“Gbɛtsɔɔmɔ Kuu lɛ ekpɛ mli akɛ, kɛ́ nɔyeli lɛ mla ko etsĩŋ nyɛnaa yɛ he ni nyɛyɔɔ lɛ, no lɛ amɛmiiwo asafoi fɛɛ hewalɛ akɛ kɛjɛ April 1 otsi lɛ mli kɛyaa lɛ, abɔi henaabuamɔ ekoŋŋ kɛfee kpeei hiɛ kɛ hiɛ.” Be ni akɛ adafitswaa nɛɛ wo jw.org lɛ nɔ yɛ March 2022 shishijee gbɛ lɛ, Yehowa Odasefoi ni yɔɔ jeŋ fɛɛ lɛ amii shɛ amɛhe waa. Shi no mli lɛ, COVID-19 tsɛŋemɔ hela lɛ eyako. a Mɛɛ tsakemɔi afee, ni mɛɛ nibii hei ehe bahia ni aná koni mɛi fɛɛ ni baaya kpeei lɛ akaná hela lɛ eko? Akɛni no mli lɛ, afii enyɔ sɔŋŋ eho ni wɔyako kpee yɛ Maŋtsɛyeli Asai lɛ anɔ hewɔ lɛ, sanebimɔ lɛ ji akɛ, ani Maŋtsɛyeli Asai lɛ nɔ yɛ jogbaŋŋ bɔ ni abaanyɛ afee kpeei jɛmɛ?

 Yɛ anɔkwale mli lɛ, no mli lɛ nyɛmimɛi lɛ kɛ nyɔji babaoo miito gbɛjianɔ ni baahã wɔnyɛ wɔbɔi kpeeiyaa yɛ Maŋtsɛyeli Asai lɛ anɔ ekoŋŋ.

 Yɛ afi 2020 be ni akpa asafoŋ kpee yaa yɛ Maŋtsɛyeli Asa lɛ nɔ nyɔŋ kome pɛ sɛɛ lɛ, Worldwide Design/Construction Department (WDC), ni yɔɔ Warwick, yɛ New York lɛ, bɔi bɔ ni COVID-19 hela lɛ baasa bɔ ni wɔkɛ wɔ-Maŋtsɛyeli Asai lɛ tsuɔ nii wɔhãa lɛ he susumɔ, kɛ nɔ ni ebaabi ni afee koni wɔkpeehei lɛ afee shweshweeshwe.

 Esoro nibii ni ehe bahia ni aná yɛ maŋ ko nɔ lɛ yɛ nɔ ni ehe bahia ni aná yɛ maŋ kroko nɔ lɛ he. Matthew De Sanctis, ni etsuɔ nii yɛ WDC lɛ tsɔɔ mli akɛ: “Yɛ maji komɛi anɔ lɛ, naagba kome ni aná ji, amɛbɛ hei ni afɔɔ dɛŋ yɛ. Kɛ́ paipi bɛ Maŋtsɛyeli Asai lɛ anɔ lɛ, ehe bahiaa ni ayahe nu kɛjɛ he ko loo ayayɛ yɛ nubu loo faa ko mli. Yɛ maji komɛi anɔ lɛ, amralo lɛ tsɔɔ tsakemɔi ni esa akɛ afee yɛ air-condition kɛ amɛhenɔi loo mashiŋ ni hãa tsũi amli jɔɔ ŋanii, kɛ gbɔmɔtsoŋ hewalɛnamɔ kɛ falefalefeemɔ he postai ni esa akɛ akɛkpɛtɛ shi lɛ ahe.”

 Mɛni wɔnyɛmimɛi lɛ fee koni amɛnyɛ amɛtsu naagbai nɛɛ ahe nii? Matthew wie akɛ nyɛmimɛi lɛ yɔse akɛ, yɛ Maŋtsɛyeli Asai lɛ pii anɔ lɛ “nibii ni afee kɛtsu naagbai lɛ ahe nii lɛ bɛ haŋtsĩi, ni ehãaa afite shika pii tsɔ.” Akɛ nɔkwɛmɔnɔ lɛ, yɛ Papua New Guinea lɛ, akɛ paipi woɔ rɔba gogai ni woɔ nu litai 20 lɛ anaa koni afo kɛfɔ dɛŋ. Enɛ hewɔ lɛ, yɛ Maŋtsɛyeli Asai ni yɔɔ akrowai lɛ eko fɛɛ eko gbɛfaŋ lɛ, nyɛmimɛi nyɛ amɛkɛ Amerika dɔlai 40 pɛ to dɛŋfɔmɔhei ahe gbɛjianɔ. Yɛ Maŋtsɛyeli Asai ni yɔɔ Afrika lɛ agbɛfaŋ lɛ, ahé nibii hi jogbaŋŋ ni akɛbaafee dɛŋfɔmɔhei ekomekomei 6,000 kɛjɛ Asia.

 Agbɛnɛ hu, ehe bahia ni afee tsakemɔi krokomɛi, tamɔ fan ni akɛbaawo Maŋtsɛyeli Asai amli loo ni abaatsake ekomɛi ahiɛ, kɛ mashiŋ ni hãa kɔɔyɔɔ boteɔ tsu mli jogbaŋŋ lɛ ni akɛbaawo Maŋtsɛyeli Asai lɛ amli. Asafoi lɛ pii he nɔ ko ni abaanyɛ akɛ maikrofoŋ awo he koni kɛ́ nyɛmimɛi lɛ baahã sane hetoo loo nɔ ko tamɔ nakai lɛ, akpã mli ahã amɛ ni amɛwie amɛwo mli, moŋ fe ni amɛkɛ amɛniji baamɔmɔ maikrofoŋ lɛ mli ni amɛkɛhã mɔ kroko. Abɔ mɔdɛŋ akɛ, akɛ tsofãi ni gbeɔ muawai baatsumɔ hei ni afɔɔ taramɔ lɛ nɔtonɔto. Yɛ asafoi komɛi amli lɛ, akɛ paipi ni kɛ́ okɛ onine wo shishi nɔŋŋ lɛ, nu baaba lɛ wo nushwiemɔhei lɛ. Yɛ Chile lɛ, ehe bahia ni akɛ Amerika dɔlai aaafee 1,400 afee tsakemɔi nɛɛ yɛ Maŋtsɛyeli Asai eko fɛɛ eko he.

