔ. Ewie akɛ: “Minabi lɛ kɛɛ bianɛ lɛ, ená ele akɛ Yehowa le wɔhiamɔ nii, ni kɛ́ wɔsɔle lɛ eboɔ toi ni ehãa hetoo, ejaakɛ ehã misɔlemɔ lɛ hetoo.”
Gbekɛbii komɛi ni yɔɔ Democratic Republic of Congo lɛ tɛŋ mfonirii kɛda nyɛmimɛi lɛ shi yɛ yelikɛbuamɔ ni amɛnine shɛ nɔ lɛ hewɔ
Yoo ko ni yɔɔ Democratic Republic of Congo lɛ kɛ Yehowa Odasefoi lɛ aweku ko yɛ shĩa kome mli. Be ni ena akɛ Yehowa Odasefoi lɛ ebaye ebua Yehowa Odasefoi lɛ aweku ni ekɛyɔɔ shĩa lɛ, ewie akɛ, “Kɛ́ hela nɛɛ tee lɛ, wɔbaasumɔ ni wɔbatsɔmɔ Yehowa Odasefoi ejaakɛ, wɔna akɛ, amɛye amɛbua amɛnyɛmimɛi lɛ waa yɛ jaramɔ be nɛɛ mli.” Ewu lɛ bi lɛ akɛ, “Hewɔ lɛ, omɔ baagi kome lɛ hewɔ obaabatsɔ Yehowa Odasefonyo lɛ?” Yoo lɛ hã lɛ hetoo akɛ, “Dabi kwraa, shi omɔ baagi kome lɛ ji odaseyeli ni tsɔɔ akɛ amɛsumɔɔ amɛhe lɛɛlɛŋ.”
Akɛ Yehowa Odasefoi lɛ, wɔnyɛ wɔtsu wɔnyɛmimɛi lɛ ahiamɔ nii ahe nii yɛ be naa yɛ COVID-19 be nɛɛ mli yɛ oniai ni ojɛɔ osuɔmɔ mli otsuɔ lɛ hewɔ. Oyiwaladɔŋŋ akɛ otsɔɔ gbɛi srɔtoi ni atsɔɔ yɛ donate.pr418.com lɛ nɔ otsuɔ onia.