Lala ji nikeenii fɛfɛo ko ni jɛ Yehowa ŋɔɔ. Ebaanyɛ ená wɔsusumɔi anɔ hewalɛ, etsake bɔ ni wɔnuɔ nii ahe wɔhãa, ni ebaanyɛ ewo wɔ hewalɛ hu. Nakai yiŋtoo he nii nɔŋŋ asafo lɛ lalai krokomɛi lɛ tsuɔ. Anɔkwa, lalai nɛɛ feɔ babaoo po fe nakai: amɛbaanyɛ amɛhã wɔbɛŋkɛ Yehowa kpaakpa.

 Kɛjɛ afi 2014 kɛbaa nɛɛ lɛ, afee asafo lɛ lalai krokomɛi lɛ ekomekomei 70 kɛ sɛɛ, ni kɛ́ hooo lɛ, ayɛ lalai nɛɛ ateŋ ekome yɛ wiemɔi ni fa fe 500 amli ŋmɛnɛ! Shi ekolɛ, obaabi ohe akɛ, ‘Namɛi tsuɔ lalai nɛɛ ahe nii, ni te afeɔ tɛŋŋ afeɔ lalai nɛɛ?’

 Lala feelɔi akuu ni yɔɔ Audio/Video Services, ni tsuɔ nii yɛ Gbɛtsɔɔmɔ Kuu Lɛ Nitsɔɔmɔ Ajinafoi Akuu lɛ shishi lɛ ji mɛi ni feɔ asafo lɛ lalai krokomɛi lɛ. Nyɛmimɛi hii kɛ yei ni amɛyi shɛɔ 13 yɔɔ Lala feelɔi akuu lɛ mli; amɛyeɔ amɛbuaa kɛ lala lɛ ŋmaa, erikɔdimɔ, kɛ ehe nibii krokomɛi fɛɛ ni ehe hiaa ni atsu yɛ lala lɛ feemɔ mli lɛ. Kɛfata he lɛ, Nitsɔɔmɔ Ajinafoi Akuu lɛ ekpɛlɛ lalafolɔi, lalaŋmalɔi, kɛ lalɔi ni jɛ je lɛŋ hei srɔtoi lɛ anɔ koni amɛjɛ shĩa amɛye amɛbua kɛtsu nitsumɔ nɛɛ. Nyɛmimɛi nɛɛ jɛɔ heshibaa mli amɛkɛ nyɛmɔi ni amɛyɔɔ lɛ tsuɔ nii, ni amɛsumɔɔɔ ni akɛ yijiemɔ loo woo ko hãa amɛ yɛ nitsumɔ nɛɛ hewɔ.

 Te afeɔ tɛŋŋ afeɔ asafo lɛ lalai krokomɛi lɛ? Klɛŋklɛŋ lɛ, Nitsɔɔmɔ Ajinafoi Akuu lɛ tsɔɔ Ŋmalɛ ni esa akɛ lala lɛ adamɔ nɔ, kɛ henumɔi ni esa akɛ ená yɛ mɛi ni baabo toi lɛ anɔ. No sɛɛ lɛ, kuu ni tsuɔ lala lɛ he nii lɛ jaraa nitsumɔ lɛ amɛhãa lalafolɔi lɛ kɛ lalaŋmalɔi. Arikɔdiɔ lala lɛ klɛŋklɛŋ nɔ. Akɛhãa Nitsɔɔmɔ Ajinafoi Akuu lɛ koni amɛbo toi ni amɛtsɔɔ amɛjwɛŋ yɛ he. No sɛɛ lɛ, kuu ni tsuɔ lala he nii lɛ kɛ ŋaawoi ni Ajinafoi Akuu lɛ kɛhã lɛ tsuɔ nii kɛrikɔdiɔ naagbee nɔ kwraa. Arikɔdiɔ lalai nɛɛ yɛ hei srɔtoi, tamɔ nitsumɔhe niji amli kɛ mɛi ashĩai ni rikɔdiŋ studio yɔɔ jɛmɛ.

 Bɔ ni afee ni anyɛ atsu lalai ahe nibii srɔtoi lɛ ahe nii ni arikɔdi lɛ, wɔnyɛmimɛi lɛ kɛ kɔmpiuta program henɔi srɔtoi tsuɔ nii. Agbɛnɛ hu, ebiɔ ni aná mashiŋ srɔtoi, tamɔ mixing consoles, amplifiers, speakers, kɛ maikrofoŋ koni anyɛ atsu nitsumɔ nɛɛ. Maikrofoŋ ni atsɔɔ nɛɛ, ekome jara baanyɛ afee Amerika dɔlai 100 kɛmiimɔ dɔlai 1,000 kɛ sɛɛ. Yɛ afi 2020 lɛ, wɔfite shika ni naa shɛɔ Amerika dɔlai 116,000 kɛhé nibii ni akɛrikɔdiɔ lala.