 Be ni nyɛmimɛi lɛ bɔɔ mɔdɛŋ koni amɛhã Maŋtsɛyeli Asai lɛ afee shweshweeshwe lɛ, nakai beiaŋ nɔŋŋ lɛ amɛkwɛ koni abaa oniai ayi. Akɛ nɔkwɛmɔnɔ lɛ, yɛ maji komɛi anɔ lɛ, nyɛmimɛi lɛ ná yelikɛbuamɔ yɛ amralofoi lɛ aŋɔɔ kɛwo dɛŋfɔmɔhei kɛ rɔba loo dade kakadaŋŋ ko ni akɛ maikrofoŋ woɔ he lɛ ahe nyɔmɔ. Nitsumɔhe niji lɛ fee ekome kɛhé nibii ni he hiaa lɛ pii fe bɔ ni amɛheɔ lɛ koni amɛbaa shika yi. Nitsumɔhe niji lɛ kɛ Global Purchasing Department lɛ fee ekome koni amɛhe nibii lɛ kɛjɛ hei ni afeɔ yɛ lɛ tɛ̃ɛ koni ejara lɛ aba shi ni nine ashɛ nɔ oya hu.

 Gbɛjianɔ ni ato koni ahã Maŋtsɛyeli Asai lɛ afee shweshweeshwe lɛ ebu mɛi ni bɔi kpeeiyaa hiɛ kɛ hiɛ lɛ ahe, ni ehã amɛnu he akɛ amɛyɛ shweshweeshwe. Nyɛmiyoo Dulcine ni yɔɔ Peru lɛ kɛɛ, be ni ená ele akɛ abaabɔi kpeeiyaa yɛ Maŋtsɛyeli Asa lɛ nɔ lɛ “etsui fã fioo.” Ekɛɛ akɛ, “Be ni COVID-19 hela lɛ je shishi lɛ, etsɛɛɛ nɔŋŋ ni miná eko. No hewɔ lɛ, minu he akɛ kɛ́ mitee Maŋtsɛyeli Asa lɛ nɔ lɛ, hela lɛ baanyɛ amɔ mi ekoŋŋ. Shi be ni mishɛ Maŋtsɛyeli Asa lɛ nɔ lɛ, miyɔse akɛ asafoŋ onukpai lɛ efee nibii pii ni baahã wɔfee shweshweeshwe; tamɔ hei ni akɛ tsofã ni akɛkpaa dɛŋ kɛgbeɔ muawai, ni ji hand-sanitaiza emamɔ, rɔba loo dade kakadaŋŋ ko ni akɛ maikrofoŋ woɔ he, agbɛnɛ hu ashiɔ tsofã ni gbeɔ muawai awoɔ asai lɛ anɔ dani ajeɔ kpeei ashishi, ni kɛ́ akpa kpee hu lɛ, afeɔ nakai. Enɛɛmɛi fɛɛ hã minu he akɛ miyɛ shweshweeshwe, ni no mli lɛ, no mitaoɔ.” b

 Nyɛmi yoo ko ni atsɛɔ lɛ Sara ni yɔɔ Zambia lɛ kɛ naagba ko kpe. Etsɔɔ mli akɛ: “Nyɔji komɛi ni ho lɛ, COVID-19 hela lɛ gbe miwu. Mishwie miyiŋ akɛ, ‘Kɛ́ mitee kpeei hiɛ kɛ hiɛ klɛŋklɛŋ kwraa ni mɛi enaaa akɛ miwu ta mimasɛi lɛ, te manu he mahã tɛŋŋ?’” Te nibii anaa yakpa hã tɛŋŋ yɛ egbɛfaŋ? Ewie akɛ: “Kpeei ni wɔbɔi feemɔ hiɛ kɛ hiɛ lɛ ehã mina akɛ Yehowa shiko wɔ yɛ naagbee gbii nɛɛ amli. Bianɛ lɛ, minuɔ he akɛ, mináa hewalɛwoo, suɔmɔ, kɛ yelikɛbuamɔi ni he hiaa mi lɛ kɛjɛɔ asafoŋ onukpai lɛ kɛ minyɛmimɛi Kristofoi lɛ aŋɔɔ fe bei fɛɛ ni eho.”

 Eŋɔɔ wɔnyɛmimɛi ni yɔɔ jeŋ fɛɛ lɛ anaa akɛ amɛná hegbɛ akɛ amɛbɔi kpeeiyaa yɛ Maŋtsɛyeli Asai lɛ anɔ ekoŋŋ. Nyɛyiwaladɔŋŋ diɛŋtsɛ yɛ oniai ni nyɛtsu lɛ hewɔ, ni nyɛtsu oniai nɛɛ babaoo kɛtsɔ donate.pr418.com lɛ nɔ. Oniai nɛɛ yeɔ ebuaa ni afeɔ nibii ni hãa wɔjamɔhei lɛ feɔ hei ni sa jogbaŋŋ kɛhã kpeei, ni efeɔ shweshweeshwe hu.