 Mɛni Yehowa asafo lɛ feɔ koni anyɛ abaa oniai ni atsuɔ lɛ yi? Yɛ nɔ najiaŋ ni abaahã mɛi babaoo ahi Betel kɛtsu lalai lɛ ahe nii lɛ, ahãa mɛi jɛɔ amɛshĩai amli amɛyeɔ amɛbuaa kɛtsuɔ lalai lɛ ahe nii. Kɛfata he lɛ, nɔ najiaŋ ni abaahã mɛi pii ababua amɛhe naa kutuu kɛrikɔdi lala lɛ, loo akɛtsu he nii lɛ, bei pii lɛ wɔnyɛmimɛi kɛ kɔmpiuta program tsuɔ lala lɛ he nibii lɛ ekomɛi ahe nii.

 Nyɛmimɛi lɛ sumɔɔ asafo lɛ lalai krokomɛi lɛ atoiboo naakpa. Nyɛmi yoo ko ni yɔɔ Germany ni atsɛɔ lɛ Tara lɛ wie akɛ: “Kɛ́ nɔ ko miiye mitsui lɛ, lalai nɛɛ baa mitsuiyeli lɛ shi. Kɛ́ mibo lalai nɛɛ atoi yɛ mi diɛŋtsɛ miwiemɔ mli lɛ, ehãa minuɔ he tamɔ Yehowa efua mi diɛŋtsɛ.” Nyɛmi nuu ko ni yɔɔ Kazakhstan ni atsɛɔ lɛ Dmitry lɛ wie akɛ: “Kɛ́ miibo lalai nɛɛ atoi lɛ, migbaaa mihe naa mabi kɛji emli wiemɔi lɛ kɛ Biblia mli shishitoo mlai kpãa gbee loo amɛkɛ lɛ kpãaa gbee, tamɔ mifeɔ yɛ je lɛŋ lalai lɛ ahe lɛ. Agbɛnɛ hu, lalai nɛɛ yeɔ amɛbuaa mi ni mikɛ mijwɛŋmɔ maa naanyobɔɔ ni yɔɔ mi kɛ Yehowa teŋ lɛ nɔ.”

 Delia, ni yɔɔ South Africa lɛ tsɔɔ bɔ ni enuɔ asafo lalai krokomɛi lɛ ahe ehãa, ekɛɛ: “Lalai nɛɛ wajeɔ mikɛ Nyɔŋmɔ teŋ naanyobɔɔ lɛ waa. Kɛ́ miwerɛ ho mihe loo mikɛ shihilɛ ni mli wa ko miikpe lɛ, be fɛɛ be lɛ mináa lala ko ni yeɔ ebuaa mi kɛkpeɔ shihilɛ lɛ eko fɛɛ eko naa. Bei pii lɛ, kɛ́ minu lala lɛ bit lɛ, ni wiemɔi lɛ po fataaa he lɛ, etsakeɔ bɔ ni minuɔ he mihãa lɛ!”

 Asafo lɛ lalai krokomɛi lɛ ebatsɔ lalai ni misumɔɔ waa. Lerato ni lɛ hu eyɔɔ South Africa lɛ kɛɛ: “Lalai ni ji ‘Etsɛŋ Ebaaba’ lɛ kɛ ‘Jalɛ Jeŋ Hee Lɛ’ yeɔ ebua mi ni mifeɔ mihe mfoniri ni miikpee mimami ni misumɔɔ lɛ waa lɛ kɛmiiba jalɛ jeŋ hee lɛ mli. Be fɛɛ be ni mabo lalai nɛɛ atoi lɛ, efeɔ mi tamɔ miina lɛ ni egbɛ eniji amli ni eeba ebafua mi.”

 Asafo lɛ lalai krokomɛi lɛ eko ye ebua oblayoo ko ni eye afii 16 ni yɔɔ Sri Lanka lɛ. Ewie akɛ: “Mitsɔɔlɔi lɛ ateŋ mɔ kome kɛ mlifu wie mihiɛ bɔ ni esaaa yɛ klasbii lɛ ahiɛ akɛni Yehowa Odasefonyo ji mi lɛ hewɔ. Mishe gbeyei waa, ni minaaa nɔ ni makɛɛ. Be ni miba shĩa lɛ, mimami wo mi hewalɛ akɛ mibo lala ni ji ‘Nikasemɔ Hãa Wɔhe Waa Yɛ Mumɔŋ’ lɛ toi. Lala lɛ ye ebua mi ni mina akɛ esa akɛ matao nii amli koni maná hetoo mahã amɛ. Enɔ jetsɛremɔ lɛ, mikɛ mitsɔɔlɔ lɛ yawie. Ebo mi toi, ni ekɛɛ enu Yehowa Odasefoi ahemɔkɛyeli lɛ shishi jogbaŋŋ agbɛnɛ. Miida Yehowa asafo lɛ shi akɛ edro wɔ lalai kpakpai ni woɔ wɔ hewalɛ nɛɛ.”

 Te afeɔ tɛŋŋ anáa shika kɛfeɔ lalai nɛɛ? Oniai ni mɛi jɛɔ amɛsuɔmɔ mli amɛtsuɔ kɛfiɔ jeŋ muu fɛɛ nitsumɔ lɛ sɛɛ lɛ mli ajɛɔ anáa shika lɛ. Mɛi babaoo tsɔɔ donate.pr418.com lɛ nɔ amɛtsuɔ oniai nɛɛ. Nyɛyiwaladɔŋŋ akɛ nyɛjɛɔ nyɛtsui mli nyɛtsuɔ onia